Vijay Hazare: ಕರ್ನಾಟಕಕ್ಕೆ ಇಂದು ನಾಗಾಲ್ಯಾಂಡ್‌ ಎದುರಾಳಿ

Team Udayavani, Jan 5, 2025, 6:55 AM IST

ಅಹ್ಮದಾಬಾದ್‌: ವಿಜಯ್‌ ಹಜಾರೆ ಟ್ರೋಫಿ ಲಿಸ್ಟ್‌ “ಎ’ ಏಕದಿನ ಪಂದ್ಯಾವಳಿಯ 7ನೇ ಸುತ್ತಿನಲ್ಲಿ ಭಾನುವಾರ ಕರ್ನಾಟಕ ತಂಡ ನಾಗಾಲ್ಯಾಂಡ್‌ ವಿರುದ್ಧ ಕಣಕ್ಕಿಳಿಯಲಿದೆ. ಗ್ರೂಪ್‌ “ಸಿ’ಯಲ್ಲಿರುವ ಮಾಯಾಂಕ್‌ ಅಗರ್ವಾಲ್‌ ಪಡೆಗೆ ಕ್ವಾರ್ಟರ್‌ ಫೈನಲ್‌ ಪ್ರವೇಶದ ನಿಟ್ಟಿನಲ್ಲಿ ಈ ಪಂದ್ಯದಲ್ಲಿ ಗೆಲುವು ಅನಿವಾರ್ಯವಾಗಿದೆ.

ಸದ್ಯ ಆಡಿರುವ 6 ಪಂದ್ಯಗಳಲ್ಲಿ 5 ಜಯ, 1 ಡ್ರಾದೊಂದಿಗೆ ರಾಜ್ಯ ತಂಡ ಅಂಕಪಟ್ಟಿಯಲ್ಲಿ 20 ಅಂಕ ಗಳಿಸಿ ದ್ವಿತೀಯ ಸ್ಥಾನದಲ್ಲಿದೆ. ಇಷ್ಟೇ ಅಂಕ ಗಳಿಸಿರುವ ಪಂಜಾಬ್‌, ನೆಟ್‌ ರನ್‌ರೇಟ್‌ ಆಧಾರದಲ್ಲಿ ಅಗ್ರ ಸ್ಥಾನದಲ್ಲಿದೆ. ಹೀಗಾಗಿ ಭಾನುವಾರದ ಪಂದ್ಯವನ್ನು ದೊಡ್ಡ ಅಂತರದಲ್ಲಿ ಗೆದ್ದರೆ ಕರ್ನಾಟಕ ತಂಡ ಅಗ್ರ ಸ್ಥಾನಿಯಾಗಿ ಕ್ವಾರ್ಟರ್‌ ಫೈನಲ್‌ಗೆ ನೇರ ಪ್ರವೇಶ ಪಡೆದುಕೊಳ್ಳಲು ಅವಕಾಶವಿದೆ. ಮತ್ತೂಂದೆಡೆ, ಈ ಗುಂಪಿನ ಅಗ್ರಸ್ಥಾನಿ ಪಂಜಾಬ್‌, ದುರ್ಬಲ ಪುದುಚೇರಿ ವಿರುದ್ಧ ಅಪ್ಪಿತಪ್ಪಿ ಸೋತರೂ ಕರ್ನಾಟಕ ಕ್ವಾರ್ಟರ್‌ಗೆ ಪ್ರವೇಶಿಸಲಿದೆ. ಇತ್ತ ನಾಗಾಲ್ಯಾಂಡ್‌, 6ರಲ್ಲಿ ಕೇವಲ 1 ಪಂದ್ಯ ಮಾತ್ರ ಗೆದ್ದು 7ನೇ ಸ್ಥಾನದಲ್ಲಿರುವುದರಿಂದ ಕರ್ನಾಟಕ ಗೆಲುವಿನ ವಿಶ್ವಾಸದಲ್ಲಿದೆ.