ವಿರಾಟ್‌ ಕೊಹ್ಲಿ ಪ್ರತಿಮೆಯ ಕಿವಿ ಭಗ್ನ!

Team Udayavani, Jun 8, 2018, 6:00 AM IST

ಹೊಸದಿಲ್ಲಿ: ಇಲ್ಲಿನ “ಮೇಡಂ ಟುಸ್ಸಾಡ್ಸ್‌’ನಲ್ಲಿ ಅನಾವರಣಗೊಂಡ ಒಂದೇ ದಿನದಲ್ಲಿ ವಿರಾಟ್‌ ಕೊಹ್ಲಿ ಅವರ ಮೇಣದ ಪ್ರತಿಮೆ ಭಗ್ನಗೊಂಡಿದೆ. ಅಭಿಮಾನಿಗಳ ನೂಕುನುಗ್ಗಲು, ಸೆಲ್ಫಿ ಕ್ರೇಜ್‌ನಿಂದ ಕೊಹ್ಲಿ ಪ್ರತಿಮೆಯ ಬಲ ಕಿವಿ ಮುರಿಯಲ್ಪಟ್ಟಿದೆ ಎಂದು ವರದಿಯಾಗಿದೆ. 

ಹಾನಿ ಸಂಭವಿಸಿದೊಡನೆಯೇ ಮೇಣದ ಪ್ರತಿಮೆಯನ್ನು ದುರಸ್ತಿಗೊಳಿಸಲು ವರ್ಕ್‌ಶಾಪ್‌ಗೆ ಕೊಂಡೊಯ್ಯಲಾಗಿದೆ ಎಂದು “ಸ್ಟೇಟ್ಸ್‌ಮನ್‌’ ವರದಿ ಮಾಡಿದೆ. ಈ ಸಂದರ್ಭದಲ್ಲಿ ಮ್ಯೂಸಿಯಂನ ನಿರ್ದೇಶಕ ಅಂಶುಲ್‌ ಜೈನ್‌ ಮಾತಾಡಿ, “ವಿರಾಟ್‌ ಕೊಹ್ಲಿ ಕ್ರಿಕೆಟಿಗೆ ಅಪಾರ ಕೊಡುಗೆ ಸಲ್ಲಿಸಿದ ಆಟಗಾರ. ಅವರ ಸಾಧನೆಯಿಂದ ಸ್ಫೂರ್ತಿಗೊಂಡು ಮೇಣದ ಪ್ರತಿಮೆ ಸ್ಥಾಪಿಸಲು ಉದ್ದೇಶಿಸಿದೆ. ಶೀಘ್ರದಲ್ಲೇ ಇದು ಯಥಾ ಸ್ಥಾನ ಸೇರಲಿದೆ. ಮುಂದೆ ಇಲ್ಲಿ ಧೋನಿ ಪ್ರತಿಮೆಯನ್ನೂ ಸ್ಥಾಪಿಸಲಾಗುವುದು’ ಎಂದಿದ್ದಾರೆ.