ಐಪಿಎಲ್‌ ಹರಾಜು ಪಟ್ಟಿಯಲ್ಲಿ 1,122 ಆಟಗಾರರು

Team Udayavani, Jan 14, 2018, 6:20 AM IST

ಮುಂಬಯಿ: ಈ ಬಾರಿಯ ಐಪಿಎಲ್‌ ಹರಾಜಿಗೆ 1,122 ಆಟಗಾರರ ಹೆಸರು ಸೇರಿಕೊಂಡಿದೆ. ಐಪಿಎಲ್‌ನ ಬೃಹತ್‌ ಹರಾಜುಪಟ್ಟಿಗಳಲ್ಲಿ ಇದೂ ಒಂದೆಂದು ಗುರುತಿಸಲ್ಪಟ್ಟಿದೆ. ಇದರಲ್ಲಿ 778 ಮಂದಿ ಭಾರತೀಯ ಆಟಗಾರರಿದ್ದಾರೆ. ಗಮನಾರ್ಹ ಸಂಗತಿಯೆಂದರೆ, ಇನ್ನೂ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಆಡದ 838 ಆಟಗಾರರೂ ಹರಾಜು ವ್ಯಾಪ್ತಿಗೆ ಬರಲಿದ್ದಾರೆ. 281 ಆಟಗಾರರು ಅಂತಾರಾಷ್ಟ್ರೀಯ ಕ್ರಿಕೆಟ್‌ ಆಡಿರುವ ಅನುಭವಿಗಳಾಗಿದ್ದಾರೆ. ಅಸೋಸಿಯೇಟ್‌ ರಾಷ್ಟ್ರಗಳ ಮೂವರಿದ್ದಾರೆ.

ವಿಶ್ವದ ಹಲವು ರಾಷ್ಟ್ರಗಳ ಖ್ಯಾತ ನಾಮ ಆಟಗಾರರು ಸ್ಥಾನ ಪಡೆದಿದ್ದಾರೆ. ಮಹತ್ವದ ವಿಷಯವೆಂದರೆ, ಇಂಗ್ಲೆಂಡ್‌ನ‌ ಖ್ಯಾತ ಆಟಗಾರ ಜೋ ರೂಟ್‌ ಕೂಡ ಈ ಹರಾಜು ಪಟ್ಟಿಯನ್ನು ಪ್ರವೇಶಿಸಿರುವುದು. ವೆಸ್ಟ್‌ ಇಂಡೀಸ್‌ನ ಕ್ರಿಸ್‌ ಗೇಲ್‌ ಮತ್ತು ಇಂಗ್ಲೆಂಡ್‌ನ‌ ಆಲ್‌ರೌಂಡರ್‌ ಬೆನ್‌ ಸ್ಟೋಕ್ಸ್‌ ಈ ಪಟ್ಟಿಯಲ್ಲಿರುವ ಪ್ರಮುಖ ವಿದೇಶಿ ಆಟಗಾರರು. ಫ್ರಾಂಚೈಸಿಗಳು ಇವರಿಬ್ಬರನ್ನು ಕೊಳ್ಳಲು ಮುಗಿಬಿದ್ದರೆ ಅಚ್ಚರಿಯಿಲ್ಲ. ಭಾರತೀಯರ ಪೈಕಿ ಗೌತಮ್‌ ಗಂಭೀರ್‌, ಆರ್‌. ಅಶ್ವಿ‌ನ್‌, ಯುವರಾಜ್‌ ಸಿಂಗ್‌, ಅಜಿಂಕ್ಯ ರಹಾನೆ, ಶಿಖರ್‌ ಧವನ್‌ ದುಬಾರಿ ಮೊತ್ತಕ್ಕೆ ಹರಾಜಾಗುವ ನಿರೀಕ್ಷೆ ಮೂಡಿಸಿದ್ದಾರೆ. ಹಾಗೆಯೇ ಬ್ರೆಂಡನ್‌ ಮೆಕಲಮ್‌, ರಶೀದ್‌ ಖಾನ್‌, ಎವೋನ್‌ ಮಾರ್ಗನ್‌ ಕೂಡ ಭಾರೀ ಮೊತ್ತಕ್ಕೆ ಮಾರಾಟವಾಗುವ ಸಾಧ್ಯತೆ ಇದೆ.

ಹರಾಜಿನಲ್ಲಿ ಮಿಚೆಲ್‌ ಸ್ಟಾರ್ಕ್‌, ಬೆನ್‌ ಸ್ಟೋಕ್ಸ್‌ ಸಹಿತ 36 ಕ್ರಿಕೆಟಿಗರ ಮೂಲ ಬೆಲೆ ಗರಿಷ್ಠ 2 ಕೋ.ರೂ. ಆಗಿರುವುದು ಗಮನಾರ್ಹ.