ಪ್ರೊ ಕಬಡ್ಡಿ: ತಮಿಳ್‌ ತಲೈವಾಸ್‌ ಮೇಲೆ ಯು ಮುಂಬಾ ಸವಾರಿ

Team Udayavani, Oct 14, 2022, 11:50 PM IST

ಬೆಂಗಳೂರು: ಒಂದು ದಿನದ ವಿರಾಮದ ಬಳಿಕ ಮೊದಲ್ಗೊಂಡ ಪ್ರೊ ಕಬಡ್ಡಿ ಮುಖಾಮುಖಿಯಲ್ಲಿ ಯು ಮುಂಬಾ ಪಡೆ ತಮಿಳ್‌ ತಲೈವಾಸ್‌ ಮೇಲೆ ಸವಾರಿ ಮಾಡಿದೆ. 39-32 ಅಂತರದಿಂದ ಮಣಿಸಿ ತನ್ನ ಎರಡನೇ ಗೆಲುವನ್ನು ಸಾಧಿಸಿದೆ.

ಇನ್ನೊಂದೆಡೆ ತಲೈವಾಸ್‌ ತಂಡ ಗೆಲುವಿನ ಖಾತೆ ತೆರೆಯಲು ವಿಫ‌ಲವಾಯಿತು. 3 ಪಂದ್ಯಗಳಲ್ಲಿ ಎದುರಾದ ಎರಡನೇ ಸೋಲು ಇದಾಗಿದೆ. ಒಂದು ಪಂದ್ಯ ಟೈ ಆಗಿದೆ.

ಮುಂಬಾ ಪರ ರೈಡರ್‌ಗಳಾದ ಗುಮಾನ್‌ ಸಿಂಗ್‌ ಸರ್ವಾಧಿಕ 12 ಅಂಕ, ಆಶಿಷ್‌ 10 ಅಂಕ, ಜೈ ಭಗವಾನ್‌ 8 ಅಂಕ ತಂದಿತ್ತರು. ತಲೈವಾಸ್‌ಗೆ ಪವನ್‌ ಸೆಹ್ರಾವತ್‌ ಗೈರು ದುಬಾರಿಯಾಗಿ ಕಾಡಿತು. ರೈಡರ್‌ ನರೇಂದರ್‌ ಏಕಾಂಗಿ ಹೋರಾಟ ನಡೆಸಿ 15 ಅಂಕ ಗಳಿಸಿ ಕೊಟ್ಟರು.

ಜೈಪುರ್‌ ಭರ್ಜರಿ ಜಯ
ದಿನದ ದ್ವಿತೀಯ ಪಂದ್ಯದಲ್ಲಿ ಜೈಪುರ್‌ ಪಿಂಕ್‌ ಪ್ಯಾಂಥರ್ 44-31 ಅಂಕಗಳಿಂದ ಹರ್ಯಾಣ ಸ್ಟೀಲರ್ಗೆ ಸೋಲುಣಿಸಿತು. ಇದು ಜೈಪುರಕ್ಕೆ ಒಲಿದ ಎರಡನೇ ಜಯ. ಇನ್ನೊಂದೆಡೆ ಹರ್ಯಾಣ ಹ್ಯಾಟ್ರಿಕ್‌ ಗೆಲುವಿನ ಅವಕಾಶವನ್ನು ಕಳೆದುಕೊಂಡಿತು.

ವಿಜೇತ ತಂಡದ ಪರ ರೈಡರ್‌ ಅರ್ಜುನ್‌ ದೇಶ್ವಾಲ್‌ ಅಮೋಘ ಪ್ರದರ್ಶನವಿತ್ತರು. ಅವರೊಬ್ಬರೇ 14 ಅಂಕ ಸಂಪಾದಿಸಿದರು.