ಒಸಾಕಾ, ಕೆರ್ಬರ್‌: ಮಾಜಿ ಚಾಂಪಿಯನ್ನರು 4ನೇ ಸುತ್ತಿಗೆ

Team Udayavani, Sep 5, 2020, 7:17 PM IST

ನ್ಯೂಯಾರ್ಕ್: ಯುಎಸ್‌ ಓಪನ್‌ ಮಾಜಿ ಚಾಂಪಿಯನ್ನರಾದ ನವೋಮಿ ಒಸಾಕಾ ಮತ್ತು ಆ್ಯಂಜೆಲಿಕ್‌ ಕೆರ್ಬರ್‌ ವನಿತಾ ಸಿಂಗಲ್ಸ್‌ ವಿಭಾಗದ 4ನೇ ಸುತ್ತಿಗೆ ಮುನ್ನಡೆದಿದ್ದಾರೆ.

ಇವರಲ್ಲಿ ಕೆರ್ಬರ್‌ ಸುಲಭ ಜಯ ಸಾಧಿಸಿದರೆ, ಒಸಾಕಾ 3 ಸೆಟ್‌ಗಳ ಹೋರಾಟ ನಡೆಸಬೇಕಾಯಿತು. ಉಕ್ರೇನಿನ 18ರ ಹರೆಯದ ಆಟಗಾರ್ತಿ ಮಾರ್ತಾ ಕೋಸ್ಟುಕ್‌ ವಿರುದ್ಧದ ಪಂದ್ಯವನ್ನು ಒಸಾಕಾ 6-3, 6-7 (4-7), 6-2 ಅಂತರದಿಂದ ಗೆದ್ದರು. ಈ ಗೆಲುವಿಗಾಗಿ 2 ಗಂಟೆ, 33 ನಿಮಿಷಗಳ ಹೋರಾಟ ನಡೆಸಬೇಕಾಯಿತು. ಒಸಾಕಾ ಎಡಗಾಲಿನ ಸ್ನಾಯು ಸೆಳೆತದಿಂದ ಪೂರ್ತಿ ಚೇತರಿಸದಿರುವುದು ಕಂಡುಬಂತು. ಆದರೆ ಹಿಂದಿನ ಪಂದ್ಯಕ್ಕಿಂತ ಪರಾÌಗಿಲ್ಲ ಎಂಬುದಾಗಿ ಅವರು ಪ್ರತಿಕ್ರಿಯಿಸಿದರು.

ಒಸಾಕಾ ಅವರ ಮುಂದಿನ ಸುತ್ತಿನ ಎದುರಾಳಿ ಎಸ್ತೋನಿಯಾದ ಅನ್ನಾ ಕೊಂಟಾವೀಟ್‌. ಇನ್ನೊಂದು ಮುಖಾಮುಖಿಯಲ್ಲಿ ಅವರು ಪೋಲೆಂಡಿನ ಮಾಗಾx ಲಿನೆಟ್‌ ವಿರುದ್ಧ 6-3, 6-2 ಅಂತರದ ಮೇಲುಗೈ ಸಾಧಿಸಿದರು.

2016ರ ಚಾಂಪಿಯನ್‌, ಜರ್ಮನಿಯ ಆ್ಯಂಜೆಲಿಕ್‌ ಕೆರ್ಬರ್‌ 6-3, 6-4ರಿಂದ ಅಮೆರಿಕದ ಯುವ ಆಟಗಾರ್ತಿ ಆ್ಯನ್‌ ಲೀ ಅವರನ್ನು ಮಣಿಸಿದರು. ಮುಂದಿನ ಸುತ್ತಿನಲ್ಲೂ ಕೆರ್ಬರ್‌ ಅಮೆರಿಕದ ಆಟಗಾರ್ತಿಯನ್ನೇ ಎದುರಿಸಲಿದ್ದಾರೆ. ಈಕೆ 28ನೇ ಶ್ರೇಯಾಂಕದ ಜೆನ್ನಿಫ‌ರ್‌ ಬ್ರಾಡಿ. ಫ್ರಾನ್ಸ್‌ನ ಲ್ಯಾರೋಲಿನ್‌ ಗಾರ್ಸಿಯಾ ಅವರನ್ನು ಬ್ರಾಡಿ 6-3, 6-3ರಿಂದ ಹಿಮ್ಮೆಟ್ಟಿಸಿದರು. ಗಾರ್ಸಿಯಾ ಹಿಂದಿನ ಸುತ್ತಿನಲ್ಲಿ ಅಗ್ರ ಶ್ರೇಯಾಂಕದ ಕ್ಯಾರೋಲಿನಾ ಪ್ಲಿಸ್ಕೋವಾ ಅವರನ್ನು ಮಣಿಸಿ ಸುದ್ದಿಯಾಗಿದ್ದರು.