ಪ್ರೊ ಬಾಕ್ಸಿಂಗ್‌ನಲ್ಲಿ ವಿಜೇಂದರ್‌ಗೆ 9ನೇ ಜಯ

Team Udayavani, Aug 6, 2017, 8:15 AM IST

ಮುಂಬಯಿ: ಪ್ರೊ ಬಾಕ್ಸಿಂಗ್‌ ರಿಂಗ್‌ಗೆ ಇಳಿದ ಮೇಲೆ ಸೋಲಿಲ್ಲದ ಸರದಾರರಾಗಿರುವ ಭಾರತದ ಸ್ಟಾರ್‌ ಬಾಕ್ಸರ್‌ ವಿಜೇಂದರ್‌ ಸಿಂಗ್‌ ಡಬ್ಲೂéಬಿಒ ಏಶ್ಯ ಪೆಸಿಫಿಕ್‌ ಸೂಪರ್‌ ಮಿಡಲ್‌ವೇಟ್‌ ಹಣಾಹಣಿಯಲ್ಲಿ ಜಯ ಸಾಧಿಸಿದ್ದಾರೆ. ಕಠಿನ ಎದುರಾಳಿಯಾಗಿದ್ದ ಚೀನದ ಜುಲ್ಫಿàಕರ್‌ ಮಾಯ್‌ಮಾಯ್‌ತಿಯಾಲಿ ಅವರಿಗೆ ಭರ್ಜರಿ ಆಘಾತ ನೀಡಿದ್ದಾರೆ.

ಶನಿವಾರ ನಡೆದ 10 ಸುತ್ತಿನ ಪಂದ್ಯದಲ್ಲಿ ವಿಜೇಂದರ್‌ ಭರ್ಜರಿ ಪ್ರದರ್ಶನ ನೀಡಿದರು. ಆರಂಭದ ಸುತ್ತುಗಳಲ್ಲಿ ಇಬ್ಬರು ಬಾಕ್ಸರ್‌ಗಳ ನಡುವೆ ತೀವ್ರ ಸ್ಪರ್ಧೆ ನಡೆಯಿತು. ಇಬ್ಬರು ಆಟಗಾರರು ಬಲವಾಗಿ ಮೂಗಿಗೆ ಪಂಚ್‌ ಮಾಡಿಕೊಂಡಿರುವ ಕಾರಣ ಇಬ್ಬರ ಮೂಗಿನಲ್ಲಿಯೂ ರಕ್ತ ಸುರಿಯುತ್ತಿತ್ತು. ಆದರೆ ವಿಜೇಂದರ್‌ ಅಂಕ ಗಳಿಕೆಯಲ್ಲಿ ಮೇಲುಗೈ ಸಾಧಿಸುವಲ್ಲಿ ಯಶಸ್ವಿಯಾದರು. ಈ ಗೆಲುವಿನೊಂದಿಗೆ ವಿಜೇಂದರ್‌ ಪ್ರೊ ಬಾಕ್ಸಿಂಗ್‌ನಲ್ಲಿ ಗೆಲುವಿನ ಓಟವನ್ನು 9ಕ್ಕೇರಿಸಿದರು.

ಜಯದೊಂದಿಗೆ ಜಿತೇಂದ್ರ, ಅಖೀಲ್‌ ಪಾದಾರ್ಪಣೆ:
ಇದೇ ಮೊದಲ ಬಾರಿಗೆ ವೃತ್ತಿಪರ ಬಾಕ್ಸಿಂಗ್‌ ರಿಂಗ್‌ಗೆ ಇಳಿದಿರುವ ಭಾರತದ ಜಿತೇಂದರ್‌ ಕುಮಾರ್‌ ಮತ್ತು ಅಖೀಲ್‌ ಕುಮಾರ್‌ ಪಾದಾರ್ಪಣೆ ಪಂದ್ಯದಲ್ಲಿಯೇ ಜಯ ಸಾಧಿಸಿದ್ದಾರೆ.