ವನಿತಾ ಹಾಕಿ ಸರಣಿ : ಚೀನಕ್ಕೆ ಸೋತ ಭಾರತ

Team Udayavani, Jul 18, 2023, 5:18 AM IST

ಲಿಂಬರ್ಗ್‌ (ಜರ್ಮನಿ): ಭಾರತ ವನಿತಾ ಹಾಕಿ ತಂಡ ತನ್ನ ಜರ್ಮನಿ ಪ್ರವಾಸವನ್ನು ನಿರಾಶಾದಾಯಕವಾಗಿ ಆರಂಭಿಸಿದೆ. ಚೀನ ವಿರುದ್ಧದ ಮೊದಲ ಪಂದ್ಯದಲ್ಲಿ 3-2 ಗೋಲುಗಳ ಸೋಲನುಭವಿಸಿದೆ.

ಚೆನ್‌ ಜಿಯಾಲಿ 9ನೇ ನಿಮಿಷದಲ್ಲೇ ಗೋಲು ಬಾರಿಸಿ ಚೀನಕ್ಕೆ ಮುನ್ನಡೆ ತಂದಿತ್ತರು. ಆದರೆ 24ನೇ ಹಾಗೂ 45ನೇ ನಿಮಿಷದಲ್ಲಿ ನವನೀತ್‌ ಕೌರ್‌ ಅವಳಿ ಗೋಲು ಬಾರಿಸಿ ಹೋರಾಟವನ್ನು ತೀವ್ರಗೊಳಿಸಿದರು. ಆದರೆ ಭಾರತದ ಈ ಮುನ್ನಡೆ ಉಳಿದದ್ದು ಕೆಲವೇ ಕ್ಷಣ ಮಾತ್ರ. 45ನೇ ನಿಮಿಷದಲ್ಲೇ ಚೀನದ ಜೊಂಗ್‌ ಜಿಯಾಖೀ ಗೋಲು ಬಾರಿಸಿದರು. ಪಂದ್ಯ ಸಮಬಲಕ್ಕೆ ಬಂತು. 51ನೇ ನಿಮಿಷದಲ್ಲಿ ಕ್ಸು ಯನಾನ್‌ ಚೀನ ಪರ 3ನೇ ಗೋಲು ಹೊಡೆದರು. ಈ ಮುನ್ನಡೆಯನ್ನು ಕಾಯ್ದುಕೊಂಡು ಬಂದ ಚೀನ ಗೆಲುವು ಸಾಧಿಸಿತು.

ಭಾರತ ತನ್ನ ಮುಂದಿನೆರಡು ಪಂದ್ಯಗಳನ್ನು ಮಂಗಳವಾರ ಮತ್ತು ಗುರುವಾರ ಜರ್ಮನಿ ವಿರುದ್ಧ ಆಡಲಿದೆ.