ವಿಶ್ವ ಕುಸ್ತಿ ಚಾಂಪಿಯನ್‌ಶಿಪ್‌: ಬೆಳ್ಳಿ ಗೆದ್ದ ಅಂಶು, ಸರಿತಾಗೆ ಕಂಚು

Team Udayavani, Oct 9, 2021, 5:56 AM IST

ಓಸ್ಲೊ (ನಾರ್ವೆ): ಭಾರತದ ಕುಸ್ತಿಪಟು ಅಂಶು ಮಲಿಕ್‌ ನೂತನ ಇತಿಹಾಸ ಬರೆದಿದ್ದಾರೆ. ವಿಶ್ವ ಕುಸ್ತಿ ಚಾಂಪಿಯನ್‌ಶಿಪ್‌ನಲ್ಲಿ ಬೆಳ್ಳಿ ಪದಕ ಗೆದ್ದ ಭಾರತದ ಮೊದಲ ವನಿತಾ ಸ್ಪರ್ಧಿಯಾಗಿ ಮೂಡಿಬಂದಿದ್ದಾರೆ.

57 ಕೆಜಿ ವಿಭಾಗದ ಸ್ಪರ್ಧೆಯಲ್ಲಿ ಅಂಶು ಮಲಿಕ್‌ ಚಿನ್ನದ ಮೇಲೆ ಕಣ್ಣಿಟ್ಟಿದ್ದರು. ಆದರೆ ಫೈನಲ್‌ ಪಂದ್ಯದಲ್ಲಿ ಅವರು 2016ರ ಒಲಿಂಪಿಕ್ಸ್‌ ಚಾಂಪಿಯನ್‌, ಅಮೆರಿಕದ ಹೆಲೆನ್‌ ಲೂಯಿಸ್‌ ಮರೌಲಿಸ್‌ ವಿರುದ್ಧ 1-4 ಅಂತರದಿಂದ ಪರಾಭವಗೊಂಡು ಬೆಳ್ಳಿಗೆ ತೃಪ್ತಿಪಡಬೇಕಾಯಿತು.

ವಿಶ್ವ ಮಹಿಳಾ ಕುಸ್ತಿಯಲ್ಲಿ ಭಾರತಕ್ಕೆ ಬೆಳ್ಳಿ ಪದಕ ಒಲಿದದ್ದು ಇದೇ ಮೊದಲು. ಈ ಹಿಂದೆ ಅಲ್ಕಾ ತೋಮರ್‌ (2006), ಗೀತಾ ಪೋಗಟ್‌ (2012), ಬಬಿತಾ ಪೋಗಟ್‌ (2012), ಪೂಜಾ ದಂಡಾ (2018) ಮತ್ತು ವಿನೇಶ್‌ ಪೋಗಟ್‌ (2019) ಕಂಚು ಗೆದ್ದದ್ದೇ ಉತ್ತಮ ಸಾಧನೆಯಾಗಿತ್ತು.

ಇದನ್ನೂ ಓದಿ:ಐಎಸ್‌ಎಸ್‌ಎಫ್ ಶೂಟಿಂಗ್‌ ವಿಶ್ವ ಚಾಂಪಿಯನ್‌ಶಿಪ್‌: ಭಾರತಕ್ಕೆ 10 ಗೋಲ್ಡ್‌

ಕಂಚು ಗೆದ್ದ ಸರಿತಾ
ಭಾರತದ ಮತೋರ್ವ ಕುಸ್ತಿಪಟು ಸರಿತಾ ಮೋರ್‌ (59 ಕೆಜಿ) ಸ್ವೀಡನ್‌ನ ಸಾರಾ ಜೋನಾ ಲಿಂಡ್‌ಬೋರ್ಗ್‌ ವಿರುದ್ದ 8-2 ಅಂತರದಿಂದ ಗೆಲುವು ಸಾಧಿಸಿ ಕಂಚಿನ ಪದಕ ಜಯಿಸಿದರು. ಈ ಮೂಲಕ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಕಂಚಿನ ಪದಕ ಪಡೆದ ಭಾರತದ 6ನೇ ಮಹಿಳಾ ಕುಸ್ತಿಪಟುವಾಗಿ ಹೊರಹೊಮ್ಮಿದರು.