ಟಿ20 ಸರಣಿ: 2-0 ಗೆಲುವಿನ ನಿರೀಕ್ಷೆಯಲ್ಲಿ ಟೀಮ್‌ ಇಂಡಿಯಾ

Team Udayavani, Jun 29, 2018, 6:00 AM IST

ಡಬ್ಲಿನ್‌: ಆತಿಥೇಯ ಅಯರ್‌ಲ್ಯಾಂಡ್‌ ಎದುರಿನ ಮೊದಲ ಟಿ20 ಪಂದ್ಯವನ್ನು 76 ರನ್ನುಗಳ ಅಂತರದಿಂದ ಗೆದ್ದ ಭಾರತ ತಂಡ, ಶುಕ್ರವಾರದ 2ನೇ ಹಾಗೂ ಕೊನೆಯ ಪಂದ್ಯ ವನ್ನೂ ಗೆದ್ದು ಸರಣಿಯನ್ನು ಕ್ಲೀನ್‌ಸ್ವೀಪ್‌ ಆಗಿ ವಶ ಪಡಿಸಿಕೊಳ್ಳುವ ಯೋಜನೆಯಲ್ಲಿದೆ.

ಬುಧವಾರ ರಾತ್ರಿ ರೋಹಿತ್‌ ಶರ್ಮ (97) ಹಾಗೂ ಶಿಖರ್‌ ಧವನ್‌ (74) ಜೋಡಿಯ ಆಕರ್ಷಕ ಆಟದ ನೆರವಿನಿಂದ ಭಾರತ 5 ವಿಕೆಟಿಗೆ 208 ರನ್‌ ಪೇರಿಸಿ ಸವಾಲೊಡ್ಡಿತ್ತು. ಜವಾಬಿತ್ತ ಅಯರ್‌ಲ್ಯಾಂಡ್‌ 9ಕ್ಕೆ 132 ರನ್‌ ಮಾತ್ರ ಗಳಿಸಿತ್ತು. ಸ್ಪಿನ್ನರ್‌ಗಳಾದ ಕುಲದೀಪ್‌ ಯಾದವ್‌ (21ಕ್ಕೆ 4) ಹಾಗೂ ಯಜುವೇಂದ್ರ ಚಾಹಲ್‌ (38ಕ್ಕೆ 3) ಘಾತಕ ದಾಳಿ ಮೂಲಕ ಅಯರ್‌ಲ್ಯಾಂಡಿನ ದಿಕ್ಕು ತಪ್ಪಿಸಿದ್ದರು. ಭಾರತದ ದಾಳಿಯನ್ನು ತಡೆದು ನಿಂತ ಏಕೈಕ ಐರಿಷ್‌ ಆಟಗಾರನೆಂದರೆ ಆರಂಭಕಾರ ಜೇಮ್ಸ್‌ ಶಾನನ್‌. ಅವರು 35 ಎಸೆತಗಳಿಂದ 60 ರನ್‌ ಹೊಡೆದರು. 

ಶುಕ್ರವಾರದ ಪಂದ್ಯಕ್ಕಾಗಿ ಭಾರತ ತಂಡದಲ್ಲಿ ಕೆಲವು ಬದಲಾವಣೆಗಳಾಗುವ ಸಾಧ್ಯತೆ ಇದೆ. ರಾಹುಲ್‌, ಕಾರ್ತಿಕ್‌, ಉಮೇಶ್‌ ಯಾದವ್‌ ಅವರು ಆಡುವ ಬಳಗದಲ್ಲಿ ಕಾಣಿಸಿ ಕೊಳ್ಳಬಹುದು. 

ಭಾರತ-ಇಂಗ್ಲೆಂಡ್‌ ಸರಣಿ
ಈ ಸರಣಿ ಬಳಿಕ ಭಾರತ-ಇಂಗ್ಲೆಂಡ್‌ 3 ಪಂದ್ಯಗಳ ಟಿ20 ಸರಣಿಯಲ್ಲಿ ಸೆಣಸಲಿವೆ. ಮೊದಲ ಪಂದ್ಯ ಜು. 3ರಂದು ನಡೆಯಲಿದೆ.