Womens T20 World Cup; ಇಂಗ್ಲೆಂಡಿಗೆ 10 ವಿಕೆಟ್‌ ಭರ್ಜರಿ ಗೆಲುವು :ಯಾವ ತಂಡ ಸೆಮಿಗೆ?

Team Udayavani, Oct 14, 2024, 12:08 AM IST

ಶಾರ್ಜಾ: ವನಿತಾ ಟಿ20 ವಿಶ್ವಕಪ್‌ ಕ್ರಿಕೆಟ್‌ ಕುತೂಹಲ ಘಟಕ್ಕೆ ತಲುಪಿದ್ದು ಯಾವ ತಂಡ ಸೆಮಿಫೈನಲಿಗೆ ತೇರ್ಗಡೆಯಾಗಬಹುದೆಂಬ ಲೆಕ್ಕಾಚಾರ ಆರಂಭವಾಗಿದೆ. ರವಿವಾರ ನಡೆದ “ಬಿ’ ಬಣದ ಪಂದ್ಯದಲ್ಲಿ ಸ್ಕಾಟ್ಲೆಂಡ್‌ ತಂಡವನ್ನು 10 ವಿಕೆಟ್‌ಗಳಿಂದ ಉರುಳಿಸಿದ ಇಂಗ್ಲೆಂಡ್‌ ತಂಡವು ಸದ್ಯ ಬಣದ ಅಗ್ರಸ್ಥಾನಕ್ಕೇರಿದ್ದು ಸೆಮಿಫೈನಲಿಗೇರುವ ಅವಕಾಶವನ್ನು ಹೆಚ್ಚಿಸಿಕೊಂಡಿದೆ.

ಮೊದಲು ಬ್ಯಾಟಿಂಗ್‌ ನಡೆಸಿದ ಸ್ಕಾಟ್ಲೆಂಡ್‌ ತಂಡವು ಇಂಗ್ಲೆಂಡಿನ ನಿಖರ ದಾಳಿಗೆ ಕುಸಿದು 6 ವಿಕೆಟಿಗೆ 109 ರನ್‌ ಗಳಿಸಲಷ್ಟೇ ಶಕ್ತವಾಯಿತು. ಇದಕ್ಕುತ್ತರವಾಗಿ ಭರ್ಜರಿ ಆಟದ ಪ್ರದರ್ಶನ ನೀಡಿದ ಇಂಗ್ಲೆಂಡ್‌ ಯಾವುದೇ ವಿಕೆಟ್‌ ಕಳೆದುಕೊಳ್ಳದೇ ಕೆವಲ 10 ಓವರ್‌ಗಳಲ್ಲಿ ಜಯಭೇರಿ ಬಾರಿಸಿತು. ಆರಂಭಿಕರಾದ ಮೈಯಾ ಬೌಶೀರ್‌ ಮತ್ತು ಡ್ಯಾನಿ ವೈಟ್‌ ಹಾಡ್ಜ್ ಅಮೋಘವಾಗಿ ಆಡಿದರಲ್ಲದೇ ವೈಯಕ್ತಿಕವಾಗಿ ಇಬ್ಬರೂ ಅರ್ಧಶತಕ ದಾಖಲಿಸಿ ಸಂಭ್ರಮಿಸಿದರು. ಬೌಶೀರ್‌ 62 ಮತ್ತು ಹಾಡ್ಜ್ 51 ರನ್‌ ಗಳಿಸಿ ಅಜೇಯರಾಗಿ ಉಳಿದರು.

ಈ ಗೆಲುವಿನಿಂದ ತಾನಾಡಿದ ಮೂರು ಪಂದ್ಯಗಳಿಂದ ಆರಂಕ ಪಡೆದ ಇಂಗ್ಲೆಂಡ್‌ ಬಣದ ಅಗ್ರಸ್ಥಾನಕ್ಕೇರಿತು. ರನ್‌ಧಾರಣೆಯಲ್ಲಿ ದ್ವಿತೀಯ ಸ್ಥಾನದಲ್ಲಿರುವ ದಕ್ಷಿಣ ಆಫ್ರಿಕಾ ತನ್ನ ಲೀಗ್‌ ಪಂದ್ಯಗಳನ್ನು ಮುಗಿಸಿದ್ದು ಆರಂಕ ಹೊಂದಿದೆ. ಅ. 15ರ ಮಂಗಳವಾರ ಇಂಗ್ಲೆಂಡ್‌ ಮತ್ತು ವೆಸ್ಟ್‌ಇಂಡೀಸ್‌ ನಡುವೆ ನಿರ್ಣಾಯಕ ಲೀಗ್‌ ಪಂದ್ಯ ನಡೆಯಲಿದೆ. ಸದ್ಯ ನಾಲ್ಕಂಕ ಹೊಂದಿರುವ ವೆಸ್ಟ್‌ಇಂಡೀಸ್‌ ಈ ಪಂದ್ಯ ಗೆದ್ದರೆ ದಕ್ಷಿಣ ಆಫ್ರಿಕಾ, ಇಂಗ್ಲೆಂಡ್ ಜತೆ ತಲಾ ಆರಂಕ ಹೊಂದಲಿದೆ. ಆಗ ಉತ್ತಮ ರನ್‌ಧಾರಣೆ ಲೆಕ್ಕಕ್ಕೆ ಬರಲಿದೆ. ಒಂದು ವೇಳೆ ಇಂಗ್ಲೆಂಡ್‌ ಗೆದ್ದರೆ ವೆಸ್ಟ್‌ಇಂಡೀಸ್‌ ಹೊರಬೀಳಲಿದ್ದು ಇಂಗ್ಲೆಂಡ್‌ ಮತ್ತು ದಕ್ಷಿಣ ಆಫ್ರಿಕಾ ಸೆಮಿಫೈನಲಿಗೇರಲಿದೆ.