ವಿಶ್ವ ಬ್ಯಾಡ್ಮಿಂಟನ್‌: ಶ್ರೀಕಾಂತ್‌ಗೆ ಸುಲಭ ಗೆಲುವು

Team Udayavani, Aug 22, 2017, 7:15 AM IST

ಹೊಸದಿಲ್ಲಿ: ಉನ್ನತ ರ್‍ಯಾಂಕಿನ ಭಾರತದ ಶಟ್ಲರ್‌ ಕಿದಂಬಿ ಶ್ರೀಕಾಂತ್‌ ಅವರು ಸುಲಭ ಗೆಲುವಿನೊಂದಿಗೆ ವಿಶ್ವ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಶಿಪ್‌ನಲ್ಲಿ ತನ್ನ ಅಭಿಯಾನ ಆರಂಭಿಸಿದ್ದಾರೆ.

ಗ್ಲಾಸ್ಕೋದಲ್ಲಿ ನಡೆದ ಮೊದಲ ಸುತ್ತಿನ ಪಂದ್ಯದಲ್ಲಿ ಶ್ರೀಕಾಂತ್‌ ರಶ್ಯದ ಶ್ರೇಯಾಂಕರಹಿತ ಆಟಗಾರ ಸಗೈì ಸಿರಾಂಟ್‌ ಅವರನ್ನು 21-13, 21-12 ಗೇಮ್‌ಗಳಿಂದ ಉರುಳಿಸಿದರು. ಕೇವಲ 28 ನಿಮಿಷಗಳಲ್ಲಿ ಜಯಭೇರಿ ಬಾರಿಸಿದ ಅವರು ದ್ವಿತೀಯ ಸುತ್ತಿನಲ್ಲಿ ಫ್ರಾನ್ಸ್‌ನ ಲುಕಾಸ್‌ ಕಾರ್ವೀ ಅವರನ್ನು ಎದುರಿಸಲಿದ್ದಾರೆ.

ಉತ್ತಮ ಫಾರ್ಮ್ನಲ್ಲಿರುವ ಶ್ರೀಕಾಂತ್‌ ಭರ್ಜರಿಯಾಗಿ ಆಟ ಆರಂಭಿಸಿ 6-1 ಮುನ್ನಡೆ ಸಾಧಿಸಿದ್ದರು. 11-6, 15-7ರಿಂದ ಮುನ್ನಡೆ ಗಳಿಸುತ್ತ ಹೋದ ಅವರು 21-13 ರಿಂದ ಮೊದಲ ಗೇಮ್‌ ಗೆದ್ದರು. ದ್ವಿತೀಯ ಗೇಮ್‌ನ ಆರಂಭದಲ್ಲಿ ಇಬ್ಬರೂ ಅಂಕ ಗಳಿಸಲು ಪ್ರಯತ್ನ ಪಟ್ಟರು. 

ಮಿಕ್ಸೆಡ್‌ ಡಬಲ್ಸ್‌ ಪಂದ್ಯದಲ್ಲಿ ಭಾರತದ ಪ್ರಜಕ್ತ ಸಾವಂತ್‌ ಮತ್ತು ಮಲೇಶ್ಯದ ಯೋಗೇಂದ್ರನ್‌ ಕೃಷ್ಣನ್‌ ಅವರು ಚೈನೀಸ್‌ ತೈಪೆಯ ಕಾಯಿ ಹಾಸಿನ್‌ ಮತ್ತು ಚಿಂಗ್‌ ಯೋ ಅವರನ್ನು ಮೂರು ಗೇಮ್‌ಗಳ ಕಠಿನ ಹೋರಾಟದಲ್ಲಿ 21-15, 13-21, 21-18 ಅಂತರದಿಂದ ಸೋಲಿಸಿದರು.  ಪುರುಷರ ಮಿಕ್ಸೆಡ್‌ ಡಬಲ್ಸ್‌ನಲ್ಲಿ ಸಾತ್ವಿಕ್‌ ಸಾಯಿರಾಜ್‌ ಮತ್ತು ಕೆ. ಮನೀಷಾ ಅವರು ಹಾಂಕಾಂಗ್‌ನ ಟಾಮ್‌ ಹೆಯಿ ಮತ್ತು ಎನ್‌ಜಿ ಯಾವು ಅವರನ್ನ 24-22, 21-17 ಗೇಮ್‌ಗಳಿಂದ ಉರುಳಿಸಿದರು.