US Open ಗ್ರ್ಯಾನ್‌ಸ್ಲಾಮ್‌: ಸ್ವಿಯಾಟೆಕ್‌-ಗಾಫ್ ಕ್ವಾರ್ಟರ್‌ ಫೈನಲ್‌ ಸಾಧ್ಯತೆ

Team Udayavani, Aug 27, 2023, 6:30 AM IST

ನ್ಯೂಯಾರ್ಕ್‌: ಯುಎಸ್‌ ಓಪನ್‌ ಗ್ರ್ಯಾನ್‌ಸ್ಲಾಮ್‌ನಲ್ಲಿ ವನಿತಾ ಸ್ಪರ್ಧಿಗಳ ಕಣವೂ ರಂಗೇರಿಸಿಕೊಳ್ಳುತ್ತಿದೆ. ವಿಶ್ವದ ನಂ. 1 ಆಟಗಾರ್ತಿ, ಹಾಲಿ ಚಾಂಪಿಯನ್‌ ಇಗಾ ಸ್ವಿಯಾಟೆಕ್‌, ಮೊನ್ನೆಯಷ್ಟೇ ವಾಷಿಂಗ್ಟನ್‌ ಮತ್ತು ಸಿನ್ಸಿನಾಟಿ ಪ್ರಶಸ್ತಿ ಗೆದ್ದ ಕೊಕೊ ಗಾಫ್ ಮೊದಲಾದವರೆಲ್ಲ ಇಲ್ಲಿನ ನೆಚ್ಚಿನ ಆಟಗಾರ್ತಿಯರಾಗಿ ಗೋಚರಿಸುತ್ತಿದ್ದಾರೆ. ಈಗಿನ ಡ್ರಾ ಪ್ರಕಾರ ಇವರಿಬ್ಬರು ಕ್ವಾರ್ಟರ್‌ ಫೈನಲ್‌ನಲ್ಲಿ ಮುಖಾಮುಖಿಯಾಗುವ ಸಾಧ್ಯತೆ ಇದೆ. ಸ್ವಿಯಾಟೆಕ್‌ ವಿರುದ್ಧ ಸತತ 7 ಪಂದ್ಯಗಳನ್ನು ಸೋತ ಬಳಿಕ ಕಳೆದ ಸಿನ್ಸಿನಾಟಿ ಪ್ರಶಸ್ತಿ ಹಾದಿಯಲ್ಲಿ ಕೊಕೊ ಗಾಫ್ ಗೆದ್ದುಬಂದಿದ್ದರು.
ಆಸ್ಟ್ರೇಲಿಯನ್‌ ಓಪನ್‌ ಚಾಂಪಿ ಯನ್‌, ದ್ವಿತೀಯ ಶ್ರೇಯಾಂಕದ ಅರಿನಾ ಸಬಲೆಂಕಾ ಕೂಡ ನೆಚ್ಚಿನ ಆಟ ಗಾರ್ತಿಯಾಗಿದ್ದು, ಮೊದಲ ಸುತ್ತಿನಲ್ಲಿ ಬೆಲ್ಜಿಯಂನ ಮರಿನಾ ಝನೇವ್‌ಸ್ಕಾ ವಿರುದ್ಧ ಆಡಲಿದ್ದಾರೆ. ಸಬಲೆಂಕಾ ಗೆಲ್ಲುತ್ತ ಹೋದರೆ ಕ್ವಾರ್ಟರ್‌ ಫೈನಲ್‌ನಲ್ಲಿ ಕಳೆದ ವರ್ಷದ ರನ್ನರ್ ಅಪ್‌ ಓನ್ಸ್‌ ಜೆಬ್ಯುರ್‌ ಅವರನ್ನು ಎದುರಿಸುವ ಸಾಧ್ಯತೆ ಇದೆ.

ಎರಡು ಬಾರಿಯ ಚಾಂಪಿಯನ್‌, ಆತಿಥೇಯ ದೇಶದ ಹಿರಿಯ ಆಟ ಗಾರ್ತಿ ವೀನಸ್‌ ವಿಲಿಯಮ್ಸ್‌ ಇಲ್ಲಿ 24ನೇ ಸಲ ಆಡಲಿಳಿಯಲಿದ್ದು, ಸ್ಪೇನ್‌ನ ಪೌಲಾ ಬಡೋಸಾ ವಿರುದ್ಧ ಮೊದಲ ಪಂದ್ಯ ಆಡಲಿದ್ದಾರೆ. ವೀನಸ್‌ ಅವರಿಲ್ಲಿ ವೈಲ್ಡ್‌ಕಾರ್ಡ್‌ ಮೂಲಕ ಪ್ರವೇಶ ಪಡೆದಿದ್ದಾರೆ.

