ಗೊಂದಲ ಮೂಡಿಸಿದ ರೆಸ್ಲರ್‌ ನಿಶಾ ದಹಿಯಾ ಹತ್ಯೆ ಸುದ್ದಿ

Team Udayavani, Nov 11, 2021, 5:08 AM IST

ಸೋನೆಪತ್‌: ನಿಶಾ ದಹಿಯಾ ಎಂಬ ಹೆಸರಿನ ವನಿತಾ ಕುಸ್ತಿಪಟು ಮತ್ತು ಆಕೆಯ ಸಹೋದರನ ಹತ್ಯೆ ಪ್ರಕರಣ ಬುಧವಾರ ಸಂಜೆ ಭಾರೀ ಗೊಂದಲ ಮೂಡಿಸಿತು.

ಹತ್ಯೆಯಾದ ನಿಶಾ ದಹಿಯಾ ಅಂಡರ್‌-23 ವಿಭಾಗದ ವಿಶ್ವ ಚಾಂಪಿಯನ್‌ಶಿಪ್‌ ಕಂಚಿನ ಪದಕ ವಿಜೇತ ಕುಸ್ತಿಪಟು ಎಂದು ಬ್ರೇಕಿಂಗ್‌ ನ್ಯೂಸ್‌ ಬರತೊಡಗಿತು. ಆದರೆ ತಾನು ಆರಾಮವಾಗಿದ್ದೇನೆ, ಉತ್ತರಪ್ರದೇಶದ ಗೋಂಡಾಕ್ಕೆ ಕುಸ್ತಿ ಸ್ಪರ್ಧೆಯಲ್ಲಿ ಭಾಗವಹಿಸಲು ಆಗಮಿಸಿದ್ದೇನೆ ಎಂದು ನಿಶಾ ದಹಿಯಾ ವೀಡಿಯೋ ಮೂಲಕ ಸ್ಪಷ್ಟನೆ ನೀಡಿದ ಬಳಿಕವಷ್ಟೇ ಈ ಗೊಂದಲಕ್ಕೆ ತೆರೆ ಬಿದ್ದದ್ದು.

ವೀಡಿಯೋದಲ್ಲಿ ಒಲಿಂಪಿಕ್ಸ್‌ ಕಂಚಿನ ಪದಕ ವಿಜೇತೆ ಸಾಕ್ಷಿ ಮಲಿಕ್‌ ಕೂಡ ಇದ್ದರು.

ಸೋನೆಪತ್‌ನ ಹಲಾಲ್‌ಪುರದಲ್ಲಿರುವ “ಸುಶೀಲ್‌ ಕುಮಾರ್‌ ರೆಸ್ಲಿಂಗ್‌ ಕುಸ್ತಿ ಅಕಾಡೆಮಿ’ಯ ಹೊರಗೆ ಅಪರಿಚಿತರು ನಿಶಾ ದಹಿಯಾ ಹೆಸರಿನ ಬೇರೋರ್ವ ಕುಸ್ತಿಪಟು, ಆಕೆಯ ಸಹೋದರ ಸೂರಜ್‌ ದಹಿಯಾ ಅವರನ್ನು ಹತ್ಯೆ ಮಾಡಿದ್ದರು. ಘಟನೆಯಲ್ಲಿ ಗಂಭೀರವಾಗಿ ಗಾಯಗೊಂಡ ಇವರ ತಾಯಿಯನ್ನು ರೋಹrಕ್‌ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಇದನ್ನೂ ಓದಿ:96 ಲಕ್ಷ ಕೋಟಿ ರೂ. ಪರಿಹಾರ ನೀಡಿ! ಮಾಲಿನ್ಯದ ದುಷ್ಪರಿಣಾಮ ತಡೆಗೆ ಆರ್ಥಿಕ ಸಹಾಯ ಕೋರಿಕೆ

“ಹತ್ಯೆಗೊಳಗಾದ ಕುಸ್ತಿಪಟು ಹಲಾಲ್‌ಪುರ ಗ್ರಾಮದವರು. ಆಕೆಯ ಹೆಸರು ಕೂಡ ನಿಶಾ ದಹಿಯಾ. ಆದರೆ ಅಂಡರ್‌-23 ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಪದಕ ಗೆದ್ದ ನಿಶಾ ದಹಿಯಾ ಅಲ್ಲ’ ಎಂದು ಕೋಚ್‌ ರಣಧೀರ್‌ ಮಲಿಕ್‌ ಸ್ಪಷ್ಟಪಡಿಸಿದ್ದಾರೆ.
ಹತ್ಯೆಗೆ ಕಾರಣ ಏನೆಂದು ತಿಳಿದು ಬಂದಿಲ್ಲ. ಇದರ ಹಿಂದೆ ಅಕಾಡೆಮಿಯ ಕೋಚ್‌ ಒಬ್ಬರು ಶಾಮೀಲಾಗಿರುವ ಸಾಧ್ಯತೆ ಇದೆ ಎಂದು ಪೊಲೀಸರು ಶಂಕೆ ವ್ಯಕ್ತಪಡಿಸಿದ್ದಾರೆ. ತನಿಖೆ ಮುಂದುವರಿದಿದೆ.