ICC World Cup 2023: ಯಾರಿಗೆ ಸಿಗಲಿದೆ ಸರಣಿ ಶ್ರೇಷ್ಠ ಪ್ರಶಸ್ತಿ? ಇಲ್ಲಿದೆ 9 ಜನರ ಪಟ್ಟಿ

Team Udayavani, Nov 18, 2023, 3:20 PM IST

The ICC unveiled nine nominees for the Player of the Tournament award

ಅಹಮದಾಬಾದ್: ಅತ್ಯಂತ ಯಶಸ್ವಿಯಾಗಿ ಸಾಗಿದ ಐಸಿಸಿ ಏಕದಿನ ಕ್ರಿಕೆಟ್ ವಿಶ್ವಕಪ್ 2023 ಕೂಟ ಇದೀಗ ಅಂತಿಮ ಘಟ್ಟ ತಲುಪಿದೆ. ಭಾನುವಾರ ನಡೆಯಲಿರುವ ಫೈನಲ್ ಪಂದ್ಯದಲ್ಲಿ ಭಾರತ ಮತ್ತು ಆಸ್ಟ್ರೇಲಿಯಾ ತಂಡಗಳು ಮುಖಾಮುಖಿಯಾಗಲಿದೆ. ಅಹಮದಾಬಾದ್ ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಈ ಪಂದ್ಯ ನಡೆಯಲಿದೆ.

ಹಲವಾರು ಆಟಗಾರರು ಈ ಬಾರಿ ಕೂಟದುದ್ದಕ್ಕೂ ಉತ್ತಮ ಪ್ರದರ್ಶನ ನೀಡುತ್ತಾ ಬಂದಿದ್ದಾರೆ. ವಿರಾಟ್ ಕೊಹ್ಲಿ, ಕ್ವಿಂಟನ್ ಡಿಕಾಕ್, ಮೊಹಮ್ಮದ್ ಶಮಿಯಂತಹ ಹಿರಿಯರು ಮತ್ತು ರಚಿನ್ ರವೀಂದ್ರರಂತಹ ಹೊಸ ಹುರುಪಿನ ಆಟಗಾರರು ಈ ಬಾರಿಯ ಟೂರ್ನಮೆಂಟ್ ನ ಉದ್ದಕ್ಕೂ ಉತ್ತಮ ಪ್ರದರ್ಶನ ನೀಡುತ್ತಾ ಬಂದಿದ್ದಾರೆ.

ಇದೀಗ ಸರಣಿಶ್ರೇಷ್ಠ ಪ್ರಶಸ್ತಿಗೆ ಒಂಬತ್ತು ಜನರ ಅಂತಿಮ ಪಟ್ಟಿಯನ್ನು ಐಸಿಸಿ ಇಂದು ಬಿಡುಗಡೆ ಮಾಡಿದೆ. ವಿಶೇಷವೆಂದರೆ ಫೈನಲ್ ನಲ್ಲಿ ಸ್ಥಾನ ಪಡೆದಿರುವ ಭಾರತದ ನಾಲ್ವರು ಸರಣಿ ಶ್ರೇಷ್ಠ ಪ್ರಶಸ್ತಿ ಗೆಲ್ಲುವ ರೇಸ್ ನಲ್ಲಿದ್ದಾರೆ.

1 ವಿರಾಟ್ ಕೊಹ್ಲಿ: ಇತ್ತೀಚೆಗಷ್ಟೇ ಏಕದಿನ ಕ್ರಿಕೆಟ್ ನಲ್ಲಿ 50 ಶತಕಗಳ ದಾಖಲೆ ಬರೆದ ವಿರಾಟ್ ಕೊಹ್ಲಿ ಈ ಬಾರಿಯ ಕೂಟದಲ್ಲಿ ಅತೀ ಹೆಚ್ಚು ರನ್ ಗಳಿಸಿದ ದಾಖಲೆ ಹೊಂದಿದ್ದಾರೆ. 711 ರನ್ ಗಳಿಸಿರುವ ವಿರಾಟ್ ಪ್ರಶಸ್ತಿ ಗೆಲ್ಲುವ ನೆಚ್ಚಿನ ಸ್ಪರ್ಧಿ.

2 ಆ್ಯಡಂ ಜಂಪಾ: ಆಸೀಸ್ ಸ್ಪಿನ್ನರ್ ಆ್ಯಂಡ ಜಂಪಾ ಅವರು ಈ ಬಾರಿ ಉತ್ತಮ ಬೌಲಿಂಗ್ ನಿಂದ ತಂಡಕ್ಕೆ ನೆರವಾದವರು. 22 ವಿಕೆಟ್ ಕಬಳಿಸಿರುವ ಜಂಪಾ ರೇಸ್ ನಲ್ಲಿದ್ದಾರೆ.

3 ಕ್ವಿಂಟನ್ ಡಿಕಾಕ್: ಇತ್ತೀಚೆಗಷ್ಟೇ ಕ್ರಿಕೆಟ್ ಗೆ ವಿದಾಯ ಹೇಳಿದ ಕ್ವಿಂಟನ್ ಡಿಕಾಕ್ ತನ್ನ ಕೊನೆಯ ಟೂರ್ನಮೆಂಟ್ ನಲ್ಲಿ ಅದ್ಭುತ ಪ್ರದರ್ಶನ ನೀಡಿದ್ದಾರೆ. ಸೆಮಿ ಫೈನಲ್ ನಲ್ಲಿ ಅಂತ್ಯವಾದ ದಕ್ಷಿಣ ಆಫ್ರಿಕಾದ ಅಭಿಯಾನದಲ್ಲಿ ಡಿಕಾಕ್ 594 ರನ್ ಗಳಿಸಿದ್ದಾರೆ.

4 ಮೊಹಮ್ಮದ್ ಶಮಿ: ಭಾರತದ ಬೌಲಿಂಗ್ ಶಮಿ ಅವರು ನಿಸ್ಸಂದೇಹವಾಗಿ ಈ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ. ಮೊದಲ ಮೂರು ಪಂದ್ಯದಲ್ಲಿ ಆಡುವ ಅವಕಾಶ ಪಡೆಯದ ಶಮಿ ಸದ್ಯ ಕೂಟದಲ್ಲಿ ಅತೀ ಹೆಚ್ಚು ವಿಕೆಟ್ ಪಡೆದ ಬೌಲರ್. 23 ವಿಕೆಟ್ ನೊಂದಿಗೆ ಶಮಿ ಈ ರೇಸ್ ನಲ್ಲಿದ್ದಾರೆ.

5 ರಚಿನ್ ರವೀಂದ್ರ: ನ್ಯೂಜಿಲ್ಯಾಂಡ್ ನ ಹೊಸ ಬ್ಯಾಟಿಂಗ್ ಸೆನ್ಸೇಶನ್ ರಚಿನ್ ರವೀಂದ್ರ ಅವರು ಈ ಕೂಟದ ಅಚ್ಚರಿ. 578 ರನ್ ಗಳಿಸಿರುವ ಎಡಗೈ ಬ್ಯಾಟರ್ ರಚಿನ್ ಅವರು ಬೌಲಿಂಗ್ ನಲ್ಲಿ ಐದು ವಿಕೆಟ್ ಪಡೆದಿದ್ದಾರೆ.

6 ಗ್ಲೆನ್ ಮ್ಯಾಕ್ಸವೆಲ್: ವಿಶ್ವಕಪ್ ಇತಿಹಾಸದಲ್ಲಿಯೇ ಅತ್ಯಂತ ಶ್ರೇಷ್ಠ ಇನ್ನಿಂಗ್ಸ್ ಗಳಲ್ಲಿ ಒಂದನ್ನು ಆಡಿದ ಮ್ಯಾಕ್ಸವೆಲ್ ಕೂಟದಲ್ಲಿ 398 ರನ್ ಗಳಿಸಿದ್ದಾರೆ. ಇದರೊಂದಿಗೆ ಐದು ವಿಕೆಟ್ ಕೂಡಾ ಕಬಳಿಸಿದ್ದಾರೆ.

7 ರೋಹಿತ್ ಶರ್ಮಾ: ಟೀಂ ಇಂಡಿಯಾ ನಾಯಕ ರೋಹಿತ್ ಶರ್ಮಾ ಅವರು ಈ ಕೂಟದಲ್ಲಿ ಅದ್ಭುತ ವೇಗದ ಬ್ಯಾಟಿಂಗ್ ನಿಂದ ನೆರವಾದವರು. ಒಂದು ಶತಕ ಮೂರು ಅರ್ಧಶತಕ ಬಾರಿಸಿರುವ ರೋಹಿತ್ ಶರ್ಮಾ 550 ರನ್ ಗಳಿಸಿದ್ದಾರೆ.

8 ಜಸ್ಪ್ರೀತ್ ಬುಮ್ರಾ: ಟೀಂ ಇಂಡಿಯಾದ ವೇಗದ ಬೌಲಿಂಗ್ ವಿಭಾಗದ ಸಾರಥಿ ಜಸ್ಪ್ರೀತ್ ಬುಮ್ರಾ ಅವರು ಈ ಬಾರಿಯ ಕೂಟದಲ್ಲಿ 18 ವಿಕೆಟ್ ಪಡೆದಿದ್ದಾರೆ. ಉತ್ತಮ ಎಕಾನಮಿ ಮೂಲಕ ಬುಮ್ರಾ ಸರಣಿ ಶ್ರೇಷ್ಠ ಪ್ರಶಸ್ತಿ ರೇಸ್ ನಲ್ಲಿದ್ದಾರೆ.

9 ಡ್ಯಾರೆಲ್ ಮೆಚೆಲ್: ನ್ಯೂಜಿಲ್ಯಾಂಡ್ ನ ಈ ಬಲಗೈ ಆಟಗಾರ ಕೂಟದಲ್ಲಿ 552 ರನ್ ಗಳಿಸಿದ್ದಾರೆ. ಕೂಟದಲ್ಲಿ ಎರಡು ಶತಕ ಸಿಡಿಸಿರುವ ಮಿಚೆಲ್ ಸರಣಿ ಶ್ರೇಷ್ಠ ಪ್ರಶಸ್ತಿಯ ರೇಸ್ ನಲ್ಲಿದ್ದಾರೆ.