Test; ದಕ್ಷಿಣ ಆಫ್ರಿಕಾ ಎದುರು ನಿಕೃಷ್ಟ ಮೊತ್ತಕ್ಕೆ ಶ್ರೀಲಂಕಾ ಆಲೌಟ್‌

Team Udayavani, Nov 29, 2024, 6:10 AM IST

ಡರ್ಬಾನ್‌: ದಕ್ಷಿಣ ಆಫ್ರಿಕಾ ತಂಡದೆದುರಿನ ಮೊದಲ ಟೆಸ್ಟ್‌ ಪಂದ್ಯ ದಲ್ಲಿ ಶ್ರೀಲಂಕಾ ತಂಡವು ಕೇವಲ 42 ರನ್ನಿಗೆ ಆಲೌಟಾಗಿದೆ. ಇದು ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಶ್ರೀಲಂಕಾದ ನಿಕೃಷ್ಟ ಮೊತ್ತವಾಗಿದೆ.

ಈ ಮೊದಲು ಬ್ಯಾಟಿಂಗ್‌ ನಡೆಸಿದ್ದ ದಕ್ಷಿಣ ಆಫ್ರಿಕಾ 191 ರನ್‌ ಗಳಿಸಿ ಆಲೌಟಾಗಿತ್ತು. ದ್ವಿತೀಯ ಇನ್ನಿಂಗ್ಸ್‌ ಆರಂಭಿಸಿರುವ ದಕ್ಷಿಣ ಆಫ್ರಿಕಾ ಮೂರು ವಿಕೆಟಿಗೆ 134 ರನ್‌ ಗಳಿಸಿ ಆಡುತ್ತಿದೆ. ಒಟ್ಟಾರೆ 263 ರನ್‌ ಮುನ್ನಡೆ ಸಾಧಿಸಿದೆ.

ಶ್ರೀಲಂಕಾದ ಇನ್ನಿಂಗ್ಸ್‌ ಮುಗಿಸಲು ದಕ್ಷಿಣ ಆಫ್ರಿಕಾಕ್ಕೆ 83 ಎಸೆತ ಸಾಕಾಗಿತ್ತು. ಕಳೆದ ನೂರು ವರ್ಷಗಳಲ್ಲಿ ಎಸೆತಗಳ ಸಂಖ್ಯೆಯಲ್ಲಿ ಇದು ಕೂಡ ಕಡಿಮೆ ಸಂಖ್ಯೆಯಾಗಿದೆ. 1924ರಲ್ಲಿ ಇಂಗ್ಲೆಂಡ್‌ ತಂಡವು ದಕ್ಷಿಣ ಆಫ್ರಿಕಾವನ್ನು 75 ಎಸೆತಗಳಲ್ಲಿ ಆಲೌಟ್‌ ಮಾಡಿಸಿತ್ತು.

ಮಧ್ಯಮ ವೇಗಿ ಮಾರ್ಕೊ ಜಾನ್ಸೆನ್‌ ಅವರ ದಾಳಿಗೆ ತತ್ತರಿಸಿದ ಶ್ರೀಲಂಕಾ 13.5 ಓವರ್‌ಗಳಲ್ಲಿ 42 ರನ್ನಿಗೆ ಸರ್ವಪತನ ಕಂಡಿತು. 20 ವರ್ಷಗಳ ಹಿಂದೆ ಕ್ಯಾಂಡಿಯಲ್ಲಿ ಪಾಕಿಸ್ಥಾನ ವಿರುದ್ಧ 71 ರನ್ನಿಗೆ ಆಲೌಟ್‌ ಆಗಿರುವುದು ಶ್ರೀಲಂಕಾದ ಈ ಹಿಂದಿನ ನಿಕೃಷ್ಟ ಮೊತ್ತವಾಗಿತ್ತು. ಜಾನ್ಸೆನ್‌ ಕೇವಲ 6.5 ಓವರ್‌ಗಳಲ್ಲಿ 13 ರನ್ನಿಗೆ 7 ವಿಕೆಟ್‌ ಉರುಳಿಸಿದ್ದರು. ಇದು ಅವರ ಜೀವನಶ್ರೇಷ್ಠ ನಿರ್ವಹಣೆಯಾಗಿದೆ. ಏಳು ಓವರ್‌ ಒಳಗಡೆ ಏಳು ವಿಕೆಟ್‌ ಕಿತ್ತ ಎರಡನೆ ಬೌಲರ್‌ ಎಂಬ ಗೌರವಕ್ಕೆ ಜಾನ್ಸೆನ್‌ ಪಾತ್ರರಾಗಿದ್ದಾರೆ. 1904ರಲ್ಲಿ ಆಸ್ಟ್ರೇಲಿಯದ ಹಗ್‌ ಟ್ರಂಬಲ್‌ ಮೊದಲ ಬೌಲರ್‌ ಆಗಿದ್ದರು.