Wimbledon Doubles: ಪ್ಯಾಟೆನ್‌-ಹೆಲಿಯೋವಾರ; ಟೌನ್ಸೆಂಡ್‌-ಸಿನಿಯಕೋವಾ ಚಾಂಪಿಯನ್ಸ್‌

Team Udayavani, Jul 14, 2024, 11:28 PM IST

ಬ್ರಿಟನ್‌ನ ಹೆನ್ರಿ ಪ್ಯಾಟೆನ್‌ ಮತ್ತು ಫಿನ್ಲಂಡ್‌ನ‌ ಹ್ಯಾರ್ರಿ ಹೆಲಿಯೋವಾರ ವಿಂಬಲ್ಡನ್‌ ಪುರುಷರ ಡಬಲ್ಸ್‌ ಚಾಂಪಿಯನ್‌ ಆಗಿ ಮೂಡಿಬಂದಿದ್ದಾರೆ. ತೀವ್ರ ಪೈಪೋಟಿಯ ಫೈನಲ್‌ನಲ್ಲಿ ಇವರು ಆಸ್ಟ್ರೇಲಿಯದ ಮ್ಯಾಕ್ಸ್‌ ಪರ್ಸೆಲ್‌-ಜೋರ್ಡನ್‌ ಥಾಮ್ಸನ್‌ ವಿರುದ್ಧ 6-7 (7), 7-6 (8), 7-6 (11-9) ಅಂತರದ ಜಯ ಸಾಧಿಸಿದರು.

ಇದು ಪ್ಯಾಟೆನ್‌-ಹೆಲಿಯೋವಾರ ಜೋಡಿಗೆ ಒಲಿದ ಮೊದಲ ಗ್ರ್ಯಾನ್‌ಸ್ಲಾಮ್‌ ಪ್ರಶಸ್ತಿಯಾಗಿದೆ. ಈ ಪಂದ್ಯಾವಳಿಯಲ್ಲಿ ಇವರಿಗೆ ಯಾವುದೇ ಶ್ರೇಯಾಂಕ ಲಭಿಸಿರ ಲಿಲ್ಲ. 3 ಗಂಟೆಗಳ ಕಾಲ ನಡೆದ ಪಂದ್ಯದ ವೇಳೆ ಮೂರೂ ಸೆಟ್‌ ಟೈ-ಬ್ರೇಕರ್‌ಗೆ ವಿಸ್ತರಿಸಲ್ಪಟ್ಟದ್ದು ಫೈನಲ್‌ ತೀವ್ರತೆಗೆ ಸಾಕ್ಷಿ.

ವನಿತಾ ಡಬಲ್ಸ್‌
ವನಿತಾ ಡಬಲ್ಸ್‌ ಪ್ರಶಸ್ತಿ ಅಮೆರಿಕದ ಟೇಲರ್‌ ಟೌನ್ಸೆಂಡ್‌-ಜೆಕ್‌ ಗಣರಾಜ್ಯದ ಕ್ಯಾಥರಿನಾ ಸಿನಿಯಕೋವಾ ಪಾಲಾಯಿತು. ಇವರು ಕೆನಡಾದ ಗ್ಯಾಬ್ರಿಯೇಲಾ ಡಾಬ್ರೋವ್‌ಸ್ಕಿ-ನ್ಯೂಜಿಲ್ಯಾಂಡ್‌ನ‌ ಎರಿನ್‌ ರೌಟಿÉಫ್ ವಿರುದ್ಧ 7-6 (5), 7-6 (1) ಅಂತರದಿಂದ ಗೆದ್ದರು.

ಇಲ್ಲಿ ಟೌನ್ಸೆಂಡ್‌ “ಥರ್ಡ್‌ ಟೈಮ್‌ ಲಕ್ಕಿ’ ಎನಿಸಿದರು. 2022ರ ಯುಎಸ್‌ ಓಪನ್‌ ಡಬಲ್ಸ್‌ ಹಾಗೂ ಕಳೆದ ವರ್ಷದ ಫ್ರೆಂಚ್‌ ಓಪನ್‌ ಡಬಲ್ಸ್‌ ಫೈನಲ್‌ನಲ್ಲಿ ಇವರು ಸೋಲನುಭವಿಸಿದ್ದರು. ಇದೇ ವೇಳೆ ಸಿನಿಯಕೋವಾ 9ನೇ ಡಬಲ್ಸ್‌ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡರು.