Under-19 ತ್ರಿಕೋನ ಸರಣಿ ಅಫ್ಘಾನಿಸ್ಥಾನ ವಿರುದ್ಧ ಭಾರತಕ್ಕೆ 9 ವಿಕೆಟ್‌ ಗೆಲುವು

Team Udayavani, Jan 5, 2024, 1:00 AM IST

ಜೋಹಾನ್ಸ್‌ಬರ್ಗ್‌: ನಮನ್‌ ತಿವಾರಿ ಅವರ ಉತ್ತಮ ಬೌಲಿಂಗ್‌ ನಿರ್ವಹಣೆಯಿಂದಾಗಿ ಭಾರತ ತಂಡವು ಅಂಡರ್‌ -19 ತ್ರಿಕೋನ ಸರಣಿಯ ಪಂದ್ಯದಲ್ಲಿ ಅಫ್ಘಾನಿಸ್ಥಾನ ತಂಡವನ್ನು 9 ವಿಕೆಟ್‌ಗಳಿಂದ ಸೋಲಿಸಿ ಫೈನಲ್‌ನಲ್ಲಿ ಆಡುವ ಅವಕಾಶ ಪಡೆಯಿತು.

ಮೊದಲು ಫೀಲ್ಡಿಂಗ್‌ ನಡೆಸಿದ ಭಾರತ ತಂಡವು ಅಫ್ಘಾನಿಸ್ಥಾನ ತಂಡ ವನ್ನು 33 ಓವರ್‌ಗಳಲ್ಲಿ ಕೇವಲ 88 ರನ್ನಿಗೆ ನಿಯಂತ್ರಿಸಿತು. ತಿವಾರಿ ತನ್ನ ಏಳು ಓವರ್‌ಗಳ ದಾಳಿಯಲ್ಲಿ ಕೇವಲ 11 ರನ್‌ ನೀಡಿ ನಾಲ್ಕು ವಿಕೆಟ್‌ ಉರುಳಿಸಿದ್ದರು. ಅವರಿಗೆ ಉತ್ತಮ ಬೆಂಬಲ ನೀಡಿದ ಧನುಷ್‌ ಗೌಡ ಮತ್ತು ಆರಾಧ್ಯ ಶುಕ್ಲ ತಲಾ ಎಡರು ವಿಕೆಟ್‌ ಪಡೆದರು.

ಗೆಲ್ಲಲು ಸುಲಭ ಸವಾಲು ಪಡೆದ ಭಾರತ ತಂಡವು ಆದರ್ಶ್‌ ಸಿಂಗ್‌ ಅವರ ಅಜೇಯ 52 ರನ್‌ ನೆರವಿನಿಂದ ಕೇವಲ 12.1 ಓವರ್‌ಗಳಲ್ಲಿ ಒಂದು ವಿಕೆಟಿಗೆ 92 ರನ್‌ ಗಳಿಸಿ ಜಯಭೇರಿ ಬಾರಿಸಿತು. ಇದು ಈ ಸರಣಿಯಲ್ಲಿ ಭಾರತದ ಮೂರನೇ ಗೆಲುವು ಆಗಿದೆ. ಭಾರತ ಶನಿವಾರ ನಡೆಯುವ ಪಂದ್ಯ ದಲ್ಲಿ ದಕ್ಷಿಣ ಆಫ್ರಿಕಾವನ್ನು ಎದುರಿಸಲಿದೆ. ಫೈನಲ್‌ ಪಂದ್ಯ ಬುಧವಾರ ನಡೆಯಲಿದೆ.

ಸಂಕ್ಷಿಪ್ತ ಸ್ಕೋರು: ಅಫ್ಘಾನಿಸ್ಥಾನ 33 ಓವರ್‌ಗಳಲ್ಲಿ 88 (ನಾಸಿರ್‌ ಹಸನ್‌ 31, ನಮನ್‌ ತಿವಾರಿ 11ಕ್ಕೆ 11, ಪ್ರಿಯಾಂಶು 15ಕ್ಕೆ 2, ಆರಾಧ್ಯ 20ಕ್ಕೆ 2, ಧನುಷ್‌ 23ಕ್ಕೆ 2); ಭಾರತ 12.1 ಓವರ್‌ಗಳಲ್ಲಿ ಒಂದು ವಿಕೆಟಿಗೆ 92 (ಆದರ್ಶ್‌ ಸಿಂಗ್‌ ಔಟಾಗದೆ 52).