ಐಪಿಎಲ್‌ 2020: ತಂಡದ ನಾಯಕರಿಗೇಕೆ 2 ಕ್ಯಾಪ್‌?

Team Udayavani, Oct 21, 2020, 11:16 PM IST

ದುಬಾೖ: ಕಳೆದ ತಿಂಗಳು ನಡೆದ ಇಂಗ್ಲೆಂಡ್‌- ಆಸ್ಟ್ರೇಲಿಯ ನಡುವಿನ ಏಕದಿನ ಪಂದ್ಯಗಳ ವೇಳೆ ನಾಯಕರಾದ ಮಾರ್ಗನ್‌ ಮತ್ತು ಆರನ್‌ ಫಿಂಚ್‌ ಅವರ ತಲೆ ಮೇಲೆ ಎರಡು ಅಥವಾ ಹೆಚ್ಚಿನ ಸಂಖ್ಯೆಯ ಕ್ಯಾಪ್‌ ಇದ್ದುದನ್ನು ಎಲ್ಲರೂ ಗಮನಿಸಿದ್ದಾರೆ. ಇದೀಗ ಐಪಿಎಲ್‌ ವೇಳೆಯೂ ಇಂಥದೇ ದೃಶ್ಯ ಪುನರಾವರ್ತನೆಗೊಂಡಿದೆ. ಇದು ಕ್ರಿಕೆಟ್‌ ಅಭಿಮಾನಿಗಳನ್ನು ಸಹಜವಾಗಿಯೇ ಅಚ್ಚರಿಯಲ್ಲಿ ಕೆಡವಿದೆ.  ಇದಕ್ಕೆ ಕೋವಿಡ್‌ ನಿಯಮಾವಳಿಯೇ ಕಾರಣ.

ಸಾಮಾನ್ಯವಾಗಿ ಕ್ರಿಕೆಟಿಗನೋರ್ವ ಬೌಲಿಂಗಿಗೆ ಇಳಿಯುವಾಗ ತನ್ನ ಕ್ಯಾಪ್‌, ಸನ್‌ಗ್ಲಾಸ್‌, ಮೇಲಂಗಿಯನ್ನೆಲ್ಲ ಅಂಪಾಯರ್‌ ಬಳಿ ಕೊಡುವುದು ಕ್ರಮ. ಆದರೆ ಕೊರೊನಾದಿಂದಾಗಿ ಈ ಸಂಪ್ರದಾಯಕ್ಕೆ ನಿಷೇಧ ಹೇರಲಾಗಿದೆ. ಅಂಪಾಯರ್‌ಗಷ್ಟೇ ಅಲ್ಲ, ಇದನ್ನೆಲ್ಲ ಅಂಗಳದಲ್ಲಿರುವ ಸಹ ಆಟಗಾರರ ಬಳಿಯೂ ನೀಡುವಂತಿಲ್ಲ. ಆದರೆ ನಾಯಕನಿಗೆ ಮಾತ್ರ ಇದರಿಂದ ವಿನಾಯಿತಿ ನೀಡಲಾಗಿದೆ. ಹೀಗಾಗಿ ಇವರ ತಲೆ ಮೇಲೆ ಸದಾ ಒಂದಕ್ಕಿಂತ ಹೆಚ್ಚು ಕ್ಯಾಪ್‌ಗಳನ್ನು ಕಾಣಬಹುದಾಗಿದೆ!