WFI;ಅಂತೂ ಡಿ. 21ಕ್ಕೆ ಭಾರತ ಕುಸ್ತಿ ಒಕ್ಕೂಟದ ಚುನಾವಣೆ

Team Udayavani, Dec 11, 2023, 6:11 AM IST

ಹೊಸದಿಲ್ಲಿ: ವಿವಾದ ಗಳಿಂದ ತತ್ತರಿಸಿ ಹೋಗಿ, ಹಲವು ಬಾರಿ ಮುಂದೂಡಲ್ಪಟ್ಟಿದ್ದ ಭಾರತ ಕುಸ್ತಿ ಒಕ್ಕೂಟದ (ಡಬ್ಲ್ಯುಎಫ್ಐ) ಚುನಾವಣೆ ಅಂತೂ ನಡೆಯಲಿದೆ. ಡಿ. 21ಕ್ಕೆ ಚುನಾವಣೆ, ಅಂದೇ ಫ‌ಲಿ ತಾಂಶವೂ ಪ್ರಕಟವಾಗಲಿದೆ ಎಂದು ಸಂಸ್ಥೆಯ ಚುನಾವಣಾಧಿಕಾರಿ ಹೇಳಿದ್ದಾರೆ.

ಇತ್ತೀಚೆಗೆ ಸರ್ವೋಚ್ಚ ನ್ಯಾಯಾ ಲಯ ಚುನಾವಣೆಗೆ ಪಂಜಾಬ್‌- ಹರ್ಯಾಣ ಉಚ್ಚ ನ್ಯಾಯಾಲಯ ನೀಡಿದ್ದ ತಡೆಯನ್ನು ತೆರವು ಮಾಡಿತ್ತು. ಅದರ ಬೆನ್ನಲ್ಲೇ ದಿನಾಂಕವೂ ನಿಗದಿಯಾಗಿದೆ. ಹಲವು ಬಾರಿ ಸರ್ವೋಚ್ಚ ನ್ಯಾಯಾಲಯ ಚುನಾವಣೆಯನ್ನು ಕೂಡಲೇ ನಡೆಸಬೇಕೆಂದು ಆದೇಶಿಸಿದ್ದರೂ ವಿವಿಧ ಅಧೀನ ನ್ಯಾಯಾಲಯಗಳ ಆದೇಶಗಳಿಂದ ಮುಂದೂಡಲ್ಪಡುತ್ತಿತ್ತು.

ಇದೀಗ ಎಲ್ಲ ವಿಘ್ನಗಳೂ ತೆರವಾಗಿವೆ. ಡಬ್ಲ್ಯುಎಫ್ಐನ ನಾಯಕತ್ವ ಬದಲಿಸಬೇಕು, ಬಿಜೆಪಿ ಸಂಸದ ಬ್ರಿಜ್‌ಭೂಷಣ ಶರಣ್‌ ಸಿಂಗ್‌ ಮತ್ತು ಅವರ ಬೆಂಬಲಿಗರು ಚುನಾವಣೆಗೆ ಸ್ಪರ್ಧಿಸಬಾರದು ಎಂದು ವಿನೇಶ್‌ ಫೊಗಾಟ್‌, ಬಜರಂಗ್‌ ಪುನಿಯ ಹೊಸದಿಲ್ಲಿಯಲ್ಲಿ ಬೃಹತ್‌ ಹೋರಾಟ ಮಾಡಿದ್ದರು. ಅಂತಿಮವಾಗಿ ಅವರೆಲ್ಲ ಬೇಡಿಕೆಗಳಿಗೆ ಕೇಂದ್ರ ಕ್ರೀಡಾ ಸಚಿವಾಲಯ ಒಪ್ಪಿಗೆ ಸೂಚಿಸಿತ್ತು.