ಟಾಪ್‌ ಹಾಫ್ ಡ್ರಾ
“ಟಾಪ್‌ ಹಾಫ್ ಡ್ರಾ’ದಲ್ಲಿ ಮಾಜಿ ಗ್ರ್ಯಾನ್‌ಸ್ಲಾಮ್‌ ವಿಜೇತರಾದ ಜೆಲೆನಾ ಒಸ್ಟಾಪೆಂಕೊ, ಪೆಟ್ರಾ ಕ್ವಿಟೋವಾ, ಕ್ಯಾರೋಲಿನ್‌ ವೋಜ್ನಿಯಾಕಿ, ವಿಕ್ಟೋ ರಿಯಾ ಅಜರೆಂಕಾ, ಸ್ಲೋನ್‌ ಸ್ಟೀಫ‌ನ್ಸ್‌, 4ನೇ ಶ್ರೇಯಾಂಕದ ಎಲೆನಾ ರಿಬಾಕಿನಾ ಮೊದಲಾದವರಿದ್ದಾರೆ. ಇವರಲ್ಲಿ ರಿಬಾಕಿನಾ ನ್ಯೂಯಾರ್ಕ್‌ನಲ್ಲಿ 3ನೇ ಸುತ್ತು ದಾಟಿದವರಲ್ಲ. ಮೊದಲ ಸುತ್ತಿನಲ್ಲಿ ಉಕ್ರೇನ್‌ನ ಮಾರ್ತಾ ಕೋಸ್ಟುéಕ್‌ ವಿರುದ್ಧ ಸೆಣಸಲಿದ್ದಾರೆ.
ಇತ್ತೀಚೆಗಷ್ಟೇ ನಿವೃತ್ತಿಯಿಂದ ಹಿಂದೆ ಸರಿದು ಬಂದ ವೋಜ್ನಿಯಾಕಿ ಅವರಿಗೆ ವೈಲ್ಡ್‌ಕಾರ್ಡ್‌ ಲಭಿಸಿದ್ದು, ದ್ವಿತೀಯ ಸುತ್ತಿನಲ್ಲಿ ಪೆಟ್ರಾ ಕ್ವಿಟೋವಾ ಅವರನ್ನು ಎದುರಿಸಬಹುದು.

ಬಾಟಮ್‌ ಹಾಫ್ ಡ್ರಾ
ಕೂಟದ “ಬಾಟಮ್‌ ಹಾಫ್ ಡ್ರಾ’ದಲ್ಲಿ ದ್ವಿತೀಯ ಶ್ರೇಯಾಂಕದ ಅರಿನಾ ಸಬಲೆಂಕಾ ನೆಚ್ಚಿನ ಆಟಗಾರ್ತಿಯಾಗಿ ಗೋಚರಿಸುತ್ತಿದ್ದಾರೆ. ವಿಂಬಲ್ಡನ್‌ ಗೆದ್ದ ಮಾರ್ಕೆಟಾ ವೊಂಡ್ರುಸೋವಾ, ಮಾಜಿ ಚಾಂಪಿಯನ್‌ ಬಿಯಾಂಕಾ ಆ್ಯಂಡ್ರೀಸ್ಕೂ, ಜೆಸ್ಸಿಕಾ ಪೆಗುಲಾ ಓನ್ಸ್‌ ಜೆಬ್ಯೂರ್‌ ಮೊದಲಾದವರಿದ್ದಾರೆ.

ಅಮೆರಿಕದ ಜೆಸ್ಸಿಕಾ ಪೆಗುಲಾ ಇತ್ತೀಚೆಗಷ್ಟೇ ಮಾಂಟ್ರಿಯಲ್‌ ಓಪನ್‌ ಚಾಂಪಿಯನ್‌ ಜಯಿಸಿದ್ದು, ಇಟಲಿಯ ಕ್ಯಾಮಿಲಾ ಜಾರ್ಜಿ ವಿರುದ್ಧ; ಜೆಬ್ಯುರ್‌ ಕೊಲಂಬಿಯಾದ ಕ್ಯಾಮಿಲಾ ಒಸೋರಿಯೊ ವಿರುದ್ಧ ಮೊದಲ ಸುತ್ತಿನ ಪಂದ್ಯ ಆಡಲಿದ್ದಾರೆ. 3ನೇ ಸುತ್ತಿನಲ್ಲಿ ಸಬಲೆಂಕಾಗೆ 2016ರ ರನ್ನರ್ ಅಪ್‌ ಕ್ಯಾರೋಲಿನಾ ಪ್ಲಿಸ್ಕೋವಾ ಎದುರಾಗಬಹುದು.