ವಿಶ್ವ ಹಾಕಿ ಲೀಗ್‌ನಲ್ಲಿ ಭಾರತ ವಿರುದ್ಧ ಪಿತೂರಿ: ತನಿಖೆಗೆ ಆದೇಶ

Team Udayavani, Jul 8, 2017, 2:50 AM IST

ನವದೆಹಲಿ: ಜೂನ್‌ ತಿಂಗಳಲ್ಲಿ ಇಂಗ್ಲೆಂಡ್‌ನ‌ಲ್ಲಿ ವಿಶ್ವ ಹಾಕಿ ಲೀಗ್‌ ಸೆಮಿಫೈನಲ್‌ ಕೂಟ ನಡೆದಿತ್ತು. ಈ ವೇಳೆ ಭಾರತ ತಂಡದ ವಿರುದ್ಧ ಪಿತೂರಿ ನಡೆದಿತ್ತು ಎಂದು ಭಾರತ ಹಾಕಿ ಮಂಡಳಿ ಆರೋಪಿಸಿದೆ. 

ಜೂ.19ರಂದು ನಡೆದ ಪಾಕ್‌ ವಿರುದ್ಧ ಪಂದ್ಯಕ್ಕೂ ಮುನ್ನ ಭಾರತದ ಮುಖ್ಯ ಆಟಗಾರ ಸರ್ದಾರ್‌ ಸಿಂಗ್‌ರನ್ನು ಅತ್ಯಾಚಾರ ಆರೋಪದಡಿ ವಿಚಾರಣೆ ನಡೆಸಲು ಯಾರ್ಕ್‌ಶೈರ್‌ ಪೊಲೀಸರು ತೀರ್ಮಾನಿಸಿದ್ದರು. ಇದು ಉದ್ದೇಶಪೂರ್ವಕ ಎನ್ನುವುದು ಹಾಕಿ ಇಂಡಿಯಾದ ಆರೋಪ. ಈ ಕುರಿತಂತೆ ದೂರು ಸ್ವೀಕರಿಸಿರುವ ಅಂತಾರಾಷ್ಟ್ರೀಯ ಹಾಕಿ ಮಂಡಳಿ ಎಫ್ಐಎಚ್‌, ತನಿಖೆ ಮಾಡಲು ಇಂಗ್ಲೆಂಡ್‌ ಪೊಲೀಸರಿಗೆ ಸೂಚಿಸಿದೆ.

“ಸರ್ದಾರ್‌ ವಿಚಾರಣೆ ವೇಳೆ ಇಂಗ್ಲೆಂಡ್‌ ಪೊಲೀಸರು ಶಿಷ್ಟಾಚಾರ ಪಾಲಿಸಲಿಲ್ಲ. ಇದು ಭಾರತವನ್ನು ಮಾನಸಿಕವಾಗಿ ಧೃತಿ ಗೆಡಿಸಲೆಂದೇ ಮಾಡಿದ ತೀರ್ಮಾನ. ಇದರ ಪರಿಣಾಮ ಭಾರತ ಮುಂದಿನ ಮೂರೂ ಪಂದ್ಯಗಳನ್ನು ಸೋತು ಹೋಯಿತು’ ಎಂದು ಹಾಕಿ ಇಂಡಿಯಾ ಹೇಳಿದೆ.

ಅಲ್ಲದೇ ಪಾಕಿಸ್ತಾನ ಮೂಲದ ಇಂಗ್ಲೆಂಡ್‌ ಸಂಸದರೊಬ್ಬರು ಸರ್ದಾರ್‌ ವಿರುದ್ಧ ದೂರು ನೀಡುವಂತೆ ಇಂಗ್ಲೆಂಡ್‌ ಹಾಕಿ ಆಟಗಾರ್ತಿಯನ್ನು ಪ್ರಚೋದಿಸಿದರು. ಅದರ ಪರಿಣಾಮವೇ ಈ ದಿಢೀರ್‌ ಬೆಳವಣಿಗೆ ನಡೆಯಿತು ಎಂದು ಭಾರತ ತಂಡ ವ್ಯವಸ್ಥಾಪಕ ಜುಗ್ರಾಜ್‌ ಹೇಳಿದ್ದಾರೆ.