ಟಿ20 ವಿಶ್ವಕಪ್‌: ಆಸೀಸ್‌ ಬಲಿಷ್ಠ ತಂಡ

Team Udayavani, Aug 20, 2021, 7:05 AM IST

ಮೆಲ್ಬರ್ನ್: ಸ್ಟಾರ್‌ ಆಟಗಾರರೆಲ್ಲ ಮರಳುವುದ ರೊಂದಿಗೆ ಮುಂಬರುವ ಟಿ20 ವಿಶ್ವಕಪ್‌ ಕ್ರಿಕೆಟ್‌ ಪಂದ್ಯಾ ವಳಿಗೆ ಆಸ್ಟ್ರೇಲಿಯದ ಬಲಿಷ್ಠ ತಂಡವೊಂದು ಸಜ್ಜುಗೊಂಡಿದೆ. ಆರನ್‌ ಫಿಂಚ್‌ ಈ ತಂಡವನ್ನು ಮುನ್ನಡೆಸಲಿದ್ದಾರೆ.

ಇತ್ತೀಚಿನ ವೆಸ್ಟ್‌ ಇಂಡೀಸ್‌ ಮತ್ತು ಬಾಂಗ್ಲಾದೇಶ ಪ್ರವಾಸದಿಂದ ಹೊರಗುಳಿದಿದ್ದ ಕಮಿನ್ಸ್‌, ವಾರ್ನರ್‌, ಸ್ಟೋಯಿನಿಸ್‌, ಮ್ಯಾಕ್ಸ್‌ವೆಲ್‌ ಅವರೆಲ್ಲ ತಂಡಕ್ಕೆ ಮರಳಿದ್ದಾರೆ. ಮಣಿಗಂಟಿನ ನೋವಿನಿಂದ ಚೇತರಿಸಿಕೊಳ್ಳುತ್ತಿರುವ ಸ್ಟೀವನ್‌ ಸ್ಮಿತ್‌ ಕೂಡ ಅವಕಾಶ ಪಡೆದಿದ್ದಾರೆ. ನಾಯಕ ಫಿಂಚ್‌ ಮಂಡಿ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದು, ವಿಶ್ವಕಪ್‌ ವೇಳೆ ಸಂಪೂರ್ಣ ಚೇತರಿಸಿಕೊಳ್ಳಲಿದ್ದಾರೆ ಎಂಬ ವಿಶ್ವಾಸ ಕ್ರಿಕೆಟ್‌ ಆಸ್ಟ್ರೇಲಿಯದ್ದು.

ಕ್ಯಾರಿಗೆ ಜಾಗ ಇಲ್ಲ! :

ತಂಡದ ಏಕೈಕ ಅಚ್ಚರಿಯೆಂದರೆ, ಅನುಭವಿ ವಿಕೆಟ್‌ ಕೀಪರ್‌ ಅಲೆಕ್ಸ್‌ ಕ್ಯಾರಿ ಅವರನ್ನು ಕೈಬಿಟ್ಟು ಇನ್ನೂ ಅಂತಾರಾಷ್ಟ್ರೀಯ ಪಂದ್ಯವಾಡದ ಜೋಶ್‌ ಇಂಗ್ಲಿಸ್‌ ಅವರಿಗೆ ಅವಕಾಶ ನೀಡಿದ್ದು. ಕ್ಯಾರಿ ಕಳೆದ ವಿಂಡೀಸ್‌ ಪ್ರವಾಸದ ವೇಳೆ ಆಸೀಸ್‌ ಏಕದಿನ ತಂಡದ ನಾಯಕರೂ ಆಗಿದ್ದರು.

ತ್ರಿವಳಿ ಸ್ಪಿನ್‌ ದಾಳಿಯನ್ನು ನೆಚ್ಚಿಕೊಂಡ ಆಸ್ಟ್ರೇಲಿಯ, ಅಗರ್‌ ಮತ್ತು ಝಂಪ ಜತೆಗೆ ಲೆಗ್‌ಸ್ಪಿನ್ನರ್‌ ಮಿಚೆಲ್‌ ಸ್ವೆಪ್ಸನ್‌ ಅವರನ್ನೂ ಸೇರಿಸಿಕೊಂಡಿದೆ.

ಬಾಂಗ್ಲಾದೇಶ ವಿರುದ್ಧ ಪದಾರ್ಪಣ ಪಂದ್ಯದಲ್ಲೇ ಹ್ಯಾಟ್ರಿಕ್‌ ಸಾಧಿಸಿದ ನಥನ್‌ ಎಲ್ಲಿಸ್‌ ಮೂವರು ಮೀಸಲು ಕ್ರಿಕೆಟಿಗರಲ್ಲಿ ಒಬ್ಬರಾಗಿದ್ದಾರೆ.

ಆಸ್ಟ್ರೇಲಿಯ ತನ್ನ ಮೊದಲ ಪಂದ್ಯವನ್ನು ಅ. 23ರಂದು ದಕ್ಷಿಣ ಆಫ್ರಿಕಾ ವಿರುದ್ಧ ಆಡಲಿದೆ.

ಆಸ್ಟ್ರೇಲಿಯ ತಂಡ :

ಆರನ್‌ ಫಿಂಚ್‌ (ನಾಯಕ), ಡೇವಿಡ್‌ ವಾರ್ನರ್‌, ಮಿಚೆಲ್‌ ಮಾರ್ಷ್‌, ಸ್ಟೀವನ್‌ ಸ್ಮಿತ್‌, ಗ್ಲೆನ್‌ ಮ್ಯಾಕ್ಸ್‌ ವೆಲ್‌, ಮಾರ್ಕಸ್‌ ಸ್ಟೋಯಿನಿಸ್‌, ಮ್ಯಾಥ್ಯೂ ವೇಡ್‌, ಜೋಶ್‌ ಇಂಗ್ಲಿಸ್‌, ಮಿಚೆಲ್‌ ಸ್ಟಾರ್ಕ್‌, ಆ್ಯಶrನ್‌ ಅಗರ್‌, ಪ್ಯಾಟ್‌ ಕಮಿನ್ಸ್‌, ಜೋಶ್‌ ಹ್ಯಾಝಲ್‌ವುಡ್‌, ಕೇನ್‌ ರಿಚರ್ಡ್‌ಸನ್‌, ಆ್ಯಡಂ ಝಂಪ, ಮಿಚೆಲ್‌ ಸ್ವೆಪ್ಸನ್‌.

ಮೀಸಲು ಆಟಗಾರರು: ಡೇನಿಯಲ್‌ ಕ್ರಿಸ್ಟಿಯನ್‌, ಡೇನಿಯಲ್‌ ಸ್ಯಾಮ್ಸ್‌, ನಥನ್‌ ಎಲ್ಲಿಸ್‌.