ಯುಎಸ್‌ ಓಪನ್‌ ಸಿಂಗಲ್ಸ್‌: ಭಾರತದ ಸ್ಪರ್ಧೆಗೆ ತೆರೆ

Team Udayavani, Aug 27, 2022, 12:12 AM IST

ನ್ಯೂಯಾರ್ಕ್‌: ಅರ್ಹತಾ ಸುತ್ತಿನ ದ್ವಿತೀಯ ಪಂದ್ಯದಲ್ಲಿ ಯೂಕಿ ಭಾಂಬ್ರಿ ಸೋಲನುಭವಿಸುವ ಮೂಲಕ ಯುಎಸ್‌ ಓಪನ್‌ ಗ್ರಾನ್‌ಸ್ಲಾಮ್‌ ಸಿಂಗಲ್ಸ್‌ ನಲ್ಲಿ ಭಾರತೀಯರ ಸ್ಪರ್ಧೆ ಇಲ್ಲದಾಗಿದೆ. ಭಾಂಬ್ರಿ ಅವರನ್ನು ಬೆಲ್ಜಿಯಂನ ಜೀಝೂ ಬಗ್ಸ್‌ 6-3, 6-2 ನೇರ ಸೆಟ್‌ಗಳಲ್ಲಿ ಮಣಿಸಿದರು.

ಇದಕ್ಕೂ ಮುನ್ನ ರಾಮ್‌ಕುಮಾರ್‌ ರಾಮನಾಥನ್‌ ಮತ್ತು ಸುಮಿತ್‌ ನಗಾಲ್‌ ಕೂಡ ಆರ್ಹತಾ ಸುತ್ತಿನಲ್ಲಿ ಸೋಲನುಭವಿಸಿ ಪ್ರಧಾನ ಸುತ್ತು ಪ್ರವೇಶಿಸುವ ಅವಕಾಶವನ್ನು ಕಳೆದುಕೊಂಡಿದ್ದರು. ರಾಮನಾಥನ್‌ ಅವರನ್ನು ಅಮೆರಿಕದ ಬ್ರುನೊ ಕುಜುಹಾರ 6-3, 7-5ರಿಂದ, ನಗಾಲ್‌ ಅವರನ್ನು ಕೆನಡಾದ ವಸೆಕ್‌ ಪಾಸ್ಪಿಸಿಲ್‌ 7-6 (7-2), 7-5ರಿಂದ ಮಣಿಸಿದ್ದರು.

ಯೂಕಿ ಭಾಂಬ್ರಿ ಕಳೆದ ಸುಮಾರು 3 ವರ್ಷಗಳಿಂದ ನಾನಾ ದೈಹಿಕ ಸಮಸ್ಯೆ, ಶಸ್ತ್ರಚಿಕಿತ್ಸೆಗಳಿಂದಾಗಿ ಸ್ಪರ್ಧಾತ್ಮಕ ಟೆನಿಸ್‌ನಲ್ಲಿ ಅಷ್ಟಾಗಿ ಕಾಣಿಸಿಕೊಂಡಿರಲಿಲ್ಲ. ವರ್ಷಾರಂಭದ ಆಸ್ಟ್ರೇಲಿಯನ್‌ ಓಪನ್‌ ಅರ್ಹತಾ ಸುತ್ತಿನಲ್ಲಿ ಆಡಿದ್ದರು. ಅಲ್ಲಿಯೂ ದ್ವಿತೀಯ ಸುತ್ತಿನಲ್ಲೇ ಎಡವಿದ್ದರು.