‘Wrestling Champions Super League’: ಅನುಮತಿ ನೀಡಲು ನಕಾರ

Team Udayavani, Sep 17, 2024, 6:02 AM IST

ಹೊಸದಿಲ್ಲಿ: ಒಲಿಂಪಿಕ್‌ ಪದಕ ವಿಜೇತ ಕುಸ್ತಿಪಟು ಸಾಕ್ಷಿ ಮಲಿಕ್‌, ಅಮನ್‌ ಸೆಹ್ರಾವತ್‌ ಮತ್ತು ವಿಶ್ವ ಚಾಂಪಿಯನ್‌ಶಿಪ್‌ ಕಂಚಿನ ಪದಕ ವಿಜೇತೆ ಗೀತಾ ಫೋಗಾಟ್‌ ಸೇರಿಕೊಂಡು “ರೆಸ್ಲಿಂಗ್‌ ಚಾಂಪಿಯನ್‌ಶಿಪ್‌ ಸೂಪರ್‌ ಲೀಗ್‌’ (ಡಬ್ಲ್ಯುಸಿಎಸ್‌ಎಲ್‌) ನಡೆಸಲು ಚಿಂತನೆ ನಡೆಸಿದ್ದಾರೆ. ತಮ್ಮ ಯೋಜನೆಯನ್ನು ಅವರು ಸೋಮವಾರ ಸಾಮಾಜಿಕ ಜಾಲತಾಣದಲ್ಲಿ ಘೋಷಿಸಿದ್ದಾರೆ.

ಪ್ಯಾರಿಸ್‌ ಒಲಿಂಪಿಕ್ಸ್‌ನಲ್ಲಿ ಕಂಚು ಗೆದ್ದಿದ್ದ ಅಮನ್‌ ಸೆಹ್ರಾವತ್‌ ಈ ಬಗ್ಗೆ ಟ್ವೀಟ್‌ ಮಾಡಿ, “ಭಾರತೀಯ ಕುಸ್ತಿ ಪ್ರತಿಭೆಗಳು ಗುಣಮಟ್ಟದ್ದಾಗಿವೆ. ಹೀಗಾಗಿ ಅವರಿಗೆ ವಿಶ್ವದರ್ಜೆಯ ವೇದಿಕೆ ಬೇಕಾಗಿದೆ. ಈ ನೆಲೆಯಲ್ಲಿ ರೆಸ್ಲಿಂಗ್‌ ಚಾಂಪಿಯನ್ಸ್‌ ಸೂಪರ್‌ ಲೀಗ್‌ ರೂಪುಗೊಳ್ಳಲಿದೆ’ ಎಂದಿದ್ದಾರೆ.

ಡಬ್ಲ್ಯುಎಫ್ಐ ನಕಾರ
ತಾರಾ ಕುಸ್ತಿಪಟುಗಳು ನಡೆಸಲು ಉದ್ದೇಶಿಸಿರುವ ಈ ಕುಸ್ತಿ ಲೀಗ್‌ ಪಂದ್ಯಾವಳಿಗೆ ಭಾರತೀಯ ಕುಸ್ತಿ ಪ್ರಾಧಿಕಾರ ಅನುಮತಿ ನೀಡಲು ನಿರಾಕರಿಸಿದೆ. ಯೋಜನೆ ಪರಿಶೀಲಿಸುವ ಅಗತ್ಯವಿದೆ ಎಂದು ಹೇಳಿದೆ.