ಅಂಡರ್‌-23 ವಿಶ್ವ ಕುಸ್ತಿ: ಸಾಜನ್‌ ಕೈತಪ್ಪಿದ ಕಂಚು

Team Udayavani, Nov 4, 2019, 1:13 AM IST

ಬುಡಾಪೆಸ್ಟ್‌ (ಹಂಗೇರಿ): ಅಂಡರ್‌-23 ಕಿರಿಯರ ವಿಶ್ವ ಕುಸ್ತಿ ಚಾಂಪಿಯನ್‌ಶಿಪ್‌ನಲ್ಲಿ ಪದಕ ಭರವಸೆ ಮೂಡಿಸಿದ್ದ ಸಾಜನ್‌ ಭನ್ವಾಲ್‌ ಕಂಚಿನ ಪದಕದ ಹೋರಾಟ ದಲ್ಲಿ ಸೋಲುಂಡು ನಿರಾಸೆ ಅನುಭವಿಸಿದ್ದಾರೆ.

ಶನಿವಾರ ತಡರಾತ್ರಿ ನಡೆದ ಪುರುಷರ 77 ಕೆಜಿ ವಿಭಾಗದ ಕಂಚಿನ ಪದಕಕ್ಕಾಗಿನ ಸಮರದಲ್ಲಿ 3 ಬಾರಿಯ ವಿಶ್ವ ಪದಕ ವಿಜೇತ ಸಾಜನ್‌ ಭನ್ವಾಲ್‌ ಟರ್ಕಿಯ ಸೆರ್ಕನ್‌ ಅಕೋಯುನ್‌ ವಿರುದ್ಧ 10-1 ಅಂತರದ ಭಾರೀ ಅಂತರದ ಆಘಾತ ಅನುಭವಿಸಿದರು.

ರವಿಗೆ ಕಂಚಿನ ಸವಾಲು
ಗ್ರೀಕೊ ರೋಮನ್‌ ಪುರುಷರ ವಿಭಾಗದ 97 ಕೆಜಿ ಸ್ಪರ್ಧೆಯಲ್ಲಿ ರವಿ 8-0 ಅಂತರದಿಂದ ಜಾರ್ಜಿಯಾದ ಜಿಯೊರ್ಗಿ ಮೆಲಿಯ ವಿರುದ್ಧ ಭರ್ಜರಿ ಗೆಲುವು ಗಳಿಸಿದರು. ಮುಂದೆ ಅವರು ರಿಪೆಶಾಜ್‌ನಲ್ಲಿ ಸ್ಪರ್ಧಿಸಲಿದ್ದಾರೆ. ಇಲ್ಲಿ ಗೆದ್ದರೆ ಕಂಚಿನ ಪದಕ ಸಿಗಲಿದೆ.

ಉಳಿದಂತೆ 55 ಕೆಜಿ ವಿಭಾಗದ ಕಂಚಿನ ಪದಕದ ಹೋರಾಟದಲ್ಲಿ ಅರ್ಜುನ್‌ 2-10 ಅಂಕಗಳ ಅಂತರದಿಂದ ಅರ್ಮೇನಿಯಾದ ನೊರಾಯರ್‌ ವಿರುದ್ಧ ಸೋಲುಂ ಡರು. 60 ಕೆಜಿ ವಿಭಾಗದ ಅರ್ಹತಾ ಸುತ್ತಿನ ಸ್ಪರ್ಧೆಯಲ್ಲಿ ಸಚಿನ್‌ ರಾಣಾ 5-2 ಅಂತರದಿಂದ ಚೀನದ ಲಿಗ್ಯುವ್‌ ಕಾವೊ ವಿರುದ್ಧ ಗೆಲುವು ಗಳಿಸಿ ಮುನ್ನಡೆ ಪಡೆದರೆ, 72 ಕೆಜಿ ವಿಭಾಗದ ಸ್ಪರ್ಧೆಯ ಮೊದಲ ಸುತ್ತಿನಲ್ಲಿ ರಾಹುಲ್‌ 8-0 ಅಂತರದಿಂದ ರಶ್ಯದ ಮಗೊಮದ್‌ ಯಾರ್ಬಿಲೋವ್‌ ವಿರುದ್ಧ ಜಯ ಸಾಧಿಸಿದರು.

82 ಕೆಜಿ ವಿಭಾಗದಲ್ಲಿ ನೀರಜ್‌ 1-10 ಅಂಕಗಳ ಅಂತರದಿಂದ ಸರ್ಬಿಯಾದ ಬ್ರಾಂಕೊ ಕೊವಾಸೆವಿಕ್‌ ವಿರುದ್ಧ ಅರ್ಹತಾ ಸುತ್ತಿನ ಮೊದಲ ಪಂದ್ಯದಲ್ಲೇ ಸೋಲುಂಡರು.