Vijayapura; ಪತ್ನಿಯ ಅಪ್ರಾಪ್ತ ವಯಸ್ಕ ತಂಗಿಯ ರೇಪ್; ಆರೋಪಿಗೆ ಜೀವಾವಧಿ ಶಿಕ್ಷೆ

Team Udayavani, Jul 14, 2023, 8:23 PM IST

ವಿಜಯಪುರ: ತನ್ನ ಪತ್ನಿಯ ಅಪ್ರಾಪ್ತ ತಂಗಿಯ ಮೇಲೆ ಅತ್ಯಾಚಾರ ಎಸಗಿದವನಿಗೆ ಸ್ಥಳೀಯ ವಿಶೇಷ ಪೋಕ್ಸೋ ನ್ಯಾಯಾಲಯ ಜೀವಾವಧಿ ಶಿಕ್ಷೆ ಹಾಗೂ 26 ಸಾವಿರ ರೂ. ದಂಡ ವಿಧಿಸಿ ಆದೇಶ ಹೊರಡಿಸಿದೆ.

ತಾಳಿಕೋಟೆ ತಾಲೂಕಿನ ಬೊಮ್ಮನಹಳ್ಳಿ ಗ್ರಾಮದ ಶಿವರಾಜ ಬಸವಂತಪ್ಪ ಬಡಿಗೇರ (29) ಎಂಬಾತ ಜೀವಾವಧಿ ಶಿಕ್ಷೆಗೆ ಗುರಿಯಾಗಿರುವ ವ್ಯಕ್ತಿ. ವಿಜಯಪುರ ಜಿಲ್ಲೆಯ ಮೂಲದವರಾದರೂ ಸಂತ್ರಸ್ತೆಯ ಕುಟುಂಬದವರು ಕೆಲಸದ ನಿಮಿತ್ತ ಬೆಂಗಳೂರಿನಲ್ಲಿ ನೆಲೆಸಿದ್ದರು. 2020 ಮಾರ್ಚ್ ತಿಂಗಳಲ್ಲಿ ಸಂಬಂಧಿಗಳ ಮದುವೆಗಾಗಿ ಬೊಮ್ಮನಹಳ್ಳಿಗೆ ಬಂದಿದ್ದರು.

ಈ ಹಂತದಲ್ಲಿ ಕೋವಿಡ್ ಸಾಂಕ್ರಾಮಿಕ ರೋಗ ಹಾವಳಿ ಇದ್ದ ಕಾರಣ ಬೆಂಗಳೂರಿನ ಮನೆಯಲ್ಲಿ ಅಪ್ತಾಪ್ತ ವಯಸ್ಕ ಮಕ್ಕಳು ಇರುವುದು ಬೇಡವೆಂದು ಬೆಂಗಳೂರಿನಲ್ಲೇ ಇದ್ದ ತಮ್ಮ ಮಗಳ (ಶಿವರಾಜ ಬಡಿಗೇರ) ಮನೆಯಲ್ಲಿ ಅಪ್ರಾಪ್ತ ವಯಸ್ಕ ಮಗಳನ್ನು ಬಿಡಲಾಗಿತ್ತು.

2020 ಎಪ್ರಿಲ್ 18 ರಂದು ತನ್ನ ಪತ್ನಿ ಮನೆಯಲ್ಲಿ ಇಲ್ಲದಿರುವುದನ್ನು ನೋಡಿದ ಶಿವರಾಜ ತನ್ನ ಪತ್ನಿಯ ತಂಗಿಯ ಮೆಲೆ ಅತ್ಯಾಚಾರ ಎಸಗಿದ್ದಲ್ಲದೇ, ಘಟನೆ ಕುರಿತು ಮನೆಯಲ್ಲಿ ಯಾರಿಗಾದರೂ ಹೇಳಿದರೆ ನಿಮ್ಮ ಕುಟುಂದವರನ್ನು ಹತ್ಯೆ ಮಾಡುವುದಾಗಿ ಬೆದರಿಕೆ ಹಾಕಿದ್ದ.

ಕೋವಿಡ್ ಕಾರಣಕ್ಕೆ ಕುಟುಂಬದವರೆಲ್ಲ ಬೊಮ್ಮನಹಳ್ಳಿಗೆ ಮರಳಿದಾಗಲೂ ಶಿವರಾಜ ಅಪ್ರಾಪ್ತೆ ಮೇಲೆ ಅತ್ಯಾಚಾರ ಮಾಡಿದ್ದ. ಆಗ ವಿಷಯ ಬಾಲಕಿಯ ಮನೆಯವರಿಗೆ ಗೊತ್ತಾಗಿ, ಗ್ರಾಮಸ್ತರ ಸಮ್ಮುಖದಲ್ಲಿ ಬುದ್ದಿವಾದ ಹೇಳಿದ್ದರು. ಆದರೆ ಅತ್ಯಾಚಾರ ಎಸಗಿದ ಶಿವರಾಜ, ಹೆಂಡತಿಯ ತಂಗಿಯಾದ ಸಂತ್ರಸ್ತೆಯನ್ನು ತನಗೆ ಮದುವೆ ಮಾಡಿಕೊಡುವಂತೆ ಪಟ್ಟು ಹಿಡಿದಿದ್ದ.

ಇದರಿಂದಾಗಿ ಸಂತ್ರಸ್ತೆಯ ತಾಯಿ ಲಕ್ಷ್ಮೀ ಹಟ್ಟಿ ನೀಡಿದ ದೂರಿನಂತೆ ಪ್ರಕರಣ ದಾಖಲಿಸಿಕೊಂಡಿದ್ದು, ತಾಳೀಕೋಟೆ ಪೊಲೀಸರು, ತನಿಖೆ ನಡೆಸಿ, ನ್ಯಾಯಾಲಯಕ್ಕೆ ದೋಷಾರೋಪ ಪಟ್ಟಿ ಸಲ್ಲಿಸಿದ್ದರು.

ಪ್ರಕರಣದ ವಿಚಾರಣೆ ನಡೆಸಿದಾಗ ಆರೋಪ ರುಜುವಾದ ಕಾರಣ ವಿಜಯಪುರ ವಿಶೇಷ ಪೋಕ್ಸೋ ನ್ಯಾಯಾಲಯದ ನ್ಯಾಯಾಧೀಶರಾದ ರಾಮ ನಾಯಕ ಇವರು ಅತ್ಯಾಚಾರ ಕೃತ್ಯದ ಎಸಗಿದ ಶಿವರಾಜ ಬಡಿಗೇರಗೆ ಜೀವಾವಧಿ ಶಿಕ್ಷೆ ಹಾಗೂ 26 ಸಾವಿರ ರೂ. ದಂಡ ವಿಧಿಸಿದ್ದಾರೆ. ಸರ್ಕಾರದ ಪರವಾಗಿ ಸರ್ಕಾರಿ ವಿಶೇಷ ಅಭಿಯೋಜಕರಾದ ವಿ.ಜಿ.ಹಗರಗೊಂಡ ವಾದ ಮಂಡಿಸಿದ್ದರು.