ಇಂದಿನಿಂದ ವಾಲಿಬಾಲ್‌ ಲೀಗ್‌ ಆರಂಭ

Team Udayavani, Feb 2, 2019, 2:37 AM IST

ಕೊಚ್ಚಿ: ದೇಶದಲ್ಲಿ ಇದೀಗ ಐಪಿಎಲ್‌ (ಇಂಡಿಯನ್‌ ಪ್ರೀಮಿಯರ್‌ ಲೀಗ್‌) ಮಾದರಿಯಲ್ಲಿ ವಿವಿಧ ಕ್ರೀಡೆಗಳ ಲೀಗ್‌ಗಳೇ ಹೆಚ್ಚು ಸದ್ದು ಮಾಡುತ್ತಿವೆ. ಈ ಸಾಲಿಗೆ ಇದೀಗ ವಾಲಿಬಾಲ್‌ ಲೀಗ್‌ ಕೂಡ ಸೇರಿಕೊಂಡಿದೆ. ಶನಿವಾರದಿಂದ ಮೊದಲ ಆವೃತ್ತಿ ಪ್ರೊ ವಾಲಿಬಾಲ್‌ ಲೀಗ್‌ ಆರಂಭವಾಗುತ್ತಿದೆ.

ಕೊಚ್ಚಿ ರಾಜೀವ್‌ ಗಾಂಧಿ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆಯಲಿರುವ ಮೊದಲ ಪಂದ್ಯದಲ್ಲಿ ಆತಿಥೇಯ ಕೊಚ್ಚಿ ಬ್ಲ್ಯೂಸ್ಪೈಕರ್ ತಂಡವನ್ನು ಯು ಮುಂಬಾ ವಾಲಿ ತಂಡ ಎದುರಿಸಲಿದೆ. ಕೂಟದಲ್ಲಿ ಅಹ್ಮದಾಬಾದ್‌ ಡಿಫೆಂಡರ್, ಹೈದರಾಬಾದ್‌ ಬ್ಲ್ಯಾಕ್‌ ಹಾವ್ಕ್ಸ್ , ಕ್ಯಾಲಿಕಟ್ ಹೀರೋಸ್‌, ಚೆನ್ನೈ ಸ್ಪಾರ್ಥನ್ಸ್‌, ಕೊಚ್ಚಿ ಬ್ಲ್ಯೂಸ್ಪೈಕರ್ ಮತ್ತು ಯು ಮುಂಬಾ ವಾಲಿ ಸೇರಿದಂತೆ ಒಟ್ಟು 6 ತಂಡಗಳು ಪಾಲ್ಗೊಳ್ಳುತ್ತಿವೆ. ಮೊದಲ 12 ಪಂದ್ಯಗಳು ಕೊಚ್ಚಿಯಲ್ಲಿ ನಡೆಯಲಿದೆ. ಉಳಿದಂತೆ ಸೆಮಿಫೈನಲ್‌, ಫೈನಲ್‌ ಸೇರಿದಂತೆ ಒಟ್ಟು 6 ಪಂದ್ಯಕ್ಕೆ ಚೆನ್ನೈ ಆತಿಥ್ಯ ವಹಿಸಲಿದೆ. ಫೆ.22ಕ್ಕೆ ಫೈನಲ್‌ ನಡೆಯಲಿದೆ. ಕೂಟದಲ್ಲಿ ಕರ್ನಾಟಕದ ತಂಡ ಇಲ್ಲದಿದ್ದರೂ ರಾಜ್ಯದ ಸಾಕಷ್ಟು ಮಂದಿ ಆಟಗಾರರು ಕೂಟದಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ ಎಂದು ಸಂಘಟಕರು ತಿಳಿಸಿದ್ದಾರೆ.