ಯುಎಸ್‌ ಓಪನ್‌: ಸಿಸಿಪಸ್‌, ಮೆಡ್ವೆಡೇವ್‌, ಒಸಾಕಾ ಪಾಸ್‌

Team Udayavani, Sep 1, 2021, 1:41 AM IST

ನ್ಯೂಯಾರ್ಕ್‌: ವರ್ಷಾಂತ್ಯದ ಗ್ರ್ಯಾನ್‌ಸ್ಲಾಮ್‌ ಕೂಟವಾದ ಯುಎಸ್‌ ಓಪನ್‌ ಆರಂಭಗೊಂಡಿದ್ದು, ಬ್ರಿಟನ್ನಿನ ಆ್ಯಂಡಿ ಮರ್ರೆ ಮೊದಲ ಸುತ್ತಿನ ಆಘಾತಕ್ಕೆ ಸಿಲುಕಿದ್ದಾರೆ. ಇವರನ್ನು ಮಣಿಸಿದ ಸ್ಟೆಫನಸ್‌ ಸಿಸಿಪಸ್‌, ಡ್ಯಾನಿಲ್‌ ಮೆಡ್ವೆಡೇವ್‌, ನವೋಮಿ ಒಸಾಕಾ, ಸಿಮೋನಾ ಹಾಲೆಪ್‌, ಮರಿಯಾ ಸಕ್ಕರಿ ಅವರೆಲ್ಲ ಮೊದಲ ಸುತ್ತಿನಲ್ಲಿ ಪಾಸ್‌ ಆಗಿದ್ದಾರೆ.

ಸಿಸಿಪಸ್‌-ಮರ್ರೆ ನಡುವಿನ ಪಂದ್ಯ 5 ಸೆಟ್‌ಗಳ ತನಕ ಸಾಗಿತು. ಇದನ್ನು ಸಿಸಿಪಸ್‌ 2-6, 7-6 (7), 3-6, 6-4, 6-4ರಿಂದ ಗೆದ್ದು ದೊಡ್ಡ ಕಂಟಕದಿಂದ ಪಾರಾದರು.

ರಶ್ಯದ ಡ್ಯಾನಿಲ್‌ ಮೆಡ್ವಡೇವ್‌ 6-4, 6-3, 6-1 ನೇರ ಸೆಟ್‌ಗಳಿಂದ ಫ್ರಾನ್ಸ್‌ನ ರಿಚರ್ಡ್‌ ಗಾಸ್ಕ್ವೆಟ್‌ಗೆ ಸೋಲುಣಿಸಿದರು. ಸ್ಪೇನಿನ ಬಟಿಸ್ಟ ಅಗುಟ್‌ 6-3, 6-4, 6-0 ಅಂತರದಿಂದ ನಿಕ್‌ ಕಿರ್ಗಿಯೋಸ್‌ ಆಟ ಮುಗಿಸಿದರು.

ಒಸಾಕಾ ಸುಲಭ ಗೆಲುವು:

ವನಿತಾ ವಿಭಾಗದಲ್ಲಿ ಹಾಲಿ ಚಾಂಪಿಯನ್‌ ನವೋಮಿ ಒಸಾಕಾ ಜೆಕ್‌ ಆಟಗಾರ್ತಿ ಮಾರಿ ಬೌಜ್ಕೋವಾ ಅವರನ್ನು 6-4, 6-1ರಿಂದ ಮಣಿಸಿ ದ್ವಿತೀಯ ಸುತ್ತು ಪ್ರವೇಶಿಸಿದರು.

3 ಬಾರಿಯ ಚಾಂಪಿಯನ್‌, ಕಳೆದ ವರ್ಷದ ಫೈನಲ್‌ನಲ್ಲಿ ಒಸಾಕಾಗೆ ಶರಣಾಗಿದ್ದ ವಿಕ್ಟೋರಿಯಾ ಅಜರೆಂಕಾ 6-4, 6-0 ಅಂತರದಿಂದ ಟೆರೆಜಾ ಮಾರ್ಟಿನ್ಕೋವಾ ಅವರನ್ನು ಮಣಿಸಿದರು. ಹಾಗೆಯೇ 2016ರ ಚಾಂಪಿಯನ್‌ ಆ್ಯಂಜೆಲಿಕ್‌ ಕೆರ್ಬರ್‌ 3 ಸೆಟ್‌ಗಳ ಕಾದಾಟದ ಬಳಿಕ ಡಯಾನಾ ಯಸ್ಟ್ರೆಮ್ಸ್‌ಕಾ ವಿರುದ್ಧ ಜಯ ಸಾಧಿಸುವಲ್ಲಿ ಸಫಲರಾದರು. ಅಂತರ 3-6, 6-4, 7-6 (3).

ಈ ವರ್ಷದ ಮೊದಲ ಗ್ರ್ಯಾನ್‌ಸ್ಲಾಮ್‌ ಆಡುತ್ತಿರುವ ಸಿಮೋನಾ ಹಾಲೆಪ್‌ ಇಟಲಿಯ ಕ್ಯಾಮಿಲಾ ಜಾರ್ಜಿ ಅವರನ್ನು 6-4, 7-6 (3)ರಿಂದ ಹಿಮ್ಮೆಟ್ಟಿಸಿದರು.

17 ವರ್ಷದ ಕೊಕೊ ಗಾಫ್‌ 3 ಸೆಟ್‌ ಕಾದಾಟದ ಬಳಿಕ ಮಾಗ್ಡಾ ಲಿನೆಟ್‌ ವಿರುದ್ಧ 5-7, 6-3, 6-4 ಅಂತರದ ಮೇಲುಗೈ ಕಂಡರು. ಅಮೆರಿಕದವರೇ ಆದ ಸ್ಲೋನ್‌ ಸ್ಟೀಫನ್ಸ್‌ ಇವರ ಮುಂದಿನ ಎದುರಾಳಿ.