ವನಿತಾ ಟಿ20 ಚಾಲೆಂಜರ್‌ ಸರಣಿ: ಸೂಪರ್‌ ನೋವಾಗೆ ಸೂಪರ್‌ ಗೆಲುವು

Team Udayavani, May 23, 2022, 10:39 PM IST

ಪುಣೆ: ವನಿತಾ ಚಾಲೆಂಜರ್‌ ಟಿ20 ಸರಣಿಯ ಮೊದಲ ಮುಖಾಮುಖಿಯಲ್ಲಿ ಟ್ರೈಬ್ಲೇಜರ್ ವಿರುದ್ಧ ಸೂಪರ್‌ ನೋವಾ ಸೂಪರ್‌ ಗೆಲುವು ಸಾಧಿಸಿದೆ.

ಮೊದಲು ಬ್ಯಾಟಿಂಗ್‌ ನಡೆಸಿದ ಸೂಪರ್‌ ನೋವಾ 163 ರನ್‌ ಪೇರಿಸುವಲ್ಲಿ ಯಶಸ್ವಿಯಾಗಿತ್ತು. ಆಬಳಿಕ ಸೂಪರ್‌ ನೋವಾ ತಂಡದ ನಿಖರ ದಾಳಿಗೆ ಕುಸಿದ ಟ್ರೈಬ್ಲೇಜರ್ ತಂಡವು 9 ವಿಕೆಟಿಗೆ 114 ರನ್‌ ಗಳಿಸಲಷ್ಟೇ ಶಕ್ತವಾಗಿ 49 ರನ್ನುಗಳಿಂದ ಸೋಲನ್ನು ಕಂಡಿತು.

ಟ್ರೈಬ್ಲೇಜರ್ ತಂಡದ ಆರಂಭ ಉತ್ತಮವಾಗಿತ್ತು. ನಾಯಕಿ ಸ್ಮತಿ ಮಂಧನಾ ಎರಡನೆಯವರಾಗಿ ಔಟ್‌ ಆದಾಗ ತಂಡ 7.2 ಓವರ್‌ಗಳಲ್ಲಿ ಎರಡು ವಿಕೆಟಿಗೆ 63 ರನ್‌ ಗಳಿಸಿತ್ತು. ಮಂಧನಾ 23 ಎಸೆತ ಎದುರಿಸಿ 34 ರನ್‌ ಗಳಿಸಿದರು. ಇದು ತಂಡದ ಆಟಗಾರ್ತಿಯೊಬ್ಬರ ಗರಿಷ್ಠ ಮೊತ್ತವೂ ಆಗಿದೆ. ಆಬಳಿಕ ತಂಡವು ನಾಟಕೀಯ ಕುಸಿತ ಕಂಡಿತು. ಮುಂದಿನ 10 ರನ್‌ ಗಳಿಸುವಷ್ಟರಲ್ಲಿ ತಂಡವು ಮತ್ತೆ 5 ವಿಕೆಟ್‌ಗಳನ್ನು ಕಳೆದುಕೊಂಡು ಶೋಚನೀಯ ಸ್ಥಿತಿಗೆ ಬಿತ್ತು. ಅಂತಿಮವಾಗಿ 9 ವಿಕೆಟಿಗೆ 114 ರನ್‌ ಗಳಿಸಲಷ್ಟೇ ಶಕ್ತವಾಗಿ ಸೋಲನ್ನು ಒಪ್ಪಿಕೊಂಡಿತು.

ಪೂಜಾ ವಸ್ತ್ರಾಕರ್‌ ತನ್ನ 4 ಓವರ್‌ಗಳ ದಾಳಿಯಲ್ಲಿ ಕೇವಲ 12 ರನ್‌ ನೀಡಿ ನಾಲ್ಕು ವಿಕೆಟ್‌ ಕಿತ್ತು ಗೆಲುವಿನ ರೂವಾರಿಯಾಗಿ ಕಾಣಿಸಿಕೊಂಡರು.

ಈ ಮೊದಲು ಟಾಸ್‌ ಗೆದ್ದ ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ ಬ್ಯಾಟಿಂಗ್‌ ಆಯ್ದು ಕೊಂಡರು. ಡಿಯಾಂಡ್ರಾ ಟಾಟಿನ್‌ (32) ಮತ್ತು ಪ್ರಿಯಾ ಪುನಿಯಾ (22) ಮೊದಲ ವಿಕೆಟಿಗೆ 5 ಓವರ್‌ಗಳಲ್ಲಿ 50 ಪೇರಿಸಿದರು. ವನ್‌ಡೌನ್‌ನಲ್ಲಿ ಬಂದ ಹಲೀìನ್‌ ದೇವಲ್‌ 35 ರನ್‌ ಬಾರಿಸಿದರು. 37 ರನ್‌ ಹೊಡೆದ ನಾಯಕಿ ಕೌರ್‌ ಅವರದು ಹೆಚ್ಚಿನ ಗಳಿಕೆ (29 ಎಸೆತ, 4 ಬೌಂಡರಿ).

ದೇವಲ್‌ 19 ಎಸೆತಗಳಲ್ಲಿ ಸೊಗಸಾದ ಇನ್ನಿಂಗ್ಸ್‌ ಕಟ್ಟಿದರು. ಇದರಲ್ಲಿ 5 ಬೌಂಡರಿ ಒಳಗೊಂಡಿತ್ತು. ಇನ್ನಿಂಗ್ಸಿನ 2 ಸಿಕ್ಸರ್‌ಗಳು ಪ್ರಿಯಾ ಮತ್ತು ಡಿಯಾಂಡ್ರಾ ಅವರಿಂದ ಸಿಡಿಯಲ್ಪಟ್ಟವು. ಟ್ರೈಬ್ಲೇಜರ್‌ ಪರ ಹ್ಯಾಲಿ ಮ್ಯಾಥ್ಯೂಸ್‌ 29ಕ್ಕೆ 3, ಸಲ್ಮಾ ಖಾತುನ್‌ 30ಕ್ಕೆ 2 ವಿಕೆಟ್‌ ಕೆಡವಿದರು.

ಸಂಕ್ಷಿಪ್ತ ಸ್ಕೋರು: ಸೂಪರ್‌ ನೋವಾ 163 (ಹರ್ಮನ್‌ಪ್ರೀತ್‌ ಕೌರ್‌ 37, ಹಲೀìನ್‌ ದೇವಲ್‌ 35, ಡಿಯಾಂಡ್ರಾ ಟಾಟಿನ್‌ 32, ಹೇಲೆ ಮ್ಯಾಥ್ಯೂಸ್‌ 29ಕ್ಕೆ 3, ಸಲ್ಮಾ ಖಾತುನ್‌ 30ಕ್ಕೆ 2); ಟ್ರೈಬ್ಲೇಜರ್ 9 ವಿಕೆಟಿಗೆ 114 (ಸ್ಮತಿ ಮಂಧನಾ 34, ಜೆಮಿಮಾ ರಾಡ್ರಿಗಸ್‌ 24, ಪೂಜಾ ವಸ್ತ್ರಾಕರ್‌ 12ಕ್ಕೆ 4, ಸೊಫಿ ಎಕ್ಲೆಸ್ಟೋನ್‌ 19ಕ್ಕೆ 2, ಅಲನಾ ಕಿಂಗ್‌ 30ಕ್ಕೆ 2).