Vijay Hazare Trophy ಕ್ವಾರ್ಟರ್‌ ಫೈನಲ್‌ : ಕರ್ನಾಟಕಕ್ಕೆ ಬರೋಡ ಸವಾಲು

Team Udayavani, Jan 11, 2025, 1:14 AM IST

ವಡೋದರ: ವಿಜಯ್‌ ಹಜಾರೆ ಟ್ರೋಫಿ ಏಕದಿನ ಪಂದ್ಯಾ ವಳಿಯ ಕ್ವಾರ್ಟರ್‌ ಫೈನಲ್‌ ಪಂದ್ಯಗಳು ಶನಿವಾರದಿಂದ ಆರಂಭವಾಗಲಿವೆ. ಒಂದು ಪಂದ್ಯದಲ್ಲಿ ಆತಿಥೇಯ ಬರೋಡ – ಕರ್ನಾಟಕ, ಇನ್ನೊಂದರಲ್ಲಿ ಮಹಾರಾಷ್ಟ್ರ – ಪಂಜಾಬ್‌ ಮುಖಾ ಮುಖಿ ಆಗಲಿವೆ.

ಮಾಯಾಂಕ್‌ ಅಗರ್ವಾಲ್‌ ನಾಯಕ ತ್ವದ ಕರ್ನಾಟಕ ತಂಡ ಲೀಗ್‌ ಹಂತದ 6 ಪಂದ್ಯಗಳನ್ನು ಗೆದ್ದು, ಒಂದರಲ್ಲಿ ಎಡವಿ “ಸಿ’ ಗುಂಪಿನ ಅಗ್ರಸ್ಥಾನದೊಂದಿಗೆ ನೇರವಾಗಿ ಕ್ವಾರ್ಟರ್‌ ಫೈನಲ್‌ ಪ್ರವೇ ಶಿಸಿದೆ. ಅತ್ತ “ಇ’ ಗುಂಪಿನಲ್ಲಿ ಕೃಣಾಲ್‌ ಪಾಂಡ್ಯ ನೇತೃತ್ವದ ಬರೋಡ 6ರಲ್ಲಿ 5 ಜಯ, ಒಂದು ಸೋಲಿನೊಂದಿಗೆ ಅಗ್ರಸ್ಥಾನಿಯಾಗಿ ಕ್ವಾರ್ಟರ್‌ ಫೈನಲ್‌ ಅರ್ಹತೆ ಸಂಪಾದಿಸಿತ್ತು. ಎರಡೂ ತಂಡ ಗಳೂ ಬಲಿಷ್ಠವೇ ಆಗಿರುವುದರಿಂದ ಪಂದ್ಯ ಕುತೂಹಲ ಮೂಡಿಸಿದೆ. ಆದರೆ ಲೀಗ್‌ ಹಂತದಲ್ಲಿ ಇತರ ಮುಂಬಯಿ, ಪಂಜಾಬ್‌, ಸೌರಾಷ್ಟ್ರ ವಿರುದ್ಧ ಗೆದ್ದಿರುವ ಕರ್ನಾಟಕ, ಬರೋಡವನ್ನೂ ಮಣಿಸುವ ವಿಶ್ವಾಸದಲ್ಲಿದೆ.

ಬರೋಡ ತಂಡದಲ್ಲಿ ಶಾಶ್ವತ್‌ ರಾವತ್‌ ಮತ್ತು ಭಾನು ಪನಿಯಾ ಉತ್ತಮ ಪ್ರದರ್ಶನ ಕಾಯ್ದುಕೊಂಡು ಬಂದಿದ್ದಾರೆ. ಆದರೆ ಬರೋಡಕ್ಕೆ ಹೋಲಿಸಿದರೆ ಕರ್ನಾಟಕವೇ ಕೊಂಚ ಬಲಿಷ್ಠವಾಗಿ ಗೋಚರಿಸುತ್ತದೆ.
ನಾಯಕ ಮಾಯಾಂಕ್‌ ಅಗರ್ವಾಲ್‌ ಭರ್ಜರಿ ಪ್ರದರ್ಶನ ನೀಡಿದ್ದಾರೆ. ಆಡಿದ 7 ಇನಿಂಗ್ಸ್‌ಗಳಲ್ಲಿ 4 ಶತಕಗಳ ಸಹಿತ 613 ರನ್‌ ಪೇರಿಸಿ ಗರಿಷ್ಠ ರನ್‌ ಸಾಧಕನಾಗಿ ಗೋಚರಿಸಿದ್ದಾರೆ. ನಿಕಿನ್‌ ಜೋಸ್‌, ಅನೀಶ್‌, ಸ್ಮರಣ್‌, ಶ್ರೀಜಿತ್‌, ಅಭಿನವ್‌ ಮನೋಹರ್‌ ಕೂಡ ಉತ್ತಮ ಲಯದಲ್ಲಿದ್ದಾರೆ. ಹಾರ್ದಿಕ್‌ ರಾಜ್‌ ಆಲ್‌ರೌಂಡ್‌ ಪ್ರದರ್ಶನದೊಂದಿಗೆ ಮಿಂಚುತ್ತಿದ್ದಾರೆ. ಪಡಿಕ್ಕಲ್‌, ಪ್ರಸಿದ್ಧ್ ಕೃಷ್ಣ ಆಡಲಿಳಿದರೆ ತಂಡ ಇನ್ನಷ್ಟು ಬಲಗೊಳ್ಳುವುದರಲ್ಲಿ ಅನುಮಾನವಿಲ್ಲ.