ರಾಣಾ ಮೇಲೆ ಹಲ್ಲೆ: ಒಲಿಂಪಿಕ್ಸ್‌ ಬೆಳ್ಳಿ ತಾರೆ ಸುಶೀಲ್‌ಗೆ ನೋಟಿಸ್‌

Team Udayavani, Jan 6, 2018, 6:15 AM IST

ನವದೆಹಲಿ: ಕಾಮನ್‌ವೆಲ್ತ್‌ ಗೇಮ್ಸ್‌ ಅರ್ಹತಾ ಸುತ್ತಿನ ಪಂದ್ಯದ ವೇಳೆ ಕುಸ್ತಿಪಟು ಪ್ರವೀಣ್‌ ರಾಣಾ ಮೇಲೆ ನಡೆಸಿರುವ ಹಲ್ಲೆಗೆ ಸಂಬಂಧಿಸಿದಂತೆ ಎರಡು ಒಲಿಂಪಿಕ್ಸ್‌ ಪದಕ ವಿಜೇತ ಕುಸ್ತಿಪಟು ಸುಶೀಲ್‌ ಕುಮಾರ್‌ಗೆ ಭಾರತೀಯ ಕುಸ್ತಿ ಒಕ್ಕೂಟ(ಡಬ್ಲೂéಎಫ್ಐ) ನೋಟಿಸ್‌ ನೀಡಿದೆ. 

ಈ ಬಗ್ಗೆ ಪ್ರತಿಕ್ರಿಯಿಸಿದ ಡಬ್ಲೂéಎಫ್ಐ ಸಹಾಯಕ ಕಾರ್ಯದರ್ಶಿ, ಹಲ್ಲೆಗೆ ಸಂಬಂಧಿಸಿದಂತೆ ಸುಶೀಲ್‌ ಕುಮಾರ್‌ ಮತ್ತು ಅವರ ಬೆಂಬಲಿಗರಾದ 6 ಮಂದಿಯ ಮೇಲೆ ರಾಣಾ ದೂರು ನೀಡಿದ್ದಾರೆ. ಇದಕ್ಕೆ ಸಂಬಂಧಿಸಿದಂತೆ ಸುಶೀಲ್‌ಗೆ ನೋಟಿಸ್‌ ನೀಡಲಾಗಿದೆ. ಅವರ ಪ್ರತಿಕ್ರಿಯೆಗೆ ಮೂರು ದಿನಗಳ ಕಾಲ ಅವಕಾಶ ನೀಡಲಾಗಿದೆ. ಆ ನಂತರ ನಾವು ನಿರ್ಧಾರ ಕೈಗೊಳ್ಳುತ್ತೇವೆ ಎಂದು ತಿಳಿಸಿದ್ದಾರೆ.

ನಡೆದ ಘಟನೆ ಏನು?: ಇತ್ತೀಚೆಗೆ ಕಾಮನ್‌ವೆಲ್ತ್‌ ಗೇಮ್ಸ್‌ಗೆ ಅರ್ಹತಾ ಸುತ್ತಿನ ಕುಸ್ತಿಪಂದ್ಯಗನ್ನು ಆಯೋಜಿಸಲಾಗಿತ್ತು. 74 ಕೆಜಿ ವಿಭಾಗದಲ್ಲಿ ಸುಶೀಲ್‌ ಕುಮಾರ್‌ ಮತ್ತು ಪ್ರವೀಣ್‌ ರಾಣಾ ಸ್ಪರ್ಧಿಸಿದ್ದರು. ಸುಶೀಲ್‌ 7-3ರಿಂದ ಗೆದ್ದು ಕಾಮನ್‌ವೆಲ್ತ್‌ಗೆ ಅರ್ಹತೆ ಪಡೆದಿದ್ದರು. ಆದರೆ ಈ ಸಂದರ್ಭದಲ್ಲಿ ಪ್ರವೀಣ್‌ ರಾಣಾ ಮೇಲೆ ಮೈದಾನದಲ್ಲಿಯೇ ಹಲ್ಲೆ ಮಾಡಲಾಗಿತ್ತು. ಹಲ್ಲೆ ಮಾಡಿದವರು ಸುಶೀಲ್‌ ಬೆಂಬಲಿಗರು ಎಂದು ರಾಣಾ ದೂರು ನೀಡಿದ್ದಾರೆ. ಆದರೆ ಸುಶೀಲ್‌ ಇದನ್ನು ನಿರಾಕರಿಸಿದ್ದಾರೆ.