ಟಿ20:ನ್ಯೂಜಿಲ್ಯಾಂಡಿಗೆ 3ನೇ ಆಘಾತಪಾಕಿಸ್ಥಾನ ಕ್ಲೀನ್‌ ಸ್ವೀಪ್‌ ಸಾಧನೆ

Team Udayavani, Nov 6, 2018, 6:30 AM IST

ದುಬಾೖ: ನ್ಯೂಜಿಲ್ಯಾಂಡ್‌ ಎದುರಿನ ಟಿ20 ಸರಣಿಯಲ್ಲಿ ಪಾರಮ್ಯ ಮೆರೆದ ಪಾಕಿಸ್ಥಾನ 3 ಪಂದ್ಯಗಳ ಸರಣಿಯನ್ನು ಕ್ಲೀನ್‌ ಸ್ವೀಪ್‌ ಆಗಿ ವಶಪಡಿಸಿಕೊಂಡಿದೆ. ರವಿವಾರ ರಾತ್ರಿಯ ಅಂತಿಮ ಪಂದ್ಯವನ್ನು 47 ರನ್ನುಗಳಿಂದ ಗೆಲ್ಲುವ ಮೂಲಕ ಪಾಕ್‌ ಈ ಸಾಧನೆ ಮಾಡಿತು.

ಮೊದಲು ಬ್ಯಾಟಿಂಗ್‌ ನಡೆಸಿದ ಪಾಕಿಸ್ಥಾನ 3 ವಿಕೆಟಿಗೆ 166 ರನ್‌ ಪೇರಿಸಿದರೆ, ನ್ಯೂಜಿಲ್ಯಾಂಡ್‌ 16.5 ಓವರ್‌ಗಳಲ್ಲಿ 119 ರನ್ನಿಗೆ ಕುಸಿಯಿತು. 79 ರನ್‌ ಬಾರಿಸಿದ ಬಾಬರ್‌ ಆಜಂ ಪಂದ್ಯಶ್ರೇಷ್ಠ ಗೌರವಕ್ಕೆ ಪಾತ್ರರಾದರು (58 ಎಸೆತ, 7 ಬೌಂಡರಿ, 2 ಸಿಕ್ಸರ್‌). ಪಾಕ್‌ ಸರದಿಯಲ್ಲಿ ಮಿಂಚಿದ ಮತ್ತೂಬ್ಬ ಬ್ಯಾಟ್ಸ್‌ಮನ್‌ ಮೊಹಮ್ಮದ್‌ ಹಫೀಜ್‌ (ಅಜೇಯ 53). ಇವರಿಬ್ಬರು ಸೇರಿಕೊಂಡು ದ್ವಿತೀಯ ವಿಕೆಟಿಗೆ 94 ರನ್‌ ಪೇರಿಸಿದರು. ಹಫೀಜ್‌ಗೆ ಸರಣಿಶ್ರೇಷ್ಠ ಪ್ರಶಸ್ತಿ ಒಲಿಯಿತು.

ಚೇಸಿಂಗ್‌ ನಡೆಸಿದ ನ್ಯೂಜಿಲ್ಯಾಂಡ್‌ ಒಂದು ಹಂತದಲ್ಲಿ 2 ವಿಕೆಟಿಗೆ 96 ರನ್‌ ಗಳಿಸಿ ಸುಸ್ಥಿತಿಯಲ್ಲಿತ್ತು. ನಾಯಕ ಕೇನ್‌ ವಿಲಿಯಮ್ಸನ್‌ ಕ್ರೀಸ್‌ ಆಕ್ರಮಿಸಿಕೊಂಡಿದ್ದರು. ಆದರೆ 13ರಿಂದ ಮೊದಲ್ಗೊಂಡು 17ನೇ ಓವರ್‌ ತನಕ ಪ್ರತಿ ಓವರಿನಲ್ಲೂ ಎರಡೆರಡು ವಿಕೆಟ್‌ಗಳನ್ನು ಉದುರಿಸಿಕೊಳ್ಳುತ್ತಲೇ ಹೋದ ನ್ಯೂಜಿಲ್ಯಾಂಡ್‌ ಸೋಲಿನ ಪ್ರಪಾತಕ್ಕೆ ಜಾರಿತು. 23 ರನ್‌ ಅಂತರದಲ್ಲಿ ಕಿವೀಸ್‌ನ ಕೊನೆಯ 8 ವಿಕೆಟ್‌ ಹಾರಿಹೋಯಿತು!ಶಾಬಾದ್‌ ಖಾನ್‌ 3, ವಕಾಸ್‌ ಮಕ್ಸೂದ್‌ ಮತ್ತು ಇಮಾದ್‌ ವಾಸಿಮ್‌ ತಲಾ 2 ವಿಕೆಟ್‌ ಹಾರಿಸಿ ಕಿವೀಸ್‌ಗೆ ಕಂಟಕವಾದರು.