ವಿಂಡೀಸ್‌ ಸರಣಿ: ಪಂತ್‌ಗೆ ಉತ್ತಮ ಅವಕಾಶ: ಕೊಹ್ಲಿ

Team Udayavani, Aug 4, 2019, 5:54 AM IST

ಲಾಡರ್‌ಹಿಲ್: ಭಾರತ ಮತ್ತು ವೆಸ್ಟ್‌ಇಂಡೀಸ್‌ ಪ್ರವಾಸದ ವೇಳೆ ಮಹೇಂದ್ರ ಸಿಂಗ್‌ ಧೋನಿ ಅವರ ಅನುಪಸ್ಥಿತಿಯನ್ನು ಉದಯೋನ್ಮುಖ ಕ್ರಿಕೆಟಿಗ ರಿಷಬ್‌ ಪಂತ್‌ ಸದುಪಯೋಗ ಪಡಿಸಿಕೊಳ್ಳಬೇಕು ಎಂದು ಟೀಂ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಹೇಳಿದ್ದಾರೆ.

ವೆಸ್ಟ್‌ ಇಂಡೀಸ್‌ ಪ್ರವಾಸಕ್ಕೆ ಆಯ್ಕೆ ಮಾಡಿದ ಭಾರತ ತಂಡದಲ್ಲಿ ಧೋನಿ ಅವರನ್ನು ಕೈಬಿಡಲಾಗಿದೆ. ಧೋನಿ ಬದಲಿಗೆ ರಿಷಬ್‌ ಪಂತ್‌ ಅವರನ್ನು ಆಯ್ಕೆ ಮಾಡಲಾಗಿದೆ. ಭವಿಷ್ಯದ ದೃಷ್ಟಿಯಿಂದ ಪಂತ್‌ ಅವರು ಈ ಅವಕಾಶವನ್ನು ಉತ್ತಮ ರೀತಿಯಲ್ಲಿ ಬಳಸಿಕೊಳ್ಳಬೇಕಿದೆ. ಅವರಿಗೆ ತಮ್ಮ ಪ್ರತಿಭೆ ಪ್ರದರ್ಶಿಸಲು ಇದೊಂದು ಉತ್ತಮ ಅವಕಾಶ ಎಂದು ಕೊಹ್ಲಿ ತಿಳಿಸಿದ್ದಾರೆ.

ಭವಿಷ್ಯದಲ್ಲಿ ವಿಕೆಟ್ ಕೀಪಿಂಗ್‌ ಸ್ಥಾನವನ್ನು ತುಂಬಲು ಪಂತ್‌ ಅವರಿಗೆ ಇದೊಂದು ಸುವರ್ಣಾವಕಾಶ. ಈ ಅವಕಾಶವನ್ನು ಯಾವ ರೀತಿ ಬಳಸಿ ಕೊಳ್ಳಬೇಕು ಎನ್ನುವುದು ಅವರಿಗೆ ತಿಳಿದಿದೆ ಎಂದು ಪಂತ್‌ ಬಗ್ಗೆ ಕೊಹ್ಲಿ ಪ್ರಶಂಸೆಯ ಮಾತುಗಳನ್ನಾಡಿದ್ದಾರೆ.

ಮುಂದಿನ ವರ್ಷ ಟಿ20 ವಿಶ್ವಕಪ್‌ ನಡೆಯುವ ಕಾರಣ ಪಂತ್‌ ಈ ಪ್ರವಾಸದಲ್ಲಿ ಶ್ರೇಷ್ಠ ನಿರ್ವಹಣೆ ನೀಡುವುದು ಅಗತ್ಯವಾಗಿದೆ. ವಿಕೆಟ್ಕೀಪಿಂಗ್‌ ಸಹಿತ ಬ್ಯಾಟಿಂಗ್‌ನಲ್ಲೂ ಉಜ್ವಲ ನಿರ್ವಹಣೆ ನೀಡಿದಲ್ಲಿ ಅವರು ಟೀಮ್‌ ಇಂಡಿಯಾ ತಂಡದಲ್ಲಿ ಕೀಪಿಂಗ್‌ ಸ್ಥಾನವನ್ನು ಗಟ್ಟಿಮಾಡಲು ಸಾಧ್ಯವಿದೆ.

ಹಾರ್ದಿಕ್‌ ಪಾಂಡ್ಯ ಕೂಡ ವಿಂಡೀಸ್‌ ಪ್ರವಾಸದಿಂದ ಹೊರಗುಳಿದಿದ್ದಾರೆ. ಅವರ ಬದಲಿಗೆ ಯುವ ಕ್ರಿಕೆಟಿಗರಾದ ಶ್ರೇಯಸ್‌ ಅಯ್ಯರ್‌, ನವದೀಪ್‌ ಸೈನಿ, ರಾಹುಲ್ ಚಹರ್‌ ಇವರಿಗೆಲ್ಲ ತಮ್ಮ ಪ್ರತಿಭೆಯನ್ನು ಅನಾವರಣಗೊಳಿಸಲು ಈ ಪ್ರವಾಸ ಉತ್ತಮ ಅವಕಾಶ ಮತ್ತು ಈ ಆಟಗಾರರು ಇದರ ಲಾಭ ಪಡೆದುಕೊಳ್ಳುವ ನಂಬಿಕೆ ನನಗಿದೆ ಎಂದು ಕೊಹ್ಲಿ ಹೇಳಿದ್ದಾರೆ.