ಇಸ್ನರ್‌, ಕಿರ್ಗಿಯೋಸ್‌ ಹೋರಾಟ ಅಂತ್ಯ

Team Udayavani, Sep 2, 2019, 5:45 AM IST

ನ್ಯೂಯಾರ್ಕ್: ದ್ವಿತೀಯ ಶ್ರೇಯಾಂಕದ ರಫೆಲ್‌ ನಡಾಲ್‌ ಅವರು ಸುಲಭ ಜಯದೊಂದಿಗೆ ಯುಎಸ್‌ ಓಪನ್‌ ಟೆನಿಸ್‌ ಕೂಟದಲ್ಲಿ ನಾಲ್ಕನೇ ಸುತ್ತು ತಲುಪಿದ್ದಾರೆ. ಆದರೆ ಅಮೆರಿಕದ ಜಾನ್‌ ಇಸ್ನರ್‌, ನಿಕ್‌ ಕಿರ್ಗಿಯೋಸ್‌ ಹೋರಾಟ ಮೂರನೇ ಸುತ್ತಿನಲ್ಲಿಯೇ ಅಂತ್ಯಗೊಂಡಿದೆ.

ಮೂರು ಬಾರಿ ಇಲ್ಲಿ ಚಾಂಪಿಯನ್‌ ಆಗಿರುವ ನಡಾಲ್‌ ದಕ್ಷಿಣ ಕೊರಿಯದ ಅರ್ಹತಾ ಆಟಗಾರ ಚುಂಗ್‌ ಹೆಯುನ್‌ ಅವರನ್ನು 6-3, 6-4, 6-2 ಸೆಟ್‌ಗಳಿಂದ ಮಣಿಸಿದರು. ಅವರು ಮುಂದಿನ ಸುತ್ತಿನಲ್ಲಿ 2014ರ ಚಾಂಪಿಯನ್‌ ಮರಿನ್‌ ಸಿಲಿಕ್‌ ಅವರನ್ನು ಎದುರಿಸಲಿದ್ದಾರೆ. ಸಿಲಿಕ್‌ ಇನ್ನೊಂದು ಪಂದ್ಯದಲ್ಲಿ ಅಮೆರಿಕದ ಭರವಸೆ ಜಾನ್‌ ಇಸ್ನರ್‌ ಅವರನ್ನು 7-5, 3-6, 7-6 (8-6), 6-4 ಸೆಟ್‌ಗಳ ಸುದೀರ್ಘ‌ ಹೋರಾಟದಲ್ಲಿ ಕೆಡಹಿದರು. ಈ ಪಂದ್ಯ 3 ಗಂಟೆ 19 ನಿಮಿಷಗಳವರೆಗೆ ಸಾಗಿತ್ತು.

ಮತ್ತೆ ನಾಲ್ಕನೇ ಸುತ್ತಿಗೇರಿರುವುದು ಸಂತೊಷ ವಾಗಿದೆ. ಇದೊಂದು ಒಳ್ಳೆಯ ಪಂದ್ಯವಾಗಿತ್ತು ಎಂದು ಪಂದ್ಯದ ಬಳಿಕ ನಡಾಲ್‌ ತಿಳಿಸಿದರು.

ಕಿರ್ಗಿಯೋಸ್‌ ಪತನ
ಶಕ್ತಿಶಾಲಿ ಸರ್ವ್‌ಗಳ ಕಾದಾಟದಲ್ಲಿ ಆಸ್ಟ್ರೇಲಿಯದ ನಿಕ್‌ ಕಿರ್ಗಿಯೋಸ್‌ ರಶ್ಯದ ಆ್ಯಂಡ್ರೆ ರುಬ್ಲೆವ್‌ಗೆ ಶರಣಾಗಿದ್ದಾರೆ. ತೀವ್ರ ಪೈಪೋಟಿ ಯಿಂದ ಸಾಗಿದ ಈ ಪಂದ್ಯದಲ್ಲಿ ರುಬ್ಲೆವ್‌ 7-6 (5), 7-6 (5), 6-3 ಸೆಟ್‌ಗಳಿಂ ದ ಗೆಲುವು ಸಾಧಿಸಿ ಮುನ್ನಡೆದರು. ಎರಡು ವರ್ಷಗಳ ಹಿಂದೆ ಇಲ್ಲಿ ಕ್ವಾ. ಫೈನಲ್‌ ತಲುಪಿದ್ದ ರುಬ್ಲೆವ್‌ ಮುಂದಿನ ಸುತ್ತಿನಲ್ಲಿ ಇಟಲಿಯ ಮಾಟೆಯೊ ಬರೆಟ್ಟಿನಿ ಅವರನ್ನು ಎದುರಿಸಲಿದ್ದಾರೆ. ಬರೆಟ್ಟಿನಿ ಇನ್ನೊಂದು ಪಂದ್ಯದಲ್ಲಿ ಆಸ್ಟ್ರೇಲಿಯದ ಅಲೆಕ್ಸಿ ಪೊಪಿರಿನ್‌ ಅವರನ್ನು 6-4, 6-4, 6-7 (3-7), 7-6 (7-2), ಸೆಟ್‌ಗಳಿಂದ ಕೆಡಹಿದ್ದರು.

ಮಾನ್‌ಫಿಲ್ಸ್‌ಗೆ ಮ್ಯಾರಥಾನ್‌ ಗೆಲುವು
ಫ್ರಾನ್ಸ್‌ನ ಗಾಲ್‌ ಮಾನ್‌ಫಿಲ್ಸ್‌ ಐದು ಸೆಟ್‌ಗಳ ಮ್ಯಾರಥಾನ್‌ ಹೋರಾಟದಲ್ಲಿ ಕೆನಡದ ಡೆನಿಸ್‌ ಶಪೋವಲೋವ್‌ ಅವರನ್ನು 6-7 (5-7), 7-6 (7-4), 6-4, 6-7 (6-8), 6-3 ಸೆಟ್‌ಗಳಿಂದ ಮಣಿಸಿದರು. ಈ ಹೋರಾಟ 3 ತಾಸು 34 ನಿಮಿಷಗಳವರೆಗೆ ಸಾಗಿತ್ತು. ಇನ್ನೊಂದು ಪಂದ್ಯದಲ್ಲಿ ಅಲೆಕ್ಸಾಂಡರ್‌ ಜ್ವರೇವ್‌ ಜಯ ಸಾಧಿಸಿದ್ದರು. ಆರನೇ ಶ್ರೇಯಾಂಕದ ಅವರು ಸ್ಲೋವಾಕಿಯಾದ ಅಲ್ಜಾಜ್‌ ಬೆಡೆನೆ ಅವರನ್ನು 6-7 (4-7), 7-6 (7-4), 6-3, 7-6 (7-3) ಸೆಟ್‌ಗಳಿಂದ ಪರಾಭವಗೊಳಿಸಿದರು.