ಬೆಂಗಳೂರು:ಬದುಕಲಿಲ್ಲ ಅತ್ಯಾಚಾರಕ್ಕೀಡಾದ 5 ರ ಬಾಲೆ 

Team Udayavani, Aug 26, 2017, 3:35 PM IST

ಬೆಂಗಳೂರು: ತಲಘಟ್ಟಪುರದಲ್ಲಿ  ಅಗಸ್ಟ್‌ 17 ರಂದು ಮನೆ ಮಾಲಿಕನಿಂದ ಬರ್ಬರವಾಗಿ ಅತ್ಯಾಚಾರಕ್ಕೀಡಾದ 5 ವರ್ಷ ಪ್ರಾಯದ ಬಾಲಕಿ ಶುಕ್ರವಾರ ರಾತ್ರಿ ಸೈಂಟ್‌ ಜೋನ್ಸ್‌ ಆಸ್ಪತ್ರೆಯಲ್ಲಿ ವಿಧಿವಶವಾಗಿದ್ದಾಳೆ.

ಅಗಸ್ಟ್‌ 17 ರಂದು ಕಾಮುಕನ ಅಟ್ಟಹಾಸಕ್ಕೆ ನಲುಗಿ ತೀವ್ರ ರಕ್ತಸ್ರಾವದಿಂದ ಬಳಲುತ್ತಿದ್ದ ಬಾಲಕಿಯನ್ನು ತಾಯಿ ಖಾಸಗಿ ಆಸ್ಪತ್ರೆಗೆ ಕರೆದೊಯ್ದಿದ್ದರು. ಆಸ್ಪತ್ರೆಯ ಸಿಬಂದಿ ಪೊಲೀಸರಿಗೆ ಕರೆ ಮಾಡಿ ವಿಷಯ ತಿಳಿಸಿದ್ದರು. ತಕ್ಷಣ ಪೋಕ್ಸೋ ಕಾಯಿದೆ ಅಡಿ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ತನಿಖೆ ಆರಂಭಿಸಿದ್ದರು.

ಬಾಲಕಿಗೆ ಹೆಚ್ಚಿನ ಚಿಕಿತ್ಸೆಗಾಗಿ ಸೈಂಟ್‌ ಜೋನ್ಸ್‌ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ನಿನ್ನೆ ಆರೋಗ್ಯದಲ್ಲಿ ತೀವ್ರ ವೈಪರಿತ್ಯ ಕಾಣಿಸಿಕೊಂಡು ಕೊನೆಯುಸಿರೆಳೆದಿದ್ದಾಳೆ ಎಂದು ವೈದ್ಯರು ತಿಳಿಸಿದ್ದಾರೆ.

ಪ್ರಕರಣಕ್ಕೆ ಸಂಬಂಧಿಸಿದಂತೆ ಅತ್ಯಾಚಾರ ಆರೋಪಿ ಮಲ್ಲಿಕಾರ್ಜುನ್‌ ಮತ್ತು ಆತನಿಗೆ ಸಹಕರಿಸಿದ ಮಹಿಳೆ ಚಂದನಾ ಎಂಬಾಕೆಯನ್ನು ಬಂಧಿಸಲಾಗಿದ್ದು, ನ್ಯಾಯಾಂಗ ಬಂಧನ ವಿಧಿಸಲಾಗಿದೆ. 

ವಿಕೃತ ಕಾಮುಕ ಮನೆ ಮಾಲಿಕ ರಕ್ಕಸನಾದ 
ಆರೋಪಿ ಮಲ್ಲಿಕಾರ್ಜುನ್‌ ಮನೆ ಮಾಲಿಕನಾಗಿದ್ದು,ಚಂದನಾ ಜೊತೆ ಅನೈತಿಕ ಸಂಬಂಧ ಹೊಂದಿದ್ದ, ಮಗುವನ್ನು ನೋಡಿ ಕೊಳ್ಳಲು ಚಂದನಾ ಬಳಿ ನೀಡಲಾಗುತ್ತಿತ್ತು. ಈ ವೇಳೆ ಕಾಮಾಂಧನಾಗಿ ಹೇಯ ಕೃತ್ಯ ಎಸಗಿದ್ದಾನೆ ಎಂದು ತನಿಖೆಯಲ್ಲಿ ತಿಳಿದು ಬಂದಿದೆ. 

ಗುಪ್ತಾಂಗಕ್ಕೆ ರಾಡ್‌ ಇರಿದಿದ್ದ ಕ್ರೂರಿ 
ಅತ್ಯಾಚಾರ ಎಸಗಿ ಗುಪ್ತಾಂಗಕ್ಕೆ ರಾಡ್‌ನಿಂದ ಇರಿದಿದ್ದ ಎಂದು ತನಿಖೆಯ ವೇಳೆ ಕಂಡು ಬಂದಿದೆ. ಮೊದಲೇ ಅಲ್ಸರ್‌ನಿಂದ ಬಳಲುತ್ತಿದ್ದ ಮುಗು ಗಾಯದಿಂದ ಇನ್ನಷ್ಟು ಘಾಸಿ ಗೊಂಡು ಸಾವನ್ನಪ್ಪಿದೆ.