ಪ್ರೊ ಕಬಡ್ಡಿ ಹಣಾಹಣಿ: ಯುಪಿ ಯೋಧಾಸ್‌-ಬೆಂಗಾಲ್‌ ವಾರಿಯರ್ ಟೈ

Team Udayavani, Nov 8, 2022, 10:42 PM IST

ಪುಣೆ: ನಿಕಟ ಸ್ಪರ್ಧೆ ಕಂಡ ಯುಪಿ ಯೋಧಾಸ್‌-ಬೆಂಗಾಲ್‌ ವಾರಿಯರ್ ನಡುವಿನ ಪ್ರೊ ಕಬಡ್ಡಿ ಹಣಾಹಣಿ 41-41 ಅಂಕಗಳ ಸಮಬಲದಲ್ಲಿ ಮುಗಿದಿದೆ.

ಕೊನೆಯ ಕೆಲವು ಸೆಕೆಂಡ್‌ಗಳ ನಾಟಕೀಯ ಆಟದಲ್ಲಿ ಪಂದ್ಯ ಏರಿಳಿತ ಕಾಣುತ್ತ ಹೋಯಿತು. ಯುಪಿ ಯೋಧಾಸ್‌ನ ರೋಹಿತ್‌ ಕೊನೆಯ ಕ್ಷಣದಲ್ಲಿ ರೈಡ್‌ ನಡೆಸಿ ಒಂದಂಕ ತಂದು, ಅಂಕ ವ್ಯತ್ಯಾಸವನ್ನು ಒಂದಕ್ಕೆ ತಂದು ನಿಲ್ಲಿಸಿದರು. ಆಗ ಪಂದ್ಯದ ಮುಕ್ತಾಯಕ್ಕೆ ಇನ್ನೂ 2 ಸೆಕೆಂಡ್‌ ಬಾಕಿ ಇದ್ದುದರಿಂದ ಅಂಪಾಯರ್‌ ಇನ್ನೊಂದು ರೈಡ್‌ಗೆ ಅವಕಾಶ ನೀಡಿದರು. ಬೆಂಗಾಲ್‌ ಪಾಲಿಗೆ ಇದು ಡು ಆರ್‌ ಡೈ ರೈಡ್‌ ಆಗಿತ್ತು. ಗೆಲ್ಲಲು ಅದು ಅಂಕ ಗಳಿಸುವುದು ಅನಿವಾರ್ಯವಾಗಿತ್ತು. ಸ್ವತಃ ಬೆಂಗಾಲ್‌ ನಾಯಕ ಮಣಿಂದರ್‌ ರೈಡ್‌ಗೆ
ಇಳಿದರೂ ಸುಮಿತ್‌ ಸಾಹಸ ಪ್ರದರ್ಶಿಸಿದರು; ಮಣಿಂದರ್‌ ಅವರನ್ನು ಅಂಕಣದಿಂದ ಹೊರತಳ್ಳುವ ಮೂಲಕ ಪಂದ್ಯವನ್ನು ಸಮಬಲದಲ್ಲಿ ಮುಗಿಸಿದರು.

ಬೆಂಗಾಲ್‌ ಪರ ಮಣಿಂದರ್‌ ಅತ್ಯಧಿಕ 18 ಅಂಕ ಗಳಿಸಿದರು. ಯೋಧಾಸ್‌ ಪರ ರೈಡರ್‌ ರೋಹಿತ್‌ ತೋಮರ್‌ 16 ಅಂಕ, ಪದೀìಪ್‌ ನರ್ವಾಲ್‌ 11 ಅಂಕ ಗಳಿಸಿದರು.

ದಬಾಂಗ್‌ ಡೆಲ್ಲಿ ಗೆಲುವು
ಮತ್ತೊಂದು ಪಂದ್ಯದಲ್ಲಿ ಡೆಲ್ಲಿ 40-33ರಿಂದ ಟೈಟಾನ್ಸ್‌ಗೆ ಸೋಲುಣಿಸಿತು. ಡೆಲ್ಲಿ ಜಯದಲ್ಲಿ ರೈಡರ್‌ ಆಶು ಮಲಿಕ್‌ ಪಾತ್ರ ಮಹತ್ವದ್ದಾಗಿತ್ತು (12 ಅಂಕ). ನಾಯಕ ನವೀನ್‌ ಕುಮಾರ್‌ 9 ಅಂಕ ಗಳಿಸಿದರು. ಟೈಟಾನ್ಸ್‌ ಸಿದ್ಧಾರ್ಥ್ ದೇಸಾಯಿ ಅವರನ್ನು ಹೆಚ್ಚು ಅವಲಂಬಿಸಿತು. ಅವರು 14 ಅಂಕ ತಂದು ಕೊಟ್ಟರು.