ಪ್ಲೇ ಆಫ್ಗೆ ನೆಗೆದ ಯುಪಿ ಯೋಧಾ

Team Udayavani, Oct 6, 2019, 6:19 AM IST

ಗ್ರೇಟರ್‌ ನೊಯ್ಡಾ (ಯುಪಿ): ಪ್ರೊ ಕಬಡ್ಡಿ ಏಳನೇ ಆವೃತ್ತಿ ಗ್ರೇಟರ್‌ ನೊಯ್ಡಾ ಚರಣದ ಮೊದಲ ದಿನದ ಪಂದ್ಯದಲ್ಲೇ ಆತಿಥೇಯ ಯುಪಿ ಯೋಧಾ ಜಯಭೇರಿ ಮೊಳಗಿಸಿ ಪ್ಲೇ ಆಫ್ಗೆ ನೆಗೆಯಿತು. ಶನಿವಾರದ ಮುಖಾಮುಖೀಯಲ್ಲಿ ಯೋಧಾ ಅಗ್ರಸ್ಥಾನಿ ದಬಾಂಗ್‌ ಡೆಲ್ಲಿಗೆ 50-33 ಅಂತರದ ಸೋಲುಣಿಸಿತು. ಇದರೊಂದಿಗೆ ಪ್ಲೇ ಆಫ್ ಕನಸು ಕಾಣುತ್ತಿದ್ದ ಜೈಪುರ್‌ ಪಿಂಕ್‌ ಪ್ಯಾಂಥರ್ಸ್‌ ಕೂಟದಿಂದ ಹೊರಬಿತ್ತು.

ದಿನದ ದ್ವಿತೀಯ ಪಂದ್ಯದಲ್ಲಿ ಪಾಟ್ನಾ ಪೈರೇಟ್ಸ್‌ 39-33 ಅಂತರದಿಂದ ಗುಜರಾತ್‌ ಫಾರ್ಚೂನ್‌ಜೈಂಟ್ಸ್‌ಗೆ ಸೋಲುಣಿಸಿತು.

ಮೋನು ಮ್ಯಾಜಿಕ್‌
ಈಗಾಗಲೇ 5 ತಂಡಗಳು ಪ್ಲೇ ಆಫ್ಗೇರಿದ್ದವು. ಅಂತಿಮ ಸ್ಥಾನಕ್ಕಾಗಿ ಯುಪಿ ಯೋಧಾ ಹಾಗೂ ಜೈಪುರ ಪಿಂಕ್‌ ಪ್ಯಾಂಥರ್ಸ್‌ ನಡುವೆ ಪೈಪೋಟಿ ಏರ್ಪಟ್ಟಿತ್ತು. ಆದರೆ ಯುಪಿಗೆ ಒಂದು ಗೆಲುವು ಸಾಧಿಸಿದರೆ ಸಾಕಿತ್ತು. ಅದರಂತೆ ಯುಪಿ ತವರಿನ ನೆಲದ ಮೊದಲ ಪಂದ್ಯದಲ್ಲೇ ಗೆಲುವು ಸಾಧಿಸಿ ಅರ್ಹವಾಗಿ 6ನೇ ತಂಡವಾಗಿ ಪ್ಲೇ ಆಫ್ಗೆ ನೆಗೆಯಿತು.

ಯುಪಿ ಗೆಲುವಿನಲ್ಲಿ ರೈಡರ್‌ ಮೋನು ಗೋಯತ್‌ (11 ರೈಡಿಂಗ್‌ ಅಂಕ), ಶ್ರೀಕಾಂತ್‌ ಯಾದವ್‌ (9 ರೈಡಿಂಗ್‌ ಅಂಕ) ಮಿಂಚಿದರೆ, ನಿತೇಶ್‌ ಕುಮಾರ್‌ (6 ಟ್ಯಾಕಲ್‌ ಅಂಕ), ಸುಮಿತ್‌ (5 ಟ್ಯಾಕಲ್‌ ಅಂಕ) ಅಮೋಘ ಪ್ರದರ್ಶನ ನೀಡಿದರು.

ಈಗಾಗಲೇ ಪ್ಲೇ ಆಫ್ ಪ್ರವೇಶಿಸಿದ್ದರಿಂದ ಡೆಲ್ಲಿ ಈ ಪಂದ್ಯದಲ್ಲಿ ಮೀಸಲು ಆಟಗಾರರನ್ನು ಕಣಕ್ಕಿಳಿಸಿತು. ಇದು ದುಬಾರಿಯಾಗಿ ಪರಿಣ ಮಿಸಿತು. ನೀರಜ್‌ ನರ್ವಾಲ್‌ (11 ರೈಡಿಂಗ್‌ ಅಂಕ), ಸೋಮ್‌ಬೀರ್‌ (9 ಟ್ಯಾಕಲ್‌ ಅಂಕ) ಹಾಗೂ ಮಿರಾಜ್‌ ಶೇಖ್‌ (7 ಅಂಕ) ಸಾಧಾರಣ ಆಟವನ್ನಷ್ಟೇ ಪ್ರದರ್ಶಿಸಿದರು.