ಮೂರನೇ ಗೆಲುವಿನ ನಿರೀಕ್ಷೆಯಲ್ಲಿ ಕೊಹ್ಲಿ

Team Udayavani, Dec 16, 2020, 9:27 PM IST

ಅಡಿಲೇಡ್: ಈ ಸರಣಿಯಲ್ಲಿ ಕೇವಲ ಒಂದೇ ಟೆಸ್ಟ್‌ ಆಡಲಿರುವ ವಿರಾಟ್‌ ಕೊಹ್ಲಿಗೆ ಇಲ್ಲಿ ಗೆಲುವು ಒಲಿದರೆ ಹೊಸ ದಾಖಲೆಯೊಂದು ನಿರ್ಮಾಣವಾಗಲಿದೆ. ಆಗ ಅವರು ಆಸ್ಟ್ರೇಲಿಯದಲ್ಲಿ ಅತ್ಯಧಿಕ 3 ಟೆಸ್ಟ್‌ ಪಂದ್ಯಗಳನ್ನು ಗೆದ್ದ ಏಶ್ಯದ ನಾಯಕನಾಗಿ ಮೂಡಿಬರಲಿದ್ದಾರೆ.

ಈ ವರೆಗೆ ಭಾರತದ ಬಿಷನ್‌ ಸಿಂಗ್‌ ಬೇಡಿ, ಪಾಕಿಸ್ಥಾನದ ಮುಷ್ತಾಕ್‌ ಮೊಹಮ್ಮದ್‌ ಅವರೊಂದಿಗೆ ಕೊಹ್ಲಿ ಜಂಟಿ ಮೊದಲ ಸ್ಥಾನದಲ್ಲಿದ್ದಾರೆ. ಮೂವರೂ ಆಸ್ಟ್ರೇಲಿಯದಲ್ಲಿ ತಲಾ 2 ಟೆಸ್ಟ್‌ ಗೆದ್ದಿದ್ದಾರೆ.

ಬೇಡಿ 1977-78ರ ಸರಣಿ ವೇಳೆ ಆಡಲಾದ 5 ಪಂದ್ಯಗಳ ಸರಣಿಯ 3ನೇ ಹಾಗೂ 4ನೇ ಟೆಸ್ಟ್‌ಗಳಲ್ಲಿ (ಮೆಲ್ಬರ್ನ್ ಮತ್ತು ಸಿಡ್ನಿ)ಗೆಲುವು ಸಾಧಿಸಿದ್ದರು. ಮುಷ್ತಾಕ್‌ ಮೊಹಮ್ಮದ್‌ 1977ರ ಸಿಡ್ನಿ ಮತ್ತು 1979ರ ಮೆಲ್ಬರ್ನ್ ಟೆಸ್ಟ್‌ನಲ್ಲಿ ಜಯ ಕಂಡಿದ್ದರು.

ವಿರಾಟ್‌ ಕೊಹ್ಲಿ 2018-19ರಲ್ಲಿ 2 ಗೆಲುವು ಸಾಧಿಸಿದ್ದಲ್ಲದೆ ಸರಣಿಯನ್ನೂ ವಶಪಡಿಸಿಕೊಂಡು ಮೆರೆದಿದ್ದರು.