T20 World Cup: ಬಲಿಷ್ಠ ಹರಿಣಗಳಿಗೆ ಸೋಲಿನ ಭೀತಿ ತೋರಿಸಿ ಗೆಲುವು ಕೈಚೆಲ್ಲಿದ ನೇಪಾಳ

Team Udayavani, Jun 15, 2024, 10:35 AM IST

ಕಿಂಗ್ಸ್ ಟೌನ್: ಈಗಾಗಲೇ ಸೂಪರ್ 8 ಹಂತಕ್ಕೇರಿ, ಗುಂಪು ಹಂತದ ಕೊನೆಯ ಪಂದ್ಯದಲ್ಲಿ ಸುಲಭ ಗೆಲುವಿನ ಆಸೆಯಲ್ಲಿದ್ದ ದಕ್ಷಿಣ ಆಫ್ರಿಕಾ ತಂಡಕ್ಕೆ ನೇಪಾಳ ಸೋಲಿನ ಭೀತಿ ಹುಟ್ಟಿಸಿದೆ. ಇಂದು ಬೆಳಗ್ಗೆ ನಡೆದ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ತಂಡವು ಕೇವಲ ಒಂದು ರನ್ ಅಂತರದಿಂದ ನೇಪಾಳ ವಿರುದ್ದ ಗೆದ್ದು ನಿಟ್ಟುಸಿರು ಬಿಟ್ಟಿದೆ.

ಕಿಂಗ್ಸ್ ಟೌನ್ ನಲ್ಲಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ದ.ಆಫ್ರಿಕಾ ಏಳು ವಿಕೆಟ್ ನಷ್ಟಕ್ಕೆ 115 ರನ್ ಗಳಿಸಿದರೆ, ನೇಪಾಳ ಏಳು ವಿಕೆಟ್ ಕಳೆದುಕೊಂಡು 114 ರನ್ ಗಳಿಸಿತು. ಕೊನೆಯ ಎಸೆತದಲ್ಲಿ ರನೌಟ್ ಮಾಡುವ ಮೂಲಕ ದಕ್ಷಿಣ ಆಫ್ರಿಕಾ ಸಮಾಧಾನದ ಉಸಿರು ಚೆಲ್ಲಿತು.

ಮೊದಲು ಬ್ಯಾಟಿಂಗ್ ಮಾಡಿ ಆಫ್ರಿಕಾಗೆ ರೀಜಾ ಹೆಂಡ್ರಿಕ್ಸ್ ಮತ್ತು ಟ್ರಿಸ್ಟನ್ ಸ್ಟಬ್ಸ್ ನೆರವು ನೀಡಿದರು. ರೀಜಾ 43 ರನ್ ಮಾಡಿದರೆ, ಸ್ಟಬ್ಸ್ ಅಜೇಯ 27 ರನ್ ಗಳಿಸಿದರು. ನೇಪಾಳ ಪರ ಕುಶಾಲ್ ಬುರ್ತೆಲ್ ನಾಲ್ಕು ವಿಕೆಟ್ ಪಡೆದರೆ, ದೀಪೆಂದ್ರ ಸಿಂಗ್ ಮೂರು ವಿಕೆಟ್ ಕಿತ್ತರು.

ನೇಪಾಳ ಪರ ಬ್ಯಾಟಿಂಗ್ ನಲ್ಲಿ ಆಸಿಫ್ ಶೇಕ್ ಮತ್ತು ಅನಿಲ್ ಶಾ ನೆರವಾದರು. ಶೇಕ್ 42 ರನ್ ಮಾಡಿದರೆ, ಶಾ 27 ರನ್ ಗಳಿಸಿದರು. ಕೊನೆಯ ಎಸೆತದಲ್ಲಿ ಗೆಲುವಿಗೆ ಎರಡು ರನ್ ಬೇಕಾಗಿದ್ದಾಗ ಒಂದು ರನ್ ಓಡುವ ವೇಳೆ ಬ್ಯಾಟರ್ ಗುಲ್ಶನ್ ಝಾ ರನೌಟಾದರು. ಈ ಮೂಲಕ ಒಂದು ರನ್ ನಿಂದ ನೇಪಾಳ ಸೋಲು ಕಂಡಿತು.

ದಕ್ಷಿಣ ಆಫ್ರಿಕಾ ಪರ ತಬ್ರೈಜ್ ಶಮ್ಸಿ ನಾಲ್ಕು ವಿಕೆಟ್ ಪಡೆದರು. ಮತ್ತು ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರು.