WPL: ಯುಪಿ ವಿರುದ್ಧ ಡೆಲ್ಲಿ 9 ವಿಕೆಟ್‌ ಜಯಭೇರಿ

Team Udayavani, Feb 26, 2024, 11:24 PM IST

ಬೆಂಗಳೂರು: ವನಿತಾ ಪ್ರೀಮಿಯರ್‌ ಲೀಗ್‌ನ ಸೋಮವಾರದ ಮುಖಾಮುಖಿಯಲ್ಲಿ ಸರ್ವಾಂಗೀಣ ಪ್ರದರ್ಶನ ನೀಡಿದ ಡೆಲ್ಲಿ ಕ್ಯಾಪಿಟಲ್ಸ್‌ 9 ವಿಕೆಟ್‌ಗಳಿಂದ ಯುಪಿ ವಾರಿಯರ್ಗೆ ಸೋಲುಣಿಸಿತು.

ಎರಡೂ ತಂಡಗಳು ತಮ್ಮ ಆರಂಭಿಕ ಪಂದ್ಯದಲ್ಲಿ ಸೋಲನು ಭವಿಸಿದ್ದವು. ಹೀಗಾಗಿ ಪರಾಜಿತ ತಂಡಗಳ ನಡುವಿನ ಈ ಕದನ ತೀವ್ರ ಕುತೂಹಲ ಮೂಡಿಸಿತ್ತು.ಮೊದಲು ಬ್ಯಾಟಿಂಗ್‌ ನಡೆಸಿದ ಯುಪಿ, ದಕ್ಷಿಣ ಆಫ್ರಿಕಾದ ಮಧ್ಯಮ ವೇಗಿ ಮರಿಜಾನ್‌ ಕಾಪ್‌ ಮತ್ತು ಭಾರತದ ಎಡಗೈ ಸ್ಪಿನ್ನರ್‌ ರಾಧಾ ಯಾದವ್‌ ಅವರ ದಾಳಿಗೆ ತತ್ತರಿಸಿ 9 ವಿಕೆಟಿಗೆ ಕೇವಲ 119 ರನ್‌ ಮಾಡಿತು. ಜವಾಬಿತ್ತ ಡೆಲ್ಲಿ 14.3 ಓವರ್‌ಗಳಲ್ಲಿ ಒಂದೇ ವಿಕೆಟಿಗೆ 123 ರನ್‌ ಬಾರಿಸಿತು.
ಮರಿಜಾನ್‌ ಕಾಪ್‌ ಕೇವಲ 5 ರನ್‌ ನೀಡಿ 3 ವಿಕೆಟ್‌ ಉಡಾಯಿಸಿದರು. ಅವರ 4 ಓವರ್‌ಗಳ ಕೋಟಾದಲ್ಲಿ ಒಂದು ಮೇಡನ್‌ ಆಗಿತ್ತು. ರಾಧಾ ಯಾದವ್‌ ಸಾಧನೆ 20ಕ್ಕೆ 4 ವಿಕೆಟ್‌. ಯುಪಿ ಪರ ಶ್ವೇತಾ ಸೆಹ್ರಾವತ್‌ ಸರ್ವಾಧಿಕ 45 ರನ್‌ ಹೊಡೆದರು.

ಚೇಸಿಂಗ್‌ ವೇಳೆ ಆರಂಭಿಕರಾದ ಶಫಾಲಿ ವರ್ಮ-ಮೆಗ್‌ ಲ್ಯಾನಿಂಗ್‌ ಯುಪಿ ಬೌಲರ್‌ಗಳ ಮೇಲೆ ಸವಾರಿ ಮಾಡಿದರು. 14.2 ಓವರ್‌ಗಳಲ್ಲಿ 119 ರನ್‌ ಪೇರಿಸಿದರು. ಸ್ಕೋರ್‌ ಸಮಬಲಗೊಂಡಾಗ ಲ್ಯಾನಿಂಗ್‌ ವಿಕೆಟ್‌ ಬಿತ್ತು. ಎಂದಿನಂತೆ ಆಕ್ರಮಣಕಾರಿಯಾಗಿ ಆಡಿದ ಶಫಾಲಿ 43 ಎಸೆತಗಳಿಂದ ಅಜೇಯ 64 ರನ್‌ ಬಾರಿಸಿದರು. ಸಿಡಿಸಿದ್ದು 6 ಬೌಂಡರಿ ಹಾಗೂ 4 ಸಿಕ್ಸರ್‌. ಲ್ಯಾನಿಂಗ್‌ ಗಳಿಕೆ 51 ರನ್‌.