IndiGo: ಒಂದು ದಿನದ ರಜೆ ಹಾಳು ಮಾಡಿದ್ರಿ..: ಇಂಡಿಗೋ ವಿರುದ್ದ ಅಭಿಷೇಕ್‌ ಶರ್ಮಾ ಟೀಕೆ

Team Udayavani, Jan 13, 2025, 3:12 PM IST

ಹೊಸದಿಲ್ಲಿ: ಭಾರತೀಯ ಕ್ರಿಕೆಟಿಗ ಅಭಿಷೇಕ್ ಶರ್ಮಾ (Abhieshekh sharma) ಅವರು ದೆಹಲಿ ವಿಮಾನ ನಿಲ್ದಾಣದಲ್ಲಿ ಸಿಬ್ಬಂದಿಯೊಬ್ಬರು ನಡೆಸಿದ ದುರ್ವರ್ತನೆ ವಿರುದ್ಧ ಇಂಡಿಗೋ ಏರ್‌ಲೈನ್ಸ್ ಅನ್ನು ಸೋಮವಾರದಂದು (ಜ.13) ಟೀಕಿಸಿದರು.

ಸರಿಯಾದ ಸಮಯಕ್ಕೆ ವಿಮಾನ ನಿಲ್ದಾಣಕ್ಕೆ ತಲುಪಿದ್ದರೂ ವಿಮಾನ ತಪ್ಪಿಸಿಕೊಂಡಿದ್ದರಿಂದ ತಮ್ಮ ಒಂದೇ ಒಂದು ದಿನದ ರಜೆ ಹಾಳಾಗಿದೆ ಎಂದು ಅಭಿಷೇಕ್ ಹತಾಶೆ ವ್ಯಕ್ತಪಡಿಸಿದರು.

ಜನವರಿ 22 ರಿಂದ ಆರಂಭವಾಗಲಿರುವ ಇಂಗ್ಲೆಂಡ್ ವಿರುದ್ಧದ ಐದು ಪಂದ್ಯಗಳ ಟಿ20ಐ ಸರಣಿಗೆ 24 ವರ್ಷದ ಅಭಿಷೇಕ್ ಭಾರತೀಯ ತಂಡವನ್ನು ಸೇರಲಿದ್ದಾರೆ.

ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡಿರುವ ಕಟುವಾದ ಹೇಳಿಕೆಯಲ್ಲಿ, ಅಭಿಷೇಕ್ ತನ್ನನ್ನು ಅನಗತ್ಯವಾಗಿ ಕೌಂಟರ್‌ ಗಳ ನಡುವೆ ಕಳುಹಿಸಲಾಯಿತು, ಇದರಿಂದಾಗಿ ವಿಮಾನ ತಪ್ಪಿಸಿಕೊಳ್ಳಬೇಕಾಯಿತು ಎಂದು ಹೇಳಿಕೊಂಡಿದ್ದಾರೆ. ಅವರು ನಿರ್ದಿಷ್ಟ ಸಿಬ್ಬಂದಿಯ ಹೆಸರನ್ನು ಹೆಸರಿಸಿ ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿದ್ದಾರೆ.

“ದೆಹಲಿ ವಿಮಾನ ನಿಲ್ದಾಣದಲ್ಲಿ ಇಂಡಿಗೋ ವಿಮಾನ ನಿಲ್ದಾಣದಲ್ಲಿ ನನಗೆ ಅತ್ಯಂತ ಕೆಟ್ಟ ಅನುಭವವಾಯಿತು. ಸಿಬ್ಬಂದಿಯ ಅದರಲ್ಲೂ ವಿಶೇಷವಾಗಿ ಕೌಂಟರ್ ಮ್ಯಾನೇಜರ್ ಶ್ರೀಮತಿ ಸುಶ್ಮಿತಾ ಮಿತ್ತಲ್ ಅವರ ವರ್ತನೆ ಸಂಪೂರ್ಣವಾಗಿ ಸ್ವೀಕಾರಾರ್ಹವಲ್ಲ. ನಾನು ಸರಿಯಾದ ಕೌಂಟರ್‌ ಗೆ ಸಮಯಕ್ಕೆ ಸರಿಯಾಗಿ ಬಂದೆ, ಆದರೆ ಅವರು ನನ್ನನ್ನು ಅನಗತ್ಯವಾಗಿ ಮತ್ತೊಂದು ಕೌಂಟರ್‌ ಗೆ ಕಳುಹಿಸಿದರು. ನಂತರ ಚೆಕ್-ಇನ್ ಮುಚ್ಚಲಾಗಿದೆ ಎಂದು ನನಗೆ ತಿಳಿಸಲಾಯಿತು, ಇದರಿಂದಾಗಿ ನಾನು ನನ್ನ ವಿಮಾನವನ್ನು ತಪ್ಪಿಸಿಕೊಂಡೆ. ನನಗೆ ಕೇವಲ ಒಂದು ದಿನದ ರಜೆ ಇತ್ತು, ಅದು ಈಗ ಸಂಪೂರ್ಣವಾಗಿ ಹಾಳಾಗಿದೆ. ಅಷ್ಟೇ ಅಲ್ಲದೆ, ಅವರು ಯಾವುದೇ ಸಹಾಯವನ್ನು ನೀಡುತ್ತಿಲ್ಲ. ಇದು ಇಲ್ಲಿಯವರೆಗೆ ನಾನು ಅನುಭವಿಸಿದ ಅತ್ಯಂತ ಕೆಟ್ಟ ವಿಮಾನಯಾನ ಅನುಭವ ಮತ್ತು ಕೆಟ್ಟ ಸಿಬ್ಬಂದಿ ನಿರ್ವಹಣೆಯಾಗಿದೆ” ಎಂದು ಅಭಿಷೇಕ್ ಶರ್ಮಾ ತಮ್ಮ ಇನ್‌ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಹೇಳಿದ್ದಾರೆ.

ಇತ್ತೀಚೆಗೆ ಇಂಗ್ಲೆಂಡ್ ವಿರುದ್ಧದ ಟಿ20ಐ ಸರಣಿಗಾಗಿ ಅಭಿಷೇಕ್ ಶರ್ಮಾ ಅವರನ್ನು ಭಾರತದ 15 ಜನರ ತಂಡದಲ್ಲಿ ಆಯ್ಕೆ ಮಾಡಲಾಗಿದೆ. ಶರ್ಮಾ ವಿಜಯ್ ಹಜಾರೆ ಟ್ರೋಫಿಯಲ್ಲಿ ಪಂಜಾಬ್ ಅನ್ನು ಪ್ರತಿನಿಧಿಸುತ್ತಿದ್ದರು. ಜನವರಿ 11 ರಂದು ಇತ್ತೀಚೆಗೆ ಅಭಿಷೇಕ್ ಪಂಜಾಬ್ ಪರ ಆಡಿದ್ದರು.