ಶಾರುಖ್‌ ಬ್ರಾಂಡ್‌ ಮೌಲ್ಯ ಹಿಂದಿಕ್ಕುವತ್ತ ಕೊಹ್ಲಿ ದಾಪುಗಾಲು

Team Udayavani, Feb 18, 2017, 3:45 AM IST

ನವದೆಹಲಿ: ಇತ್ತೀಚೆಗೆ ಭಾರತ ತಂಡದ ನಾಯಕ ವಿರಾಟ್‌ ಕೊಹ್ಲಿ ಮುಟ್ಟಿದೆಲ್ಲ ಚಿನ್ನವಾಗುತ್ತಿದೆ. ಹಾಗೇ ಕೊಹ್ಲಿ ಬ್ರಾಂಡ್‌ ಮೌಲ್ಯ ಕೂಡ ವರ್ಷದಿಂದ ವರ್ಷಕ್ಕೆ ಏರುತ್ತಿದೆ. ಅದು ಯಾವ ಪ್ರಮಾಣದಲ್ಲಿ ಅಂದರೆ ಬಾಲಿವುಡ್‌ ಸೂಪರ್‌ ಸ್ಟಾರ್‌ ಶಾರುಖ್‌ ಖಾನ್‌ ಬ್ರಾಂಡ್‌ ಮೌಲ್ಯ ಮೀರುವ ಮಟ್ಟದಲ್ಲಿ!

ಕಳೆದ ವರ್ಷ ಅಕ್ಟೋಬರ್‌ ಅಷ್ಟೊತ್ತಿಗೆ ಶಾರುಖ್‌ ಖಾನ್‌ ಬ್ರಾಂಡ್‌ ಮೌಲ್ಯ 800 ಕೋಟಿ ರೂ. ಇತ್ತು. ಅದೇ ವೇಳೆ ಕೊಹ್ಲಿ ಬ್ರಾಂಡ್‌ ಮೌಲ್ಯ 600 ಕೋಟಿ ರೂ. ಇತ್ತು. ಅದಾದ ನಂತರ ಕೊಹ್ಲಿಯ ಬ್ರಾಂಡ್‌ ಮೌಲ್ಯ ಶೇ.20ರಿಂದ 25ರಷ್ಟು ಏರಿದೆ. ಆದ್ದರಿಂದ ಶಾರುಖ್‌ರನ್ನು ಕೊಹ್ಲಿ ಮೀರುವುದರಲ್ಲಿ ಸಂಶಯವೇ ಇಲ್ಲ ಎಂದು ಜಾಗತಿಕ ಹಣಕಾಸು ಸಲಹೆಗಾರ ನಿಯತಕಾಲಿಕೆ ಡಫ್ ಆ್ಯಂಡ್‌ ಫೆಲ್ಪ್ ಹೇಳಿದೆ.

ಕೊಹ್ಲಿ ಎಲ್ಲಾ ಮಾದರಿಯಲ್ಲಿಯೂ ಭರ್ಜರಿ ಫಾರ್ಮ್ ಪ್ರದರ್ಶಿಸುತ್ತಿದ್ದಾರೆ. ಕಳೆದ ನಾಲ್ಕು ಟೆಸ್ಟ್‌ ಸರಣಿಯಲ್ಲಿ ದ್ವಿಶತಕ ಬಾರಿಸಿದ್ದಾರೆ. ಏ.23ರಿಂದ ಭಾರತ ಮತ್ತು ಆಸ್ಟ್ರೇಲಿಯಾ ನಡುವೆ ನಾಲ್ಕು ಪಂದ್ಯಗಳ ಟೆಸ್ಟ್‌ ಸರಣಿ ಆರಂಭವಾಗಲಿದೆ. ಇದು ಕೂಡ ಕೊಹ್ಲಿ ಮೌಲ್ಯದ ಮೇಲೆ ಪರಿಣಾಮ ಬೀರುತ್ತದೆ. ಕೊಹ್ಲಿ ಟೆಸ್ಟ್‌ನಲ್ಲಿ 895 ಅಂಕ ಹೊಂದಿದ್ದು, ವಿಶ್ವ ನಂ.2 ಶ್ರೇಯಾಂಕದಲ್ಲಿದ್ದಾರೆ. ಆಸ್ಟ್ರೇಲಿಯಾದ ಸ್ಟೀವ್‌ ಸ್ಮಿತ್‌ 933 ಅಂಕದೊಂದಿಗೆ ವಿಶ್ವ ನಂ.1 ಶ್ರೇಯಾಂಕದಲ್ಲಿದ್ದಾರೆ. ಒಮ್ಮೆ ಕೊಹ್ಲಿ ಸ್ಥಿರ ಪ್ರದರ್ಶವನ್ನು ಕಾಯ್ದುಕೊಂಡು, ಸ್ಮಿತ್‌ ವೈಫ‌ಲ್ಯ ಎದುರಿಸಿದರೆ ಕೊಹ್ಲಿ ನಂ.1 ಸ್ಥಾನಕ್ಕೇರಲಿದ್ದಾರೆ. ಹೀಗಾದರೆ ಕೊಹ್ಲಿ ಬ್ರಾಂಡ್‌ ಮೌಲ್ಯ ಮತ್ತೂಷ್ಟು ಹೆಚ್ಚಾಗುವುದರಲ್ಲಿ ಯಾವುದೇ ಸಂದೇಹವಿಲ್ಲ.