World TT: ಭಾರತಕ್ಕೆ ಮಿಶ್ರ ಫ‌ಲ

Team Udayavani, Feb 19, 2024, 11:31 PM IST

ಬುಸಾನ್‌ (ದಕ್ಷಿಣ ಕೊರಿಯಾ): ವಿಶ್ವ ಟೇಬಲ್‌ ಟೆನಿಸ್‌ ಚಾಂಪಿಯನ್‌ಶಿಪ್‌ನಲ್ಲಿ ಭಾರತ ಮಿಶ್ರ ಫ‌ಲ ಅನುಭವಿಸಿದೆ. ವನಿತಾ ತಂಡ ಉಜ್ಬೆಕಿಸ್ಥಾನವನ್ನು ಮಣಿಸುವಲ್ಲಿ ಯಶಸ್ವಿಯಾದರೆ, ಪುರುಷರ ತಂಡ ಆತಿಥೇಯ ದಕ್ಷಿಣ ಕೊರಿಯಾಕ್ಕೆ ಶರಣಾಯಿತು.

ಚೀನಕ್ಕೆ 2-3 ಅಂತರದಿಂದ ಸೋತ ಬಳಿಕ ಲಯ ಕಂಡುಕೊಂಡ ಭಾರತದ ವನಿತೆಯರು ಹಂಗೇರಿಯನ್ನು 3-2ರಿಂದ ಮಣಿಸಿದ್ದರು. ಇದೀಗ ಉಜ್ಬೆಕಿಸ್ಥಾನಕ್ಕೆ 3-0 ಸೋಲುಣಿಸಿದರು. ಐಹಿಕಾ ಮುಖರ್ಜಿ ಮತ್ತು ಶ್ರೀಜಾ ಅಕುಲಾ ಅವರಿಗೆ ವಿಶ್ರಾಂತಿ ನೀಡಲಾಗಿತ್ತು. ಇವರ ಬದಲು ಅರ್ಚನಾ ಕಾಮತ್‌ ಮತ್ತು ದಿಯಾ ಚಿತಾಲೆ ಆಡಲಿಳಿದರು. ಇಬ್ಬರೂ ಸಿಂಗಲ್ಸ್‌ ಜಯಿಸಿದರು. ಇನ್ನೊಂದು ಗೆಲುವನ್ನು ತಂದಿತ್ತವರು ಮಣಿಕಾ ಬಾತ್ರಾ.

ಅರ್ಚನಾ ಕಾಮತ್‌ 11-7, 11-3, 11-6ರಿಂದ ರಿಮ್ನಾ ಗುಫ‌Åನೋವ್‌ ಅವರನ್ನು ಮಣಿಸಿದರು. ಮಣಿಕಾ ಬಾತ್ರಾ 11-7, 11-4, 11-1 ಅಂತರದಿಂದ ಮರ್ಖಾಬೊ ಮ್ಯಾಗಿxàವಾ ಅವರನ್ನು ಕೆಡವಿದರು. ದಿಯಾ 4 ಗೇಮ್‌ಗಳ ಹೋರಾಟದಲ್ಲಿ ರೋಜಾಲಿನಾ ಖಜೀವಾ ಅವರನ್ನು ಹಿಮ್ಮೆಟ್ಟಿಸಲು ಯಶಸ್ವಿಯಾದರು. ಅಂತರ 11-6, 10-12, 11-4, 11-6. ವನಿತಾ ತಂಡವಿನ್ನು ಸ್ಪೇನ್‌ ವಿರುದ್ಧ ಆಡಲಿದೆ.

ಪುರುಷರಿಗೆ ಆಘಾತ
ಅನುಭವಿ ಆಟಗಾರ ಅಚಂತ ಶರತ್‌ ಕಮಲ್‌, ಹಾಲಿ ರಾಷ್ಟ್ರೀಯ ಚಾಂಪಿಯನ್‌ ಹರ್ಮೀತ್‌ ದೇಸಾಯಿ ಹಾಗೂ ಜಿ. ಸಥಿಯನ್‌ ಅವರನ್ನೊಳಗೊಂಡ ಭಾರತದ ಪುರುಷರ ತಂಡ ಆತಿಥೇಯರ ಸವಾಲನ್ನು ಮೆಟ್ಟಿ ನಿಲ್ಲಲು ವಿಫ‌ಲವಾಯಿತು. ಮೂವರೂ ಸೋಲನುಭವಿಸಿದರು.

ಆರಂಭಿಕ ಪಂದ್ಯದಲ್ಲಿ ಚಿಲಿಯನ್ನು ಮಣಿಸಿದ್ದ ಭಾರತದ ಪುರುಷರ ತಂಡ, ಬಳಿಕ ಪೋಲೆಂಡ್‌ಗೆ 1-3ರಿಂದ ಸೋತಿತ್ತು.