ಏಕೈಕ ಟಿ20: ಆಸ್ಟ್ರೇಲಿಯಕ್ಕೆ ಸೋಲು

Team Udayavani, Nov 18, 2018, 6:40 AM IST

ಕಾರ್ರಾರ (ಕ್ವೀನ್ಸ್‌ಲ್ಯಾಂಡ್‌): ಮಳೆಯಿಂದಾಗಿ 10 ಓವರ್‌ಗಳಿಗೆ ಸೀಮಿತಗೊಂಡ ಸರಣಿಯ ಏಕೈಕ ಟಿ20 ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ 21 ರನ್ನುಗಳಿಂದ ಆತಿಥೇಯ ಆಸ್ಟ್ರೇಲಿಯವನ್ನು ಮಣಿಸಿದೆ.

“ಕಾರ್ರಾರ ಓವಲ್‌’ನಲ್ಲಿ ನಡೆದ ಈ ಪಂದ್ಯಕ್ಕೆ ಆರಂಭದಲ್ಲೇ ಮಳೆಯಿಂದ ಅಡಚಣೆಯಾಗಿತ್ತು. ಮೊದಲು ಬ್ಯಾಟಿಂಗ್‌ ನಡೆಸಿದ ದಕ್ಷಿಣ ಆಫ್ರಿಕಾ 8 ವಿಕೆಟಿಗೆ 108 ರನ್‌ ಪೇರಿಸಿದರೆ, ಜವಾಬಿತ್ತ ಆಸ್ಟ್ರೇಲಿಯಕ್ಕೆ ಗಳಿಸಲು ಸಾಧ್ಯವಾದದ್ದು 7ಕ್ಕೆ 87 ರನ್‌ ಮಾತ್ರ. ಎನ್‌ಗಿಡಿ, ಮಾರಿಸ್‌ ಮತ್ತು ಫೆಲುಕ್ವಾಯೊ ತಲಾ 2 ವಿಕೆಟ್‌ ಹಾರಿಸಿ ಕಾಂಗರೂಗಳಿಗೆ ಕಂಟಕವಾಗಿ ಪರಿಣಮಿಸಿದರು. ಮ್ಯಾಕ್ಸ್‌ವೆಲ್‌ ಅವರಿಂದ ಪಂದ್ಯದಲ್ಲೇ ಸರ್ವಾಧಿಕ 38 ರನ್‌ ದಾಖಲಾಯಿತು.

ಆಫ್ರಿಕಾ ಸರದಿಯಲ್ಲಿ ಡು ಪ್ಲೆಸಿಸ್‌ 27, ಡಿ ಕಾಕ್‌ 22 ರನ್‌ ಹೊಡೆದರು.