ಟಾಪ್‌ ಸೀಡ್‌ ಓಪನ್‌ ಟೆನಿಸ್‌; ಜೆನ್ನಿಫ‌ರ್‌ ಬ್ರಾಡಿಗೆ ಮೊದಲ ಪ್ರಶಸ್ತಿ

Team Udayavani, Aug 17, 2020, 7:52 PM IST

ಲೆಕ್ಸಿಂಗ್ಟನ್‌ (ಕೆಂಟುಕಿ): ಅಮೆರಿಕದ ಜೆನ್ನಿಫ‌ರ್‌ ಬ್ರಾಡಿ ಮೊದಲ ಬಾರಿಗೆ ಡಬ್ಲ್ಯುಟಿಎ ಪ್ರಶಸ್ತಿಯೊಂದನ್ನೆತ್ತಿ ಸಂಭ್ರಮಿಸಿದ್ದಾರೆ. ಕಳೆದ ರಾತ್ರಿ ನಡೆದ “ಟಾಪ್‌ ಸೀಡ್‌ ಓಪನ್‌’ ಟೆನಿಸ್‌ ಪಂದ್ಯಾವಳಿಯ ಫೈನಲ್‌ನಲ್ಲಿ ಅವರು ಸ್ವಿಜರ್‌ಲ್ಯಾಂಡಿನ ಜಿಲ್‌ ಟೀಶ್ಮನ್‌ ವಿರುದ್ಧ 6-3, 6-4 ನೇರ ಸೆಟ್‌ಗಳ ಜಯ ಸಾಧಿಸಿದರು.

ಇದು ಕೋವಿಡ್ ಕಾಲದಲ್ಲಿ ನಡೆದ ಮೊದಲ ಡಬ್ಲ್ಯುಟಿಎ ಟೆನಿಸ್‌ ಪಂದ್ಯಾವಳಿಯಾಗಿದೆ. ಇದು ಯಶಸ್ವಿಯಾಗಿ ನಡೆದದ್ದು ಮುಂಬರುವ ಯುಎಸ್‌ ಓಪನ್‌ ಟೆನಿಸ್‌ ಪಂದ್ಯಾವಳಿಗೊಂದು ಸ್ಫೂರ್ತಿಯಾಗಲಿದೆ ಎಂದು ಸಂಘಟಕರು ಅಭಿಪ್ರಾಯಪಟ್ಟಿದ್ದಾರೆ.

ಈ ಕೂಟದಲ್ಲಿ ಒಂದೇ ಒಂದು ಸೆಟ್‌ ಕಳೆದುಕೊಳ್ಳದಿದ್ದುದು ಜೆನ್ನಿಫ‌ರ್‌ ಬ್ರಾಡಿ ಪಾಲಿನ ಹೆಗ್ಗಳಿಕೆ. ಸೆಮಿಫೈನಲ್‌ನಲ್ಲಿ ನೆಚ್ಚಿನ ಆಟಗಾರ್ತಿ ಕೊಕೊ ಗಾಫ್ ಅವರನ್ನೂ ಬ್ರಾಡಿ ನೇರ ಸೆಟ್‌ಗಳಲ್ಲಿ ಕೆಡವಿದ್ದರು.

ಗೆಲುವಿನ ನಂಬಿಕೆ ಇತ್ತು
“ಅಂಕಣಕ್ಕೆ ಇಳಿಯುವ ಮೊದಲು ನಾನು ಸ್ವಯಂ ನಂಬಿಕೆ ಹೊಂದಿದ್ದೆ. ಈ ಪಂದ್ಯವನ್ನು ನಾನು ಗೆಲ್ಲಬಲ್ಲೆ ಎಂಬುದೊಂದೇ ನನ್ನ ತಲೆಯಲ್ಲಿತ್ತು. ನಾನು ಎಣಿಸಿದ್ದೆಲ್ಲವೂ ಇಲ್ಲಿ ಸಾಕಾರಗೊಂಡಿದೆ’ ಎಂದು ಗೆಲುವಿನ ಬಳಿಕ ಬ್ರಾಡಿ ಹೇಳಿದರು. ಆದರೆ ಕೋವಿಡ್‌-19 ನಿಯಮಾವಳಿಯಿಂದಾಗಿ ಅವರ ಸಂಭ್ರಮಕ್ಕೆ ಯಾವುದೇ ಅವಕಾಶವಿರಲಿಲ್ಲ. ನೆಚ್ಚಿನ ತಿಂಡಿಯನ್ನು ತರಿಸಿಕೊಂಡು ಸಂಭ್ರಮಿಸುತ್ತೇನೆ ಎಂಬುದಾಗಿ ಬ್ರಾಡಿ ಹೇಳಿದರು.

ಸಿನ್ಸಿನಾಟಿ ಮಾಸ್ಟರ್
ವರ್ಷದ 4ನೇ ಹಾಗೂ ಅಂತಿಮ ಗ್ರ್ಯಾನ್‌ಸ್ಲಾಮ್‌ ಕೂಟವಾಗಬೇಕಿದ್ದ ಯುಎಸ್‌ ಓಪನ್‌ ಪಂದ್ಯಾವಳಿ ಈ ಬಾರಿ ವರ್ಷದ ಎರಡನೇ ಟೂರ್ನಿಯಾಗಿ ಆಯೋಜನೆಗೊಳ್ಳಲಿದ್ದು, ಆ. 31ರಿಂದ ಸೆ. 13ರ ತನಕ ನ್ಯೂಯಾರ್ಕ್‌ನಲ್ಲಿ ನಡೆಯಲಿದೆ. ಇದಕ್ಕೂ ಮೊದಲು ಸಿನ್ಸಿನಾಟಿ ಮಾಸ್ಟರ್ ಪಂದ್ಯಾವಳಿ ಇಲ್ಲಿ ಆರಂಭವಾಗಲಿದೆ.