Under-19 ವಿಶ್ವಕಪ್‌: ಐರ್ಲೆಂಡ್‌ ವಿರುದ್ಧ ಭಾರತ ಜಯಭೇರಿ

Team Udayavani, Jan 25, 2024, 10:31 PM IST

ಬ್ಲೋಮ್‌ಫಾಂಟೇನ್‌: ಮುಶೀರ್‌ ಖಾನ್‌ ಅವರ ಆಕರ್ಷಕ ಶತಕದಿಂದಾಗಿ ಭಾರತ ತಂಡವು ಐಸಿಸಿ ಅಂಡರ್‌-19 ವಿಶ್ವಕಪ್‌ ಕ್ರಿಕೆಟ್‌ ಕೂಟದ ತನ್ನ ಎರಡನೇ ಪಂದ್ಯದಲ್ಲಿ ಐರ್ಲೆಂಡ್‌ ತಂಡವನ್ನು 201 ರನ್ನುಗಳಿಂದ ಭರ್ಜರಿಯಾಗಿ ಸೋಲಿಸಿ ಸೂಪರ್‌ ಸಿಕ್ಸ್‌ ಹಂತಕ್ಕೇರುವುದನ್ನು ಬಹುತೇಕ ಖಚಿತಪಡಿಸಿಕೊಂಡಿತು.

ಮುಶೀರ್‌ ಅವರ ಸೊಗಸಾದ 118 ರನ್ನುಗಳ ನೆರವಿನಿಂದ ಭಾರತವು 7 ವಿಕೆಟಿಗೆ 301 ರನ್ನುಗಳ ಬೃಹತ್‌ ಮೊತ್ತ ಪೇರಿಸಿತು. ಇದಕ್ಕುತ್ತರವಾಗಿ ಐರ್ಲೆಂಡ್‌ ತಂಡವು ಭಾರತದ ದಾಳಿಗೆ ಕುಸಿದು 29.4 ಓವರ್‌ಗಳಲ್ಲಿ ಕೇವಲ 100 ರನ್ನಿಗೆ ಆಲೌಟಾಯಿತು. ಒಂದು ಹಂತದಲ್ಲಿ ಕೇವಲ 45 ರನ್ನಿಗೆ 8 ವಿಕೆಟ್‌ ಕಳೆದುಕೊಂಡು ಒದ್ದಾಡುತ್ತಿದ್ದ ಐರ್ಲೆಂಡ್‌ ತಂಡವನ್ನು ಒಲಿವರ್‌ ರಿಲೇ ಮತ್ತು ಡೇನಿಯಲ್‌ ಫೋರ್ಕಿನ್‌ ಸ್ವಲ್ಪಮಟ್ಟಿಗೆ ಆಧರಿಸುವ ಪ್ರಯತ್ನ ಮಾಡಿದರು. ಇದರಿಂದಾಗಿ ತಂಡದ ಮೊತ್ತ ನೂರು ತಲುಪಲು ಸಾಧ್ಯವಾಯಿತು.

ಸಂಕ್ಷಿಪ್ತ ಸ್ಕೋರು: ಭಾರತ 7 ವಿಕೆಟಿಗೆ 301 (ಮುಶೀರ್‌ ಖಾನ್‌ 118, ಉದಯ್‌ ಸಹರನ್‌ 75, ಒಲಿವರ್‌ ರಿಲೇ 55ಕ್ಕೆ 3) ಐರ್ಲೆಂಡ್‌ 29.4 ಓವರ್‌ಗಳಲ್ಲಿ 100ಕ್ಕೆ ಆಲೌಟ್‌ (ನಮನ್‌ ತಿವಾರಿ 53ಕ್ಕೆ 4, ಸೌಮಿ ಪಾಂಡೆ 21ಕ್ಕೆ 3).