ವಿಶ್ವ ಟಿಟಿ ಟೀಮ್‌ ಚಾಂಪಿಯನ್‌ಶಿಪ್‌… ನಾಕೌಟ್‌ ಪ್ರವೇಶಿಸಿದ ಭಾರತ

Team Udayavani, Feb 20, 2024, 11:17 PM IST

ಬುಸಾನ್‌ (ದಕ್ಷಿಣ ಕೊರಿಯಾ): ವಿಶ್ವ ಟೇಬಲ್‌ ಟೆನಿಸ್‌ ಟೀಮ್‌ ಚಾಂಪಿಯನ್‌ಶಿಪ್‌ನಲ್ಲಿ ಭಾರತದ ವನಿತೆಯರ ಹಾಗೂ ಪುರುಷರ ತಂಡಗಳೆರಡೂ ನಾಕೌಟ್‌ ಪ್ರವೇಶಿಸಿವೆ.

ವನಿತೆಯರ ಕೊನೆಯ ಗ್ರೂಪ್‌ ಪಂದ್ಯದಲ್ಲಿ ಭಾರತ 3-2ರಿಂದ ಸ್ಪೇನ್‌ಗೆ ಸೋಲುಣಿಸಿತು. ಭಾರತದ ಆರಂಭವೇನೂ ಭರವಸೆಯಿಂದ ಕೂಡಿರಲಿಲ್ಲ. ಶ್ರೀಜಾ ಅಕುಲಾ ಮತ್ತು ಮಣಿಕಾ ಬಾತ್ರಾ ಮೊದಲೆರಡು ಸಿಂಗಲ್ಸ್‌ನಲ್ಲಿ ಸೋತು ಹೋಗಿದ್ದರು. 3ನೇ ಸಿಂಗಲ್ಸ್‌ನಲ್ಲಿ ಜಯ ಸಾಧಿಸಿದ ಐಹಿಕಾ ಮುಖರ್ಜಿ ಭಾರತಕ್ಕೆ ಜೀವದಾನ ನೀಡಿದರು. ಉಳಿದೆರಡು ಸಿಂಗಲ್ಸ್‌ ಗೆಲ್ಲುವ ಮೂಲಕ ಮಣಿಕಾ ಬಾತ್ರಾ, ಶ್ರೀಜಾ ಅಕುಲಾ ಗೆಲುವು ಸಾಧಿಸುವಲ್ಲಿ ಯಶಸ್ವಿಯಾದರು.

ಒಂದನೇ ಗ್ರೂಪ್‌ನಲ್ಲಿರುವ ಭಾರತ ದ್ವಿತೀಯ ಸ್ಥಾನಿಯಾಯಿತು. ಚೀನ ಅಗ್ರಸ್ಥಾನಲ್ಲಿದೆ. ಭಾರತ 4 ಪಂದ್ಯಗಳಲ್ಲಿ ಮೂರನ್ನು ಗೆದ್ದಿತು. ಏಕೈಕ ಸೋಲು ಚೀನ ವಿರುದ್ಧ ಎದುರಾಗಿತ್ತು.

40 ತಂಡಗಳ ಈ ಪಂದ್ಯಾವಳಿಯಲ್ಲಿ ಭಾರತ ನಾಕೌಟ್‌ ಸುತ್ತು ಪ್ರವೇಶಿಸಿದ 24ನೇ ತಂಡವಾಗಿದೆ.

ಪುರುಷರಿಗೆ 3-0 ಜಯ
ಪುರುಷರ ತಂಡ 3-0 ಅಂತರದಿಂದ ನ್ಯೂಜಿಲ್ಯಾಂಡ್‌ಗೆ ಸೋಲುಣಿಸಿತು. ಹರ್ಮೀತ್‌ ದೇಸಾಯಿ, ಜಿ. ಸಥಿಯನ್‌ ಮತ್ತು ಮಾನುಶ್‌ ಶಾ ಭಾರತಕ್ಕೆ ಗೆಲುವು ತಂದಿತ್ತರು.

ಇದನ್ನೂ ಓದಿ: Virat Kohli: ಕ್ರಿಕೆಟಿಗ ವಿರಾಟ್‌ ಕೊಹ್ಲಿ ದಂಪತಿಗೆ ಗಂಡು ಮಗು… ಹೆಸರೇನು ಗೊತ್ತಾ?