ವೀರೂ ಬರ್ತ್‌ಡೇಗೆ ಟ್ವೀಟ್‌ ಮಳೆ…

Team Udayavani, Oct 20, 2019, 11:45 PM IST

ಹೊಸದಿಲ್ಲಿ: ಕ್ರಿಕೆಟಿನಿಂದ ದೂರವಾದ ಬಳಿಕ ಸೆಹವಾಗ್‌ ಟ್ವಿಟರ್‌ನಲ್ಲಿ “ಫೋರ್‌, ಸಿಕ್ಸ್‌’ ಬಾರಿಸಿ ಅಭಿಮಾನಿಗಳಿಗೆ ಧಾರಾಳ ಮನೋರಂಜನೆ ನೀಡುತ್ತಿದ್ದಾರೆ. ರವಿವಾರ ಅವರ 41ನೇ ಹುಟ್ಟುಹಬ್ಬ. ಈ ಸಂದರ್ಭದಲ್ಲಿ ಅವರಿಗೆ ಬಂದ ಶುಭ ಹಾರೈಕೆಗಳು ಹಾಗೂ ಅವುಗಳಿಗೆ ಸೆಹವಾಗ್‌ ನೀಡಿರುವ ಚುರುಕಿನ ಉತ್ತರಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್‌ ಆಗಿವೆ.

ಸಂಭ್ರಮ ಮುಂದೆಯೂ ಇರುತ್ತದೆ
“ವಿಶೇಷ ಸ್ನೇಹಿತನಿಗೆ ವಿಶೇಷವಾದ ಹುಟ್ಟುಹಬ್ಬದ ಶುಭಾಶಯಗಳು. ನಿಮ್ಮ ಹುಟ್ಟುಹಬ್ಬ ಖುಷಿ ಮತ್ತು ನಗುವಿನಿಂದ ತುಂಬಿರಲಿ. ನಿಮ್ಮ ಈ ದಿನ ಮತ್ತು ವರ್ಷ ಅಮೋಘವಾಗಿರಲಿ ಬ್ರದರ್‌’ ಎಂದು ವಿವಿಎಸ್‌ ಲಕ್ಷ್ಮಣ್‌ ಹಾರೈಸಿದ್ದಾರೆ. ಇದಕ್ಕೆ ಸೆಹವಾಗ್‌, “ನಿಮ್ಮ ಮಾತೇ ಶ್ರೇಷ್ಠ ಸಹೋದರ. ಸಂಭ್ರಮ ಇಂದೂ ಇದೆ, ಮುಂದೆಯೂ ಇರುತ್ತದೆ’ ಎಂದು ಪ್ರತಿಕ್ರಿಯಿಸಿದ್ದಾರೆ.

“ನಿರಂತರವಾಗಿ ನೀಡುತ್ತಿರುವ ಸ್ಫೂರ್ತಿಗೆ, ನಗುವಿಗೆ ಧನ್ಯವಾದಗಳು’ ಎಂಬ ಮಾಯಾಂಕ್‌ ಅಗರ್ವಾಲ್‌ ಟ್ವೀಟ್‌ಗೆ, “ಈಗ ನೀವೇ ನನಗೆ ಮತ್ತು ಕ್ರಿಕೆಟನ್ನು ಪ್ರೀತಿಸುವ ನನ್ನಂಥವರಿಗೆ ಸ್ಫೂರ್ತಿಯಾಗಿದ್ದೀರಿ. ಅವಕಾಶ ಸಿಕ್ಕಿದಾಗ ರನ್‌ ಗಳಿಸಲು ಇರುವ ಹಸಿವನ್ನು ಹೇಗೆ ನೀಗಿಸಿಕೊಳ್ಳಬೇಕೆಂದು ನೀವು ತೋರಿಸಿದ್ದೀರಿ. ಸದಾ ಶುಭ ಹಾರೈಕೆಗಳು’ ಎಂದು ಜವಾಬಿತ್ತಿದ್ದಾರೆ.

ಬಿಸಿಸಿಐ ಮಧ್ಯರಾತ್ರಿ ಟ್ವೀಟ್‌
ಮಧ್ಯರಾತ್ರಿ 12 ಗಂಟೆಗೆ ಸರಿಯಾಗಿ ಬಿಸಿಸಿಐ ಸೆಹವಾಗ್‌ಗೆ ಹುಟ್ಟುಹಬ್ಬದ ಶುಭ ಹಾರೈಸಿ ಟ್ವೀಟ್‌ ಮಾಡಿತು. ಬಿಸಿಸಿಐ ಸಮಯ ಪಾಲನೆಯನ್ನು ಮೆಚ್ಚಿಕೊಂಡ ಸೆಹವಾಗ್‌ “ಎಲ್ಲವೂ ಟೈಮಿಂಗ್‌ನ ಮೇಲೆ ನಿಂತಿದೆ. ಮಧ್ಯರಾತ್ರಿ ವೀಡಿಯೊ ಅಪ್‌ಲೋಡ್‌ ಮಾಡಿದ್ದೀರಿ. ಧನ್ಯವಾದಗಳು’ ಎಂದು ಟ್ವೀಟ್‌ ಮಾಡಿದ್ದಾರೆ.