World Badminton ಚಾಂಪಿಯನ್‌ಶಿಪ್‌: ಪ್ರಣಯ್‌, ಸೇನ್‌, ಚಿರಾಗ್‌ ಫೇವರಿಟ್ಸ್‌

Team Udayavani, Aug 21, 2023, 6:28 AM IST

ಕೋಪನ್‌ಹೆಗನ್‌ (ಡೆನ್ಮಾರ್ಕ್‌): ಡೆನ್ಮಾರ್ಕ್‌ ರಾಜಧಾನಿ ಕೋಪ ನ್‌ಹೆಗನ್‌ 2023ರ BWF ವಿಶ್ವ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಶಿಪ್‌ಗೆ ಅಣಿಯಾಗಿದೆ. ಸೋಮವಾರದಿಂದ ಈ ಪ್ರತಿಷ್ಠಿತ ಕೂಟಕ್ಕೆ ಚಾಲನೆ ಲಭಿಸಲಿದೆ. ಎಚ್‌.ಎಸ್‌. ಪ್ರಣಯ್‌, ಲಕ್ಷ್ಯ ಸೇನ್‌, ಚಿರಾಗ್‌ ಶೆಟ್ಟಿ-ಸಾತ್ವಿಕ್‌ ಸಾಯಿರಾಜ್‌ ರಾಂಕಿರೆಡ್ಡಿ ಭಾರತದ ಪದಕಗಳ ನಿರೀಕ್ಷೆಯನ್ನು ಹೆಚ್ಚಿಸಿದ್ದಾರೆ. ಒಲಿಂಪಿಕ್ಸ್‌ ಸೀಸನ್‌ ಮುಂದಿ ರುವುದರಿಂದ ಎಲ್ಲರಿಗೂ ಇದು ಮಹತ್ವದ ಪಂದ್ಯಾವಳಿಯಾಗಿದೆ.

ಆದರೆ ಪ್ರಸಕ್ತ ಸೀಸನ್‌ನಲ್ಲಿ ಅಷ್ಟೇನೂ ಫಾರ್ಮ್ನಲ್ಲಿಲ್ಲದ ಪಿ.ವಿ. ಸಿಂಧು ಮೇಲೆ ಯಾರೂ ಅಷ್ಟೊಂದು ಭರವಸೆ ಇರಿಸಿಲ್ಲ. ಆದರೆ ವಿಶ್ವ ಬ್ಯಾಡ್ಮಿಂಟನ್‌ನಲ್ಲಿ ಸಿಂಧು ಭಾರತದ ಅತ್ಯಂತ ಯಶಸ್ವಿ ಆಟಗಾರ್ತಿ ಎಂಬು ದನ್ನು ಮರೆಯುವಂತಿಲ್ಲ. 2019ರ ಚಾಂಪಿಯನ್‌ ಆಗಿರುವ ಸಿಂಧು ಗರಿಷ್ಠ 5 ಪದಕಗಳನ್ನು ಜಯಿಸಿದ್ದಾರೆ. 2011ರಿಂದ ಮೊದಲ್ಗೊಂಡು ಒಂದಲ್ಲ ಒಂದು ಪದಕ ಗೆಲ್ಲುತ್ತ ಬಂದಿರುವುದು ಸಿಂಧು ಹೆಗ್ಗಳಿಕೆ.
ಸಿಂಧು ಅವರಿಗೆ ಮೊದಲ ಸುತ್ತಿನ ಬೈ ಲಭಿಸಿದೆ. ಹೀಗಾಗಿ ಜಪಾನ್‌ನ ನೊಜೊಮಿ ಒಕುಹಾರ ಮತ್ತು ವಿಯೆಟ್ನಾಮ್‌ನ ಥುಯಿ ಲಿನ್‌ ಎನ್‌ಗುಯೆನ್‌ ನಡುವಿನ ವಿಜೇತರನ್ನು ಎದುರಿಸಲಿದ್ದಾರೆ.

13 ಪದಕ ಗೆದ್ದಿರುವ ಭಾರತ
1977ರಿಂದ ಮೊದಲ್ಗೊಂಡು ಈವರೆಗೆ ಭಾರತ 13 ಪದಕಗಳನ್ನು ಗೆದ್ದಿದೆ. ಸಿಂಧು ಜಯಿಸಿದ ಏಕೈಕ ಸ್ವರ್ಣ ಸೇರಿದಂತೆ 4 ಬೆಳ್ಳಿ ಹಾಗೂ 8 ಕಂಚಿನ ಪದಕಗಳು ಸೇರಿವೆ. ಭಾರತದ ಬ್ಯಾಡ್ಮಿಂಟನ್‌ ದಂತಕತೆ ಪ್ರಕಾಶ್‌ ಪಡುಕೋಣೆ 1983ರಲ್ಲಿ ಕಂಚಿನ ಪದಕ ಗೆಲ್ಲುವ ಮೂಲಕ ವಿಶ್ವ ನಕ್ಷೆಯಲ್ಲಿ ಭಾರತೀಯ ಬ್ಯಾಡ್ಮಿಂಟನ್‌ಗೆ ವಿಶಿಷ್ಟ ಸ್ಥಾನ ಕಲ್ಪಿಸಿಕೊಟ್ಟಿದ್ದರು.

2021ರ ಆವೃತ್ತಿಯಲ್ಲಿ ಕೆ. ಶ್ರೀಕಾಂತ್‌ ಮತ್ತು ಲಕ್ಷ್ಯ ಸೇನ್‌ ಕ್ರಮವಾಗಿ ಬೆಳ್ಳಿ ಮತ್ತು ಕಂಚಿನ ಪದಕ ಜಯಿಸಿದ್ದರು. ಕಳೆದ ವರ್ಷ ಚಿರಾಗ್‌-ಸಾತ್ವಿಕ್‌ ಜೋಡಿಗೆ ಕಂಚಿನ ಪದಕ ಒಲಿದಿತ್ತು. ಕಳೆದೆರಡು ಕೂಟಗಳ ಕ್ವಾರ್ಟರ್‌ ಫೈನಲ್‌ನಲ್ಲಿ ಎಡವಿದ ಎಚ್‌.ಎಸ್‌. ಪ್ರಣಯ್‌ ಈ ಬಾರಿ ನೆಚ್ಚಿನ ಆಟಗಾರನಾಗಿ ಮೂಡಿಬಂದಿದ್ದಾರೆ. ಮಲೇಷ್ಯಾ ಮಾಸ್ಟರ್ ಪ್ರಶಸ್ತಿ ಗೆದ್ದಿರುವ 9ನೇ ಶ್ರೇಯಾಂಕದ ಪ್ರಣಯ್‌ ಮೊದಲ ಸುತ್ತಿನಲ್ಲಿ ಫಿನ್ಲಂಡ್‌ನ‌ 56ನೇ ರ್‍ಯಾಂಕಿಂಗ್‌ ಆಟಗಾರ ಕಾಲ್ಲೆ ಕೊಲೊjನೆನ್‌ ವಿರುದ್ಧ ಸೆಣಸಲಿದ್ದಾರೆ.

ಲಕ್ಷ್ಯ ಸೇನ್‌ಗೆ ದುರ್ಬಲ ಎದುರಾಳಿ ಸಿಕ್ಕಿದ್ದಾರೆ. 110ನೇ ರ್‍ಯಾಂಕಿಂಗ್‌ನ ಮಾರಿಶಿಯಸ್‌ ಆಟಗಾರ ಜಾಜ್‌Õì ಜೂಲಿಯನ್‌ ಪೌಲ್‌ ವಿರುದ್ಧ ಮೊದಲ ಪಂದ್ಯ ಆಡಲಿದ್ದಾರೆ.ಕೆ. ಶ್ರೀಕಾಂತ್‌ ಅವರಿಗೆ ಮೊದಲ ಸುತ್ತಿನಲ್ಲಿ ಕಠಿನ ಎದುರಾಳಿ ಸಿಕ್ಕಿದ್ದಾರೆ. ಇವರೆಂದರೆ ಜಪಾನ್‌ನ ಕೆಂಟ ನಿಶಿಮೊಟೊ. ಆದರೆ ಇವರೆದುರು ಶ್ರೀಕಾಂತ್‌ 6-3ರ ಮುನ್ನಡೆ ಹೊಂದಿರುವುದರಿಂದ ಆತ್ಮವಿಶ್ವಾಸಕ್ಕೇನೂ ಕೊರತೆ ಇಲ್ಲ.

ಸಿರಾಗ್‌-ಸಾತ್ವಿಕ್‌
ಭಾರತದ ಡಬಲ್ಸ್‌ ಜೋಡಿ ಯಾದ ಚಿರಾಗ್‌-ಸಾತ್ವಿಕ್‌ ಮೇಲೆ ಈ ಬಾರಿ ಬೆಟ್ಟದಷ್ಟು ನಿರೀಕ್ಷೆ ಇರಿಸಿಕೊಳ್ಳಲಾಗಿದೆ. ಕಾರಣ, ಇವರ ಪ್ರಚಂಡ ಫಾರ್ಮ್. ಸಾಲು ಸಾಲಾಗಿ ಇಂಡೋನೇಷ್ಯಾ ಓಪನ್‌, ಏಷ್ಯಾ ಚಾಂಪಿಯನ್‌ಶಿಪ್‌, ಸ್ವಿಸ್‌ ಓಪನ್‌ ಮತ್ತು ಕೊರಿಯಾ ಓಪನ್‌ ಚಾಂಪಿಯನ್‌ ಎನಿಸಿಕೊಂಡ ಹೆಗ್ಗಳಿಕೆ ಇವರದು. ದ್ವಿತೀಯ ಶ್ರೇಯಾಂಕದ ಭಾರತೀಯ ಜೋಡಿಗೂ ಮೊದಲ ಸುತ್ತಿನ ಬೈ ಲಭಿಸಿದೆ.

ವನಿತಾ ಡಬಲ್ಸ್‌ನಲ್ಲಿ ತ್ರಿಸಾ ಜಾಲಿ-ಗಾಯತ್ರಿ ಗೋಪಿಚಂದ್‌, ಅಶ್ವಿ‌ನಿ ಭಟ್‌-ಶಿಖಾ ಗೌತಮ್‌ ಕೂಡ ಸ್ಪರ್ಧೆಯಲ್ಲಿದ್ದಾರೆ. ಮಿಶ್ರ ಡಬಲ್ಸ್‌
ನಲ್ಲಿ ಕಣಕ್ಕಿಳಿಯುವವರೆಂದರೆ ರೋಹನ್‌ ಕಪೂರ್‌-ಎನ್‌. ಸಿಕ್ಕಿ ರೆಡ್ಡಿ, ವೆಂಕಟ ಪ್ರಸಾದ್‌-ಜೂಹಿ ದೇವಾಂಗನ್‌.

5ನೇ ಆತಿಥ್ಯದ ದಾಖಲೆ
ಕೋಪನ್‌ಹೆಗನ್‌ ದಾಖಲೆ 5ನೇ ಸಲ ವಿಶ್ವ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಶಿಪ್‌ ಆತಿಥ್ಯ ವಹಿಸುತ್ತಿದೆ. ಇದಕ್ಕೂ ಮೊದಲು 1983, 1991, 1999 ಮತ್ತು 2014ರಲ್ಲಿ ಈ ಪ್ರತಿಷ್ಠಿತ ಪಂದ್ಯಾವಳಿ ನಡೆದಿತ್ತು. 2017ರಲ್ಲಿ ಶಟ್ಲ ಬ್ಯಾಡ್ಮಿಂಟನ್‌ಗೆ ತೆರೆದ “ದ ರಾಯಲ್‌ ಅರೆನಾ’ದಲ್ಲಿ ಸ್ಪರ್ಧೆಗಳು ನಡೆಯುತ್ತವೆ.