“ಧಾರ್ಮಿಕ ನಂಬಿಕೆಯಿಂದ ಹೆಣ್ಣು ಮಕ್ಕಳಿಗೆ ಕ್ರಿಕೆಟ್‌ ಕಲಿಸಿಲ್ಲ’

Team Udayavani, May 12, 2019, 6:00 AM IST

ಕರಾಚಿ: ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ ಶಾಹಿದ್‌ ಅಫ್ರಿದಿ ಜೀವನಚರಿತ್ರೆ “ಗೇಮ್‌ ಚೇಂಜರ್‌’ ಪುಸ್ತಕದ ರೂಪದಲ್ಲಿ ಪ್ರಕಟ ಗೊಂಡ ಅನಂತರ ಒಂದೊಂದೇ ವಿವಾದಗಳು ಹೊರಬರುತ್ತಿವೆ. ಇದೀಗ ಅಫ್ರಿದಿ ಕುಟುಂಬಕ್ಕೆ ಸಂಬಂಧಪಟ್ಟ ಸ್ಫೋಟಕ ಸುದ್ದಿ ಹೊರಬಿದ್ದಿದೆ.

“ಧಾರ್ಮಿಕ ನಂಬಿಕೆಯಿಂದ ನನ್ನಿಬ್ಬರು ಹೆಣ್ಣು ಮಕ್ಕಳಿಗೆ ಕ್ರಿಕೆಟ್‌ ಕಲಿಸಲಿಲ್ಲ’ ಎಂದು ಅಫ್ರಿದಿ ಬರೆದುಕೊಂಡಿರುವುದು ಜಾಗತಿಕ ಮಟ್ಟದಲ್ಲಿ ಚರ್ಚೆಗೆ ಕಾರಣವಾಗಿದೆ. ಅನೇಕರು ಅಫ್ರಿದಿ ಹೆಣ್ಣು ಮಕ್ಕಳ ಹಕ್ಕನ್ನು ಕಸಿದುಕೊಂಡ ದೊಡ್ಡ ಸಂಪ್ರದಾಯವಾದಿ ಎಂದು ಟೀಕಿಸಿದ್ದಾರೆ.

“ಗೇಮ್‌ ಚೇಂಜರ್‌’ನಲ್ಲಿ ಏನಿದೆ?
“ನನ್ನ ಇಬ್ಬರು ಹೆಣ್ಣು ಮಕ್ಕಳಿಗೆ ಕ್ರೀಡೆಯನ್ನು ಪರಿಚಯಿಸಲಿಲ್ಲ. ಇದಕ್ಕೆ ಕಾರಣ ನಮ್ಮ ದೇಶದಲ್ಲಿ ಇರುವ ಸಾಮಾಜಿಕ ಹಾಗೂ ಧಾರ್ಮಿಕ ನಂಬಿಕೆ. ನಮ್ಮ ಧರ್ಮದಲ್ಲಿ ಹೆಣ್ಣು ಮಕ್ಕಳು ಕ್ರೀಡೆಗೆ ಬರುವುದು ಧರ್ಮ ವಿರೋಧಿ. ಹೀಗಾಗಿ ನನ್ನಿಬ್ಬರು ಹೆಣ್ಣು ಮಕ್ಕಳಿಗೆ ಕ್ರಿಕೆಟ್‌ ಅಥವಾ ಯಾವುದೇ ಕ್ರೀಡೆಯನ್ನು ಕಲಿಸಲಿಲ್ಲ. ನನ್ನ ಅಭಿಪ್ರಾಯಕ್ಕೆ ನನ್ನ ಹೆಂಡತಿ ಕೂಡ ಒಪ್ಪಿಗೆ ನೀಡಿದ್ದಳು. ಒಬ್ಬ ಪಾಕಿಸ್ಥಾನದ ಸಂಪ್ರದಾಯವಾದಿ ತಂದೆಯಾಗಿ ಈ ನಿರ್ಧಾರ ತೆಗೆದುಕೊಂಡೆ’ ಎಂದು ಅಫ್ರಿದಿ ಬರೆದಿದ್ದಾರೆ.