ವಿಶ್ವ ಪ್ಯಾರಾ ಆ್ಯತ್ಲೆಟಿಕ್ಸ್‌ ಸುಂದರ್‌ ಗುರ್ಜಾರ್‌ಗೆ ಚಿನ್ನ

Team Udayavani, Jul 16, 2017, 4:00 AM IST

ಹೊಸದಿಲ್ಲಿ: ಭಾರತದ ಸುಂದರ್‌ ಸಿಂಗ್‌ ಗುರ್ಜಾರ್‌ ಅವರು ಲಂಡನ್‌ನಲ್ಲಿ ನಡೆಯುತ್ತಿರುವ ಐಪಿಸಿ ವಿಶ್ವ ಪ್ಯಾರಾ ಆ್ಯತ್ಲೆಟಿಕ್‌ ಕೂಟದ ಜಾವೆಲಿನ್‌ ಎಫ್ 46 ವಿಭಾಗದಲ್ಲಿ ಚಿನ್ನದ ಪದಕ ಗೆದ್ದುಕೊಂಡಿದ್ದಾರೆ. 

ಪ್ಯಾರಾಲಿಂಪಿಕ್‌ ಚಿನ್ನ ವಿಜೇತ ದೇವೇಂದ್ರ ಝಝಾರಿಯ ಅವರ ಅನುಪಸ್ಥಿತಿಯಲ್ಲಿ ಸ್ಪರ್ಧಿಸಿದ ಸುಂದರ್‌ ತನ್ನ ವೈಯಕ್ತಿಕ ಶ್ರೇಷ್ಠ ಸಾಧನೆಯೊಂದಿಗೆ ಚಿನ್ನ ಗೆದ್ದರು. 60.36 ಮೀ. ದೂರ ಎಸೆಯುವ ಮೂಲಕ ಭಾರತಕ್ಕೆ ಮೊದಲ ಚಿನ್ನ ತಂದುಕೊಟ್ಟರು. ಇದೇ ಸ್ಪರ್ಧೆಯಲ್ಲಿ ಪಾಲ್ಗೊಂಡಿದ್ದ ಭಾರತದ ರಿಂಕು ಸ್ವಲ್ಪದರಲ್ಲಿ ಕಂಚು ಗೆಲ್ಲಲು ವಿಫ‌ಲರಾಗಿ ನಾಲ್ಕನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡರು. ತಾಂತ್ರಿಕ ಕಾರಣಗಳಿಗಾಗಿ ಸುಂದರ್‌ ಅವರನ್ನು ರಿಯೋ ಪ್ಯಾರಾಲಿಂಪಿಕ್ಸ್‌ನ ಈ ವಿಭಾಗದಿಂದ ಅನರ್ಹಗೊಳಿಸಲಾಗಿತ್ತು. 

ರಿಯೋದಲ್ಲಿ ನನ್ನನ್ನು ಅನರ್ಹಗೊಳಿಸಿದ್ದಕ್ಕೆ ಭಾರೀ ನಿರಾಶೆಯಾಗಿತ್ತು. ಯಾಕೆಂದರೆ ಪದಕ ಗೆಲ್ಲಲು ನಾನು ಕಠಿನ ಮತ್ತು ಛಲದಿಂದ ಸಿದ್ಧತೆ ನಡೆಸಿದ್ದೆ. ನನ್ನ ಆತ್ಮವಿಶ್ವಾಸ ಪೂರ್ತಿಯಾಗಿ ಹೊರಟುಹೋಗಿತ್ತು. ಆದರೆ ಇಲ್ಲಿ ಚಿನ್ನ ಗೆಲ್ಲುವ ಮೂಲಕ ಸ್ವಲ್ಪಮಟ್ಟಿಗಾದರೂ ಖುಷಿಯಾಗಿದೆ. ವಿಶ್ವ ಚಾಂಪಿಯನ್‌ಶಿಪ್‌ಗಾಗಿ ನಾನು ಕಠಿನ ತರಬೇತಿ ನಡೆಸಿದ್ದೆ. ಆದರೆ ರಿಯೋ ಸ್ಪರ್ಧೆಗಾಗಿ ಮಾಡಿದಷ್ಟು ಅಲ್ಲ ಎಂದು ಚಿನ್ನ ಗೆದ್ದ ಬಳಿಕ ಸುಂದರ್‌ ಹೇಳಿದರು.

ಇಲ್ಲಿ ಚಿನ್ನ ಗೆದ್ದಿರುವುದು ಮುಂಬರುವ ದಿನಗಳಲ್ಲಿ ಇದಕ್ಕಿಂತ ಮಿಗಿಲಾದ ನಿರ್ವಹಣೆ ಪ್ರದರ್ಶಿಸಲು ಪ್ರೇರಣೆ ನೀಡಲಿದೆ. ನಾನೀಗ ಪೂರ್ಣವಾಗಿ ಚೇತರಿಸಿಕೊಂಡಿದ್ದೇನೆ ಮತ್ತು ಮುಂದಿನ ವರ್ಷ ನಡೆಯುವ ಏಶ್ಯನ್‌ ಗೇಮ್ಸ್‌ನಲ್ಲಿ ಉತ್ತಮ ನಿರ್ವಹಣೆ ನೀಡಲು ಪ್ರಯತ್ನಿಸಲಿದ್ದೇನೆ. ಇಲ್ಲಿ ವಿಶ್ವದಾಖಲೆ ಮುರಿಯಲು ಸಾಧ್ಯವಾಗದಿರುವುದು ನಿರಾಸೆಯಾಗಿದೆ. ಆದರೆ ಚಿನ್ನ ಗೆದ್ದಿರುವುದು ತೃಪ್ತಿ ನೀಡಿದೆ ಎಂದವರು ತಿಳಿಸಿದರು.

ರೋಹrಕ್‌ನ 18ರ ಹರೆಯದ ಪ್ರತಿಭೆ ರಿಂಕು ಜಾವೆಲಿನ್‌ ಎಫ್ 46 ವಿಭಾಗದಲ್ಲಿ ಉತ್ತಮ ನಿರ್ವಹಣೆ ನೀಡಿ ಗಮನ ಸೆಳೆದಿದ್ದರು. ರಿಯೋದಲ್ಲಿ ಐದನೇ ಸ್ಥಾನ ಪಡೆದಿದ್ದ ರಿಂಕು 55.12 ಮೀ. ದೂರ ಎಸೆದು ತನ್ನ ವೈಯಕ್ತಿಕ ಶ್ರೇಷ್ಠ ಸಾಧನೆಗೈದರೂ ಸ್ವಲ್ಪದರಲ್ಲಿ ಕಂಚು ಗೆಲ್ಲಲು ವಿಫ‌ಲರಾಗಿ ನಾಲ್ಕನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡರು. 

ಪದಕ ತಪ್ಪಿರುವುದು ನನ್ನ ದುರದೃಷ್ಟ. ಆದರೆ ಈ ಮಾಸಾಂತ್ಯದಲ್ಲಿ ಜೂನಿಯರ್‌ ವಿಶ್ವ ಸ್ಪರ್ಧೆ ನಡೆಯಲಿದೆ ಮತ್ತು ಅಲ್ಲಿ ವಿಶ್ವ ದಾಖಲೆ ಸ್ಥಾಪಿಸಲು ಪ್ರಯತ್ನಿಸುವೆ ಎಂದು ರಿಂಕು ಹೇಳಿದ್ದಾರೆ